SETAR-BOZENAI

Maysa nga opisial, nalabit sekretario, a kadua ni Tatenai a Persiano a gobernador “iti labes ti Karayan” bayat ti panagturay ni Dario I (Histaspis). (Esd 5:3, 6; 6:6, 13) Napan ni Setar-bozenai idiay Jerusalem a kaduana ni Tatenai ken ti sabsabali pay tapno idatagda ti panagkedkedda nga ibangon manen dagiti Judio ti templo, nga imparit ni Artaxerxes. Nupay kasta, intultuloy dagiti Judio ti nagtrabaho iti laksid dagiti reklamo bayat nga adda naaramid a report ken Dario. Da Tatenai ken Setar-bozenai ken ti kakaduana nagsuratda iti ari nga impadamagda ti madama a pannakaibangon ti templo idiay Jerusalem ket kinunada nga adda ibagbaga dagiti agibangbangon nga imbilin ken pinalubosan daytoy ni Ciro nga ari. Indawatda a mausig daytoy a banag. Iti sungbat ni Dario, binigbigna ti di mabalbaliwan a bilin ni Ciro ket imbilinna a saanda laeng nga ‘umadayo’ no di ket inkalikagumna pay, kas nadagsen a multa, nga adda namaterialan a suporta manipud iti naarian a paggamengan a maited kadagiti Judio tapno agtultuloy ti panangibangonda iti templo ken dagiti panagserbida. Daytoy a bilin ket tinungpal ni Setar-bozenai ken dagiti katimpuyogna.​—Esd 4:23–6:13.