SIMEITA, DAGITI

[Ken (Kukua ni) Simei].

Dagiti kaputotan ni Simei, ti anak ni Gerson ken apoko ni Levi. (Ex 6:16, 17) Idi naaramid ti umuna a panagsensus idiay let-ang, nagdagup iti 7,500 ti bilang dagiti naipasalista a Simeita ken Libnita (“ti pampamilia dagiti Gersonita”). (Nu 3:20b-22) Nagkampo dagiti Simeita agraman dagiti Libnita “iti likudan ti tabernakulo,” kayatna a sawen, iti laud. Kas Gersonita a Levita, annongenda nga idaliasat, ipatakder, ken manteneren ti tabernakulo ken dagiti abbongna, kasta met dagiti balengbeng ti paraangan, dagiti tabing (iti pagserkan ti paraangan ken iti tolda), ken dagiti singdan ti tolda.​—Ex 26:1, 7, 14, 36; 27:9, 16; Nu 3:23-26.

Addaan ni Simei iti uppat nga annak​—da Jahat, Zina, Jeus, ken Berias. Ngem yantangay bassit ti annak da Jeus ken Berias, nagbalinda a maymaysa a “balay ti amma maipaay iti maysa a bunggoy dagiti opisial.” Nadakamat daytoy bayat ti tiempo ni David idi agparang a nagbibingayan dagitoy tallo a pamilia ti naituding a panagserbi dagiti Simeita iti tabernakulo. (1Cr 23:6, 7, 10, 11) Iti padto ni Zacarias, nadakamat ti pamilia dagiti Simeita kas karaman kadagidiay agdung-aw a sipapait gapu iti “Daydiay a dinuyokda,” maysa a padto a nainaig ken Jesus.​—Zac 12:10-13; Jn 19:37.