ALLID

Nalawag a ti allid a matuktukoy iti Biblia isu ti allid ti uyokan, nalidem a duyaw a sangkap nga us-usaren dagiti uyokan iti panangporma kadagiti diding ti silsiled ti rara a pagikabilanda iti diro wenno larva. Ti allid ket patpatauden dagiti trabahador nga uyokan; dagiti naisangsangayan a glandula kadagiti buksitda ti pangaramidanda iti allid kalpasan a makapanganda iti nakaad-adu a diro. Mairuar ti allid babaen kadagiti babassit nga abut ket mabukel kas babassit a puraw a sinansiksik iti ruar ti buksit. Kalpasanna, dagiti sinansiksik ti allid mayakarda iti ngiwat ti uyokan, a pakangalngalan dagita sakbay a mausar iti panagaramid iti rara. Ti uyokan mamedmedanna ti panagpataud iti allid ket agaramid laeng iti dayta no kasapulan ti abasto.​—Kitaenyo ti UYOKAN.

Ti allid nalaka a maisina iti diro babaen ti pananglunag iti dayta iti nabara a danum. Daytoy ti mangpatapaw iti allid, a kalpasanna maagsaw dayta. Ti panaglunag ti allid ket nausar kadagiti nadaniw a pangngarig iti Kasuratan a pangyebkas iti nariribuk a kasasaad ti puso (Sal 22:14), pannakarunaw dagiti bantay ken dagiti tanap (Sal 97:5; Mik 1:4), ken pannakadadael dagiti kabusor ti Dios; inyebkas ti salmista: “Kas iti pannakalunag ti allid gapu iti apuy, mapukaw koma dagidiay nadangkes manipud sanguanan ti Dios.”​—Sal 68:1, 2.