ULIMAW TI BAYBAY

Daytoy ti gagangay a pannakaipatarus ti Hebreo a sao a tan·ninʹ (tan·nimʹ, “ulimaw ti baybay” iti Eze 29:3 ken “ulimaw iti danum” iti Eze 32:2). Daytoy a termino ket naipatarus kas “dakkel nga uleg” no saan a nadakamat a mainaig iti baybay wenno danum (Jer 51:34) wenno no nabatad nga ipasimudaag ti konteksto nga uleg ti tuktukoyenna. (Ex 7:9, 12; idiligyo ti Ex 4:2, 3.) Di pagduaduaan a ti tan·ninʹ ramanenna ti nagduduma a kita dagiti dadakkel nga animal iti danum (Ge 1:21; Sal 148:7), ngem daytoy a termino ket gagangay a maar-aramat iti piguratibo a kaipapanan. Ti pannakadadael ni Faraon ken dagiti buyotna agparang a naiparipirip iti sasao a: “Binurakmo [Jehova] ti ul-ulo dagiti ulimaw ti baybay isuda nga adda iti dandanum.” (Sal 74:13) Iti Isaias 51:9, agparang ti “ulimaw ti baybay” a kapadpada ti Rahab (Egipto; idiligyo ti Isa 30:7) ket ngarud mabalin a tumukoy iti Egipto, wenno mabalin a ni Faraon, kas iti Ezequiel 29:3 ken 32:2. Inyimtuod ti matalek a ni Job no isu a mismo ket “ulimaw ti baybay,” a kasapulan nga adda mangguardia kenkuana.​—Job 7:12; kitaenyo ti LEVIATAN.