KUKOD

Ti makimbaba a paset ti saka, manipud tumeng nga agpababa. Iti tunggal panagparang daytoy a sao iti Biblia, matuktukoy ti butoy ti maysa nga animal, kadawyan a mainaig kadagiti animal a naisagana a maisakripisio. (Le 1:9, 13; 4:11, 12; 8:21; 9:14) Ti Hebreo a termino a naipatarus a “kukod” ket naminsan a naaramat a tumukoy iti “paglagto a luppo” ti nagpayak nga agpangpangen a parparsua. (Le 11:21) Ti mammadto ni Jehova, iti Amos 3:12, iladawanna ti maysa a pastor a mangrabrabsut iti dua a kukod iti ngiwat ti maysa a leon (nabatad a tapno ipakitana nga awan sungsungbatanna iti pannakapukaw ti maysa a karnero kadagiti pangenna). Ditoy ti mammadto silalawag nga iladawanna ti pannakadadael a dumteng idi iti Samaria, nangnangruna kadagiti panguluen dayta. Adda sumagmamano laeng a makalapsut iti kasla leon a panangalun-on dagiti kabusor ti Samaria.