MARABUTIT, DAGITI

[Heb., chaphar·pa·rohthʹ].

Babassit nga animal nga utot a napino ken babassit dagiti dutdotna. Naipagarup a ti termino a naaramat iti orihinal a pagsasao ket naadaw iti sao a kaipapananna ti “agkali” (Ge 26:15), isu a kunaen ti adu nga eskolar a mabalin a tumukoy dayta iti aniaman kadagiti nadumaduma a kita ti agkutkot nga an-animal, a pakairamanan dagiti bukat, sangio, bao, jerbo, ken dagiti kaaspingda. Nupay kasta, sigun kada Koehler ken Baumgartner, ti chaphar·pa·rohthʹ ket tumukoy kadagiti “marabutit.”​—Lexicon in Veteris Testamenti Libros, Leiden, 1958, p. 322.

Dagitoy a parsua ket addaan kadagiti immatiddog a sungo, babassit a mata, ken nagtimbukel a lapayag a kasla nakuretret. Gapu ta nakarawrawet dagiti marabutit, iti agmalem kabaelanda nga ibusen ti nakaad-adu a taraon a nadagdagsen pay ngem iti timbangda. Ti kangrunaan a taraonda ket dagiti insekto ken igges, nupay mangmanganda met iti babassit nga animal a kadakdakkelda wenno daddadakkel pay, a kas kadagiti utot. Ti kita ti marabutit a nadakamat iti Isaias 2:20 ket tinukoy ni I. Aharoni kas Crocidura religiosa.​—Osiris, ni Brugge, 1938, Tomo 5, p. 463.