SMIRNA

[Mirra].

Kadaanan a siudad iti makinlaud nga igid ti baybay ti Asia Menor; maaw-awagan ita iti Izmir. (LADAWAN, Tomo 2, p. 946) Dagiti Griego ti immun-una a nagnaed sadiay ngem dinadael dayta ni Ari Alyattes ti Lidia idi agarup 580 K.K.P. Kalpasan ti nasurok a dua a siglo, implano ni Alejandro a Dakkel a bangonen manen dayta kas maysa a siudad ti Grecia, nupay dagiti nangsuno kenkuana ti nangaramid iti dayta iti sabali a disso. Kalpasan dayta, ti Smirna ket nagbalin a napateg a siudad ti komersio. Idi nagbalin ti Smirna kas paset ti Asia a probinsia ti Roma, nagdindinamag ti kinapintasna gapu kadagiti nagsasayaat a publiko a patpatakderna. Addaan dayta iti templo ni Tiberio Cesar ket ngarud intandudona ti panagdaydayaw iti emperador.

Maikadua ti Smirna kadagiti pito a kongregasion Kristiano idiay Asia Menor nga imbilin ti naipadayag a ni Jesu-Kristo a suratan ni apostol Juan. (Apo 1:11) Naikuna a ti kongregasion sadiay ket napanglaw iti material ngem nabaknang iti naespirituan. Nasubok ti pammatida babaen ti pannakaidadanes, ken tinabbaawan ida ti sumagmamano nga agkunkuna a Judio, ngem iti kinapudnona “sinagoga ida ni Satanas.” Nupay kasta, iti laksid ti kinakurapay ken rigatda, naparegta dagiti Kristiano iti kongregasion idiay Smirna a saanda a pagbutngan ti bambanag a sagabaendanto no di ket agbalinda a “matalek uray agingga ken patay” tapno awatenda “ti korona ti biag.”​—Apo 2:8-11.