RODAS

[Rosas].

Isla iti asideg ti abagatan a laud a nagsulian ti Turkia ken maysa kadagiti kadakkelan nga isla iti Baybay Aegeano; addaan dayta iti kaatiddog nga agarup 75 km (47 mi) ken kaakaba a 35 km (22 mi). Maawagan met iti Rodas ti kabeserana a siudad. Ti barko a nagluganan ni Pablo ket naggapu idiay Cos nga agturong iti Rodas idi dandanin agngudo ti maikatlo a panagdaliasat ti apostol kas misionero idi agarup 56 K.P.​—Ara 21:1.

Gapu iti nasayaat nga ayan ti Rodas kasta met dagiti nasayaat a sasangladanna, nalatak dayta kas sentro ti komersio iti nasapa a paset ti pakasaritaanna. Ngem agparang nga idi agangay, ti mismo a siudad ti Rodas ket ad-adda a nagdindinamag kas sentro ti kultura.

Ti Colossus ti Rodas, maysa a bronse nga estatua ti dios-init a ni Helios, ket nakatakder iti asideg ti sasangladan ti siudad ti Rodas. Naibilang a maysa dayta kadagiti “pito a pagsidsiddaawan” iti kadaanan a lubong, ket naikuna nga agarup 70 kasiko (31 m; 102 pie) ti katayagna. Nupay saanen a sitatakder dayta idi kaaldawan ni Pablo, agsipud ta rinippuog ti maysa a ginggined idi maikatlo a siglo K.K.P., adda pay laeng agingga iti Kadawyan a Panawen dagiti dadakkel a rebba ti Colossus. Saan a mapasingkedan ti kapanunotan a nakakayang ti estatua iti pagserkan ti sasangladan a lumasat dagiti barko iti nagbaetan dagiti gurongna.