FEATURE
Dagiti Kongregasion iti Apocalipsis
MAPA: Dagiti Kongregasion iti Apocalipsis
IDI arinunos ti umuna a siglo K.P., iti makatukay unay a pamay-an impakita ni napagungar a Jesu-Kristo ti napalaus a panaginteres kadagiti napulotan a pasurotna nga adda pay laeng ditoy daga. Kasano? Babaen ti panangbilinna ken lakayen nga apostol Juan a mangisurat iti sursurat agpaay “iti pito a kongregasion nga adda [idi] iti distrito ti Asia.” (Apo 1:1-4) Dagidiay a surat naglaonda iti kasapulan unay a pammaregta, balakad, ken pakdaar.
Ita, rebrebba laengen ti masarakan kadagiti disso ti kaaduan kadagiti siudad nga ayan idi dagidiay a kongregasion. Nupay kasta, mangipaay dagitoy iti pammaneknek a ti naisurat tukoyenna dagiti agpaypayso a lugar, aktual a kasasaad, ken tattao a pudno a nagbiag. Nupay kasta, ti ad-adda pay a makapainteres isu ti kinapudno a dagitoy a mensahe impatuldoda dagiti kasasaad a tumanor iti masanguanan a tiempo iti kongregasion Kristiano.
Rebrebba ti Efeso. Ti sumagmamano a Kristiano iti daytoy materialistiko a siudad napukawda ti panagayat ken Jehova nga adda kadakuada idi damo
Nabangon manen nga altar agpaay ken Zeus manipud Pergamo. Nasubok dagiti Kristiano idiay Pergamo no maipapan iti naipamaysa a panagdaydayaw ken Jehova
Smirna (maaw-awagan itan iti Izmir). Naidagadag kadagiti immuna a Kristiano ditoy a saanda nga agbuteng nupay naipisokda iti pagbaludan. Naidagadag met kadagidiay adda idiay Filadelfia (iti pangrugian ti maysa nga atiddog a ginget nga agpalaud iti Smirna) nga itultuloyda a salimetmetan a sititibker ti adda kadakuada nupay nakapagibturdan
Tiatira (maaw-awagan itan iti Akhisar). Ti sumagmamano a nagkauna a Kristiano idiay Tiatira, nupay makipaspasetda iti naimbag nga ar-aramid, simamaag a nakiramanda iti imoral a kababalin
Sardis. Saan amin a Kristiano ditoy ket pudno a sibibiagda iti naespirituan
Laodicea. Natubngar dagiti Kristiano iti daytoy a siudad gapu iti kinaapaganem-em, kas iti danum a dimmanon iti siudad babaen iti kalasuganna