SISTRUM

Ti Hebreo a sao a mena·ʽan·ʽimʹ (dagiti sistrum) maminsan laeng nga agparang iti Kasuratan ken kasla naadaw iti sao a kaipapananna ti “agkuyegyeg,” kayatna a sawen, agsublisubli. (2Sm 6:5) Yantangay kasta ti naisangsangayan a pannakatokar ti sistrum, a kasla maysa a kalangiking ti musika, anamongan ti adu a leksikograpo ken historiador ti musika daytoy a patarus, nga isu ti inaramat met ti sumagmamano a managipatarus iti Biblia.​—Da; NW; Ro; Vg.

Ti sistrum gagangay a buklen ti bassit nga arinduyog a baskag a naaramid iti metal ken addaan iti pangiggaman. Nagduduma ti kaatiddog ti kompleto a pagtokar manipud agarup 20 agingga iti 46 cm (8 agingga iti 18 pul.), sigun kadagiti adda pay laeng a kadaanan a kita ti sistrum kasta met kadagiti ladawan ti Egipto ken dadduma pay a ladladawan a mangipakpakita iti napalabas. Adda sumagmamano a naibaribar a metal nga agkalogkalog a naikapet iti baskag, a no makuyegyeg, mangpataud kadagiti nasinggit, agkalangiking nga uni. Mabalin a nadumaduma ti kaatiddog dagiti metal tapno makapataudda kadagiti natukantukad a tono. Ti sabali pay a kita ti sistrum ket addaan kadagiti singsing iti pabaribar a metal, ket agkalangiking dagitoy a singsing no makuyegyeg. Nupay ti kakaisuna a panagparangna iti Biblia ket nainaig iti pannakaisalaysay ti maysa a dakkel a rambak, sigun kadagiti nabayagen a patpatien dagiti Judio, naaramat met ti sistrum kadagiti naladingit nga okasion.