PANGARSANG

Nabalitokan a ramramit a naaramat maipaay kadagiti pagsilawan nga adda iti sangsanga ti pagsaadan ti silaw iti tabernakulo ken dagiti pagsaadan ti silaw iti templo ti Israel. (Ex 25:37, 38; 37:23; Nu 4:9; 1Ar 7:48, 49; 2Cr 4:19-21) Natukoy dagiti pangarsang babaen iti Hebreo a sao a mel·qa·chaʹyim, maysa a porma ti sao a sangaparis ti ipasimudaagna, a naadaw iti sao a kaipapananna ti “alaen.” Ti pannakaaramat daytoy a porma ti sao ipasimudaagna ti maysa nga alikamen a nalabit addaan nagparis a paset. Gapuna, iti Isaias 6:6 ti mel·qa·chaʹyim tumukoy “kadagiti sipit” nga inaramat ti maysa a serafin a pangikkat iti maysa a narangrang a beggang manipud iti altar.

Napagduma “dagiti pangarsang” ti pagsaadan ti silaw ken “dagiti pagiddep” a naaramat iti templo. (1Ar 7:49, 50; 2Cr 4:21, 22) Nupay dagiti pangarsang ket saan a nadeskribir iti Kasuratan, nalabit dagitoy ket sipsipit a nausar a pangipit kadagiti simged a pabilo dagiti pagsilawan, idinto ta dagiti pagiddep mabalin a kasla getteng a naaramat a panggeppeng kadagiti simged a paset dagiti pabilo. Iti tabernakulo, dagiti nagputdan nga inipit dagiti pangarsang ket naikabil kadagiti pagikkan iti apuy, nalawag a dagitoy ket pagkargaan a naaramat a pangikabilan kadagitoy a nagputdan sakbay a maibelleng dagitoy.​—Ex 37:23.