SALAMIS

Maysa a napateg a siudad ti Chipre. Da Pablo, Bernabe, ken Juan Marcos ‘imbunannagda ti sao ti Dios’ iti daytoy a lugar idi dandanin mangrugi ti umuna a panagdaliasat ni Pablo kas misionero idi agarup 47 K.P. Saan a nadakamat no kasano kabayag ti panagyanda iti dayta a siudad. Nalawag nga adda dakkel a populasion dagiti Judio idiay Salamis, ta addaan dayta iti nasursurok ngem maysa a sinagoga.​—Ara 13:2-5.

Gagangay a maikunkuna a ti Salamis ket isu dagiti rebba a masarakan iti agarup 5 km (3 mi) iti amianan ti moderno a siudad ti Famagusta. Iti kasta, adda dayta iti makindaya nga ungto ti nalawa a nadam-eg a tanap, iti mismo nga amianan ti karayan a Pedias (Pediaeus). Ngarud, agarup 200 km (120 mi) iti Baybay Mediteraneo ti kaadayo ti Salamis iti laud nga abagatan-a-laud ti Seleucia, a sadiay a pimmanaw ni Pablo manipud Siria. Nupay saan nga espesipiko a dakamaten ti Biblia a simmanglad ti barko a nagluganan ni Pablo iti maysa a sasangladan idiay Salamis, addaan idi dayta a siudad iti nasayaat a sasangladan a napnon iti lan-ak iti agdama.

Agparang nga adda kalsada manipud Salamis a kumamang iti Pafo, iti bangir nga ungto ti isla. Mabalin a daytoy ti nagnaan ni Pablo ken dagiti kaduana bayat ti panangasabada iti “intero nga isla agingga idiay Pafo.”​—Ara 13:4-6.

Nalabit simmarungkar manen da Bernabe ken Juan Marcos idiay Salamis idi agarup 49 K.P.​—Ara 15:36-39.