ZIMRI

1. Anak ni Zera ken apoko ni Juda.​—1Cr 2:4, 6.

2. Ti Simeonita a panguluen, anak ni Salu, a nangiserrek iti pakarso ti Israel ken Cozbi a Midianita, iti kasta nakiabig iti dayta a babai iti mismo a toldana. Gapu itoy, inanamongan ni Jehova ti panangpapatay ni Finehas kada Zimri ken Cozbi. Daytoy nga insigida a tignay ti namagpatingga iti pannaplit a nakaigapuan ti ipapatay ti rinibu a nakabasol nga Israelita.​—Nu 25:6-8, 14-18.

3. Ti maikalima nga ari ti sangapulo-tribu a pagarian ti Israel. Nagturay ni Zimri idiay Tirza iti pito nga aldaw idi agarup 951 K.K.P. Sigud a panguluen ti kagudua dagiti kumakaruahe iti buyot ni Ari Elah. Ngem idi adda idiay Gibbeton ti buyot ken saan a kimmuyog ni Ari Elah, isu pinapatay ni Zimri ken ti amin a dadduma pay a kameng ti sangakabbalayan ni Baasa ket pinagbalinna ti bagina kas ari. Apagbiit ti panagturayna agsipud ta ti buyot pinagbalinda ni Omri kas ari ken madagdagus a nagsubli tapno lakubenna ti Tirza. Gapu iti dayta, pinuoran ni Zimri ti balay ti ari bayat nga adda iti uneg. Pagaammo nga inaramid ni Zimri no ania ti dakes kadagiti mata ni Jehova. (1Ar 16:3, 4, 9-20) Ipalagip ti maudi a sasao ni Jezebel ti napagteng ken Zimri. Idi sibaballigi a nakagteng ni Jehu idiay Jezrael, rinurod isuna ni Jezebel manipud iti tawa: “Naimbag kadi ti kasasaad ni Zimri a mammapatay iti apona?”​—2Ar 9:30, 31.

4. Maysa a kaputotan da Saul ken Jonatan. (1Cr 8:33-36; 9:42) Naikuna a mabalin nga isu met laeng ti Num. 3; posible ngamin a daytoy a Zimri (Num. 3) ti nangikagumaan a mangbawi iti kinaari kas kameng ti sangakabbalayan ni Saul.

5. Nabatad a maysa a lugar a saan nga ammo ti ayanna; no dadduma nainaig dayta iti anak ni Abraham a ni Zimran, ngem awan ti natibker a pammaneknek.​—Jer 25:25; Ge 25:1, 2.