SEREBIAS

[mabalin a kaipapananna “Ni Jah [Nangibaon iti] Mangparkag a Pudot”].

1. Maysa a natan-ok a Levita a nagsubli a kadua ni Zorobabel idiay Jerusalem idi 537 K.K.P.​—Ne 12:1, 8.

2. Maysa a Levita a nagtaud ken Mali; “maysa a lalaki nga addaan kinamasirib” a naibilin a makikadua ken Esdras nga agdaliasat a mapan idiay Jerusalem idi 468 K.K.P. (Esd 8:17, 18) Nalabit isu met laeng ti “panguluen ti papadi” a nadakamat iti Esdras 8:24, a maysa kadagidiay nakaitalkan ti pannakaidaliasat idiay Jerusalem ti naikontribusion a napapateg a bambanag a mausar iti templo.​—Esd 8:25-30.

3. Maysa a Levita a timmulong ken Esdras iti pannakaibasa ken pannakailawlawag ti Linteg kadagiti umili a naummong idiay Jerusalem kalpasan a nabangon manen ti pader idi 455 K.K.P. (Ne 8:2, 7, 8) Idi agangay iti dayta met laeng a bulan, naguummongda manen ket karaman ni Serebias a nangisingasing iti “maysa a mapagpiaran nga urnos,” a pinasingkedan ti nasion babaen ti panangikarida nga agtalinaedda a matalek ken Jehova. (Ne 9:1, 4, 5, 38) Daytoy a Serebias ket mabalin nga isu met laeng ti Levita iti Num. 2 a nangpatalged a mismo iti tulag, wenno mabalin nga isu ti pannakabagi ti maysa a pamilia nga agnagan iti kasta, nalabit nagtaud iti Num. 1.​—Ne 10:1, 9, 12; 12:24.