SALMAN

[nagtaud iti sao a kaipapananna ti “makikappia; subadan; supapakan”].

Ti nangsamsam iti balay ni Arbel a dinakamat ni Oseas idi agipadpadto maibusor iti awanan pammati a makin-amianan a pagarian ti Israel. Nupay saanen a nadakamat ni Salman wenno ni Arbel iti dadduma pay a paset ti Biblia, ipamatmat ti nadagsen a panangtukoy kadakuada ni Oseas a dayta a pasamak ket malaglagip pay laeng dagiti dumdumngeg kenkuana.​—Os 10:14.

Iti kitikit ni Tiglat-pileser III iti maysa a patakder, natukoy ti maysa a prinsipe ti Moab nga agnagan Salamanu, ngem awan ti historikal a pangibatayan iti pananginaig kenkuana iti maysa a pasamak a nasamsaman ti Israel.​—Ancient Near Eastern Texts, inurnos ni J. Pritchard, 1974, p. 282.

Gapuna, pagarupen ti kaaduan a ti Salman ket napaababa a porma ti “Salmaneser,” ti nagan ti lima nga ar-ari ti Asiria. Nalabit a ni Salmaneser V ti tao a matuktukoy ditoy, ta iti arinunos ti periodo ti panagipadto ni Oseas, rinaut ni Salmaneser V ti daga ti Israel ket linakubna ti Samaria.