AGPANGPANGEN A BANAG

[Heb., sheʹrets].

Ti ramut a sao a nakaalaan daytoy a termino ket kaipapananna ti ‘agpangen’ wenno ‘mangpusek.’ (Ge 8:17; Ex 8:3) Ti nombre agparang nga agaplikar iti babassit a parsua a masarakan iti nakaad-adu a bilang. (Ex 8:3; Sal 105:30; idiligyo ti Ex 1:7.) Damo nga agparang iti Genesis 1:20 iti umuna nga itutuppuar dagiti sibibiag a kararua iti maikalima nga aldaw ti panamarsua idi a ti dandanum nangrugi a mamagpangen kadagiti sibibiag a kararua. Ti Layus dinadaelna ti naindagaan nga ‘agpangpangen a bambanag’ iti ruar ti daong.​—Ge 7:21.

Ti linteg maipapan iti nadalus ken narugit a bambanag ipakitana a ti termino mabalin nga agaplikar iti parparsua iti danum (Le 11:10); nagpayak a parparsua, agraman dagiti panniki ken insekto (Le 11:19-23; De 14:19); parparsua iti takdang, agraman dagiti managkibkib, alutiit, bannagaw (Le 11:29-31); kasta met ti parparsua nga aguyas kadagiti ‘tianda’ ken parparsua nga aduan iti saka (Le 11:41-44). Adu kadagitoy, ngem saan amin, ket “narugit” a pagtaraon iti sidong ti Linteg.