SILOE

[Agitultulod].

Agparang a nayawag ti nagan a Siloe iti maysa a kalasugan wenno kanal idiay Jerusalem. Ti maysa a kadaanan a kanal a mangrugi iti wangawangan ti rukib ti Ubbog ti Gihon sa agpababa iti Ginget Kidron ken aglikmut iti ungto ti makin-abagatan a daya a turod agingga iti maysa a ban-aw iti nagsabtan dagiti ginget ti Hinnom ken Tyropoeon. Nabannayat ken nakain-inayad ti panagayus ti kanal gapu iti agarup 4 wenno 5 mm kada metro (nakurang a 0.2 pulgada kada yarda) a panagsalogna, maysa a kasasaad a maitunos iti “dandanum ti Siloe nga agay-ayus a siaalumamay.” Natukoy dagitoy a “dandanum ti Siloe” iti Isaias 8:6 iti piguratibo a pamay-an ken dayta ti mangirepresentar iti gubuayan ti pudpudno a pannakaisalakan ken kinatalged.