ZEUS
Ti katan-okan a dios dagiti Griego nga agdaydayaw iti adu a didios; katupag ni Jupiter a dios dagiti Romano. Ni Zeus ket dios ti tangatang ken maibilang nga adda turayna kadagiti angin, ulep, tudo, ken gurruod, a ti pannakabalinna kadagitoy a puersa ti nakaparsuaan aramatenna tapno mangdadael ken tapno manggunggona. Ti dumadaniw a ni Homer (The Iliad, VIII, 1-25) iti nagkauna a tiempo deskribirenna ni Zeus kas dakdakkel ti bilegna ngem iti amin a didios no mapagtitipon dagitoy. Nupay kasta, ni Zeus ket saan a naibilang a katan-okan iti naan-anay a kaipapanan. No dadduma, nailadawan kas biktima ti panangallilaw, ken kasapulan a tumulok iti pagayatan dagiti Gasat ken Keddeng.
Malaksid iti pannakaisalaysay dagiti pasamak ti pannakaipasngay, panagubing, ken pananggun-odna iti trono, kangrunaanna a ti adu a pannakiayan-ayat ni Zeus ti isalsalaysay dagiti sariugma. Ibaga dagiti salaysay iti mitolohia ti maipapan iti panangsulisogna kadagiti diosa ken kasta met kadagiti babbai ditoy daga ken iti panagiputotna iti nakaad-adu a bastardo nga annak. Ngem maisupadi iti dayta, naisalaysay a ni Zeus pinatayna ni Iasion (maysa a mortal) agsipud ta nakaaramid iti imoralidad iti diosa a ni Demeter. Ti panagasawa da Zeus ken Hera, malaksid iti pannakadadael dayta gapu iti adu a di kinamatalek iti biang ni Zeus, ket napno iti dadduma pay a pakariribukan. Naikuna a napalalo ti pannakaparigat ni Zeus gapu iti awan sardayna a panangung-unget ni Hera nga asawana, iti kasta adda idi gundaway a sipapait nga inreklamona daytoy iti sanguanan dagiti naguummong a didiosen.
Masansan a ti nasin-aw a panagdaydayaw ken Jehova ket direkta a nakibinnusor iti panagdaydayaw iti ulbod a dios a ni Zeus. Ni Ari Antiochus IV (Epiphanes), iti pananggandatna a mangikisap iti Judio a relihion, imbilinna a matabbaawan ti templo idiay Jerusalem ket mabaliwan a maidedikar ken Zeus ti Olympus. Kitaenyo ti Apokripa a libro ti 2 Macabeo 6:1, 2.
Idi umuna a siglo K.P., apaman a nakita dagiti umili iti Listra a ni Pablo pinaimbagna ti maysa a pilay a lalaki, imbilangda da Pablo ken Bernabe a kas didios, nga imbagada a ni Pablo isu ni Hermes ket ni Bernabe isu ni Zeus. Ti padi ni Zeus nangyeg pay kadagiti toro ken kadagiti arkos a balangat tapno mangidaton kadagiti sakripisio a kaduana ti bunggoy. (Ara 14:8-13) Ti dua a kadaanan a kitikit a nasarakan idi 1909 iti asideg ti Listra pasingkedanda ti panagdaydayaw kadagitoy dua a didios iti dayta a siudad. Ti maysa kadagiti kitikit tukoyenna ti “papadi ni Zeus,” ket ti sabali pay dakamatenna ni “Hermes a Katan-okan” ken ni “Zeus a dios-init.”—The International Standard Bible Encyclopaedia, inurnos ni J. Orr, 1960, Tomo III, p. 1944.
Ti barko a nagluganan ni Pablo kas maysa a balud ken naglayag manipud isla ti Malta ket addaan iti parupa a tanda nga “Annak ni Zeus,” kayatna a sawen, ti singin a da Castor ken Pollux.—Ara 28:11.