Nadisenio Kadi?

Ti Kudil ti Pating

● No kitkitaem laeng, kasla nalamuyot ti kudil ti pating. Ngem no adda gundawaymo a sitatalged a mangapros iti dayta, matakuatam a kasla liha gayam ti kakersangna no aprosam manipud ipus nga agpaulo.a

Usigem: Dagiti gergeran a nagbabassit a siksik a pakaigapuan ti kinakersang ti kudil ti pating ket makatulong iti dua a pamay-an. Umuna, agayus ti danum kadagita isu a naparpartak nga aglangoy ti pating. Maikadua, gapu ta nalap-it dagiti siksikna ken aggarawgaraw dagita no aglangoy, saan a makapagtalinaed dagiti parasito iti kudilna.

Adu ti pakayaplikaran dagiti natakuatan maipapan iti kudil ti pating. Kas pagarigan, nakaaramiden dagiti sientista iti swimsuit a ti makinruar a pasetna ket umasping iti kudil ti pating. Agarup tallo a porsiento a naparpartak ti panaglangoy ti mangisuot iti dayta. Patienda nga agaplikar met dagita a prinsipio iti panagaramid kadagiti naparpartak a lugan ken barangay.

Mangnamnama met dagiti managsirarak a matuladda ti kinadalus ti kudil ti pating iti panagaramidda kadagiti barangay nga addaan iti kalupkop a di kaptan dagiti mikrobio. Basbassit ngamin ti posibilidad a makadangran dayta iti aglawlaw ngem iti panagusar kadagiti aduan metal a pintura a manglapped iti panagkapet dagiti tirem ken dadduma pay nga organismo. Mayaplikar pay dayta kadagiti produkto ken alikamen a mausar kadagiti pasiente tapno makissayan dagiti risgo ti pannakayakar dagiti sakit manipud iti ospital.

Ania ti makunam? Ti kadi kudil ti pating—a makatulong iti kinaannayas ti panaglangoyna ken ti kinadalus dayta—ket naiparna laeng? Wenno nadisenio dayta?

[Footnote]

[Ladawan iti panid 10]

Napadakkel a ladawan ti siksik ti pating

[Picture Credit Lines iti panid 10]

Siksik: © Eye of Science/Photo Researchers, Inc.; pating: © Image Source/age fotostock