TIMBANGAN
Alikamen a pangtimbang iti bambanag. Dagiti nagkauna a tattao pagaammoda ti simple a kakatian, wenno gagantingan. Buklen dayta ti paidda a barra, wenno kakatian, a mapagpusipos iti tengnga iti maysa a pasok wenno parteng, ket iti tunggal ungto ti kakatian adda agbibitin a sinanpinggan wenno kawit. Ti banag a matimbang naikabil iti maysa a sinanpinggan (wenno naibitin iti maysa a kawit, kas iti bassit a supot ti kuarta) ket dagiti pagaammo a padagsen naikabil iti bangir a sinanpinggan. (Jer 32:10; Isa 46:6; Ge 23:15, 16; Eze 5:1; kitaenyo ti KUARTA.) Bayat ti nakaro a bisin, uray ti taraon mabalin a siaannad a masukat iti gagantingan. Ti sisasakay iti nangisit a kabalio a nadeskribir iti Apocalipsis 6:5 adda ig-iggamanna a maysa a paris a timbangan “a pangsukat iti tinapay babaen iti panangtimbang, tapno iladawan . . . dagiti dakes a tiempo, no kaano nga agbalin a nakanginngina dagiti pagtaraon.”—The Expositor’s Greek Testament, inurnos ni W. Nicoll, 1967, Tomo V, p. 390.
Imbilin ni Jehova ti kinamapagtalkan ken kinaumiso iti panagusar kadagiti timbangan (Le 19:35, 36), ta ti nakusit a paris a timbangan nakarimrimon kenkuana. (Pr 11:1; 16:11; Eze 45:10) Mapagbalin a di umiso dagiti timbangan babaen ti di panamagpada iti kaatiddog dagiti takiag dagita, wenno mapagbalinda a saan unay nga agkir-in babaen ti panangpaababa kadagiti takiag wenno panamagbalin a napuspuskol ken nadagdagsen ti kakatian. No dadduma sikukusit a nagusar dagiti Israelita kadagiti timbangan (Os 12:7; Am 8:5), ket pinaaduda ti panangallilaw babaen ti panagusarda kadagiti di umiso a pagtimbang, maysa a kita maipaay iti panaggatang ket ti sabali maipaay iti panaglako.—Pr 20:23.
Piguratibo a natukoy dagiti timbangan, kas idi dinakamat ni Job ti ‘panangtimbang kadagiti panagrigatna kadagiti timbangan.’ (Job 6:2) Ti kinabassit ti naindagaan a tao naipaganetget babaen ti pannakaikuna a nalaglag-anda ngem iti sang-aw kadagiti timbangan (Sal 62:9), ket dagiti nasion naipadisda iti awan pategna a naingpis a tapok kadagiti timbangan manipud panangmatmat ni Jehova nga, arigna, mabagtingna ti amin a turturod kadagiti timbangan. (Isa 40:12, 15) No dadduma naaramat dagiti timbangan a pangirepresentar iti umiso a rukod iti panangukom.—Job 31:6; Da 5:27.