PANAGSANGIT
Panangipeksa iti nasaem a rikna (kas iti panagladingit) babaen ti panaglua dagiti mata. Agpadpada a nagsangit dagiti lallaki ken babbai idi nagkauna a tiempo, pakairamanan dagiti maingel a mannakigubat a kas ken David, a saan a maibilang dayta kas pakakitaan ti kinakapuy. (Ge 42:24; 43:30; 45:2, 3, 14, 15; 46:29; Ru 1:9, 14; 2Sm 13:36; Job 30:25; Sal 6:6-8) Ti ipapatay ti maysa nga ay-ayaten wenno gayyem ket maysa kadagiti kangrunaan a makagapu iti panagsangit. (2Sm 18:33–19:4; Lu 7:11-15; 8:49-56; Jn 20:11-15) Ket ti ipapatay dagiti mararaem ken dungdungnguen a tattao ti mabalin a pakaigapuan ti panagsangit ti nasion (2Sm 3:31-34), a no dadduma napaut a tiempo ti nabusbos iti kasta a panangipeksa iti ladingit. (Ge 50:1-3, 10, 11; Nu 20:29; De 34:8) Ti dadduma pay a kasasaad a nakaigapuan ti panagsangit ket ti pannakaabak iti gubat (De 1:44, 45; Jer 31:15; Un 1:16), pannakakautibo (Sal 137:1), pannakairurumen (Ec 4:1), dakkel a didigra (Est 3:13, 14; 4:1-4), ken nasaem a panagladingit gapu iti basol (Esd 10:1-4; Jer 3:21, 22; 31:9; Joe 2:12; Lu 22:54-62; San 4:8, 9; kitaenyo ti PANAGLEDDAANG). Ti panagsangit iti narelihiosuan a seremonia ket nainaig iti panagdaydayaw iti dios ti Babilonia a ni Tammuz.—Eze 8:14.
Malaksid ti rikna a napukawan wenno panagsagaba, masansan a ti sabali pay a pakaigapuan ti panagsangit ket ti napalalo a pannakaseknan ken nasged a pannakipagrikna iti sabsabali. Gapuna, tinukoy ni apostol Pablo ti panangbagbaga ken panangilintegna kadagiti kapammatianna buyogen ti lulua. (Ara 20:31; 2Co 2:4) Buyogen ti panagsangit, dinakamatna dagidiay “magmagna kas kabkabusor ti kayo a pagtutuokan ni Kristo.” (Fil 3:18, 19) Ket gapu iti nasinged a singgalut ti ayat iti nagbaetan da Pablo ken dagiti manangaywan iti kongregasion ti Efeso, nagsangitda amin apaman a naammuanda a posible a saandanton a makita ti rupa ti apostol.—Ara 20:36-38.
Adda dagiti gundaway a nagsangit dagiti managdaydayaw ken Jehova bayat nga agkarkararagda, kas kada Anna, Ezekias, ken Nehemias. (1Sm 1:9-11; 2Ar 20:1-5; Ne 1:2-4; Sal 39:12) Uray idi adda ni Jesu-Kristo ditoy daga, immar-araraw ken nagdawdawat iti Amana “buyogen dagiti napigsa nga ikkis ken lulua.”—Heb 5:7.