Apay Rebbeng a Kasta?
APAY a ti kina-awan hustisia ti nakasaksaknap? Dua a kasuratan iti Biblia ti makatulong a mangsungbat iti dayta a saludsod kadatayo. Ti umuna ket Jeremias kapitulo 10, bersikulo 23, ket daytoy ti kunana:
“Ti dalan ti tao saan nga agtaud kenkuana met laeng. Saan nga agtaud iti tao a magna iti panangiturong kadagiti addangna.”
Ipamatmat daytoy a ti tao ket saan a nakabalan a mangituray iti bagina met laeng. Apay? Umuna, agsipud ta naikasigudan ti panagbasolna. Kuna a mismo ti Dios: “Ti darepdep ti puso ti tao dakes manipud iti kinaubingna.” (Genesis 8:21) Gapuna ti linlinteg ken kustombre dagiti tattao ti mangtagtaginayon ti amin a kita ti kinaulpit. Kas pangarigan, adu ti kaykayatda a sabidongan ti bagbagida babaen ti sigarilio wenno ti panagaramid kadagiti ig-igam iti panawen ti law-ang a maipaay iti reprep a panangdadael imbes ketdi a mangted iti nadalus, presko a danum wenno nawadwad a taraon nga agpaay kadagidiay agkasapulan.
Ti tao agkurang met ti supisiente a kinasirib. Gapuna, iti kaso ni Roy, dagiti linlinteg a nairanta a nainkalintegan ti mabalin nga agturong kadagiti nakaro a kinaulpit. Numan pay adu nga indibidual ken organisasion ti agtrabaho a sipipinget tapno makaiyegda iti kinahustisia iti salun-at, ti pannakaiwaras ti taraon ken kadagiti kasasaad ti ekonomia, saanda a kabaelan dayta. Iti adu a kaso, talaga a dida ammo no kasanot’ panangaramid iti dayta.
Ti kinapudnona ket, ti tao di nairanta a “mangiturong,” wenno mangituray, iti bagbagina iti naan-anay nga autonomia, wenno panagwaywayas. Isut’ nairanta nga iturayan ti nangatngato a pannakabalin, babaen ti Dios. Ket yantangay, babaen iti historia, kaaduan a tattao linaksidda ti panangituray ti Dios, iti sabali pay a mannnakabalin a puersa ti espiritu ti bimmallaet a mangimpluensia kadakuada. Daytoy nga espiritu ti tuktukoyen ti maikadua a kasuratan a makatulong a mangilawlawag iti kaadda ti kinaulpit itatta. Kunana:
“Ti isuamin a lubong adda iti babaen ti maysa a managdakdakes.”
Dagitoy ti sasao ni apostol Juan. (1 Juan 5:19) Asino “ti maysa a managdakdakes”? Apay, ni Satanas a Diablo, nga isut’ maaw-awagan met “ti dios daytoy a sistema dagiti bambanag.” (2 Corinto 4:4) Ni Satanas ken dagiti demoniona ti ad-adda a napigpigsada ngem kadatayo. Bassit interesda a makitada nga agtalinaed ti kinahustisia. Kinapudnona, bayat ti kina-adda ti kinaulpit, dagiti tattao mariribukanda ken maiyadayoda manipud panangsapul iti Dios, ken dadduma pabasolenda pay ti Dios kadagiti kinaulpit. Gapuna, ti kinaulpit serserbianna a naimbag ti pangpanggep ni Satanas.
Kunaen ti Biblia kadatayo: “Ta ni Jehova ayatenna ti kinalinteg, ket dina baybay-an dagiti nasungdo kenkuana.” (Salmo 37:28) Apay, ngarud, a pinalubosanna ti tao nga iturayan ti bagbagina ket immay iti impluensia ni Satanas, ket iti kasta nagsagaba iti adu unay a kinaulpit ken dadduma pay a kinadakes? Ti sumaganad nga artikulo ti mangisalaysay iti daytoy.