Maysa a “Naisangsangayan a Teritoria”
ADU a Kristiano nga agtutubo ti nangala iti panangmatmat a ti eskuelaan isu ti “naisangsangayan a teritoria,” ket sisisiputda kadagiti gundaway a mangipaay iti pammaneknek agpadpada kadagiti mannursuro ken dagiti kaklaseda. Paliiwenyo ti nagsayaatan a nagun-odan ni Susan, maysa a 13-años nga ubing a babai idiay Canada.
“Idi Disiembre kinalikaguman ti mannursuro ti klase a mangisurat iti maysa nga etoria iti Krismas a maipaay iti ‘creative writing.’ Pinilik ti tema a ‘Maysa a Report maipapan iti Nagtaudan iti Krismas.’ Babaen iti panangusarko iti ensiklopedia ti eskuelaan ken dagiti artikulo iti Agriingkayo! a maipaay a reperensia, nabaelak ti nangisurat iti napno ti impormasion a report.” Ania ti impagarup ti mannursuro iti dayta?
“Iti pagnguduan ti reportko ti mannursuro ti nangaramid itoy a komento: ‘Nagsayaatan ti pannakaisuratna, Susan! Dayawek ti kinapudnom ket raemek ti pammatim. Babaen iti kinamanagpanunotmo ken pannakaawatmo, kankanayonto a mararaemka. Inanamaek nga iti masanguanan taginayonemto dagiti madaydayaw a kababalin nga ik-ikutam ita. Kas pangserra, makabang-ar ken makagunggona ti agbasa wenno makisarita iti maysa a kaedadmo a nakapataud iti kinatibker iti pammatina.’
“Kalpasan ti panangbasana a mismo iti report, impabasana kadagiti amin a kameng a mannursuro iti kuarto. Gapuna aminda nakaawat iti pammaneknek! Daytoy ti mangted iti tured ken determinasion kaniak nga agsao maipapan iti kinapudno ti Biblia kadagiti dadduma iti eskuelaan.
“Siempre, amin dagiti kaeskuelaak ammoda a maysaak a Saksi ni Jehova, ket, idi naammuanda no ania ti insuratko, tarigagayenda met a basaen ti reportko. Kasla, interesadoda unay ta dinakamatko nga itugotak ti tunggal maysa kadakuada iti maysa nga isyu ti Agriingkayo! nga addaan ti artikulo a mangtaming iti Krismas. Dayta ti Mayo 22, 1980, a ruar, ket addaan met iti artikulo maipapan iti ’disco.’
“Idi intugotko dagiti kopia dayta nga isyu iti Angriingkayo! idiay eskuelaan, dagiti dadduma pay idiay klase ti nakakita pay kadakuada ket nagkalikagumda met iti kopia. Nangipakitada iti kasta unay nga interes iti artikulo maipapan iti ‘disco’ ta inkeddengko ti mangitugot iti saggagaysada a kopia iti Agosto 22, 1979, nga Agriingkayo! isu nga addaan kadagiti serie dagiti artikulo maipapan iti dayta a tema. Kas banagna, nakapaimaak iti 26 a magasin kadagiti padak nga estudiante.
“Iti naud-udi pay nga okasion, idi impabuya ti nars iti eskuelaanmi ti maysa a pelikkula maipapan iti panangparang-ay iti personalidad, intugotak ti sumagmamano nga estudiante ti saggaysa a kopia iti libro a Ti Kinaagtutuboyo—Pananggun-od ti Kasayaatan iti Dayta. Imbagak kadakuada a daytoy a libro ti pudno a nakatulong kaniak a makaawat kadagiti panagbalbaliw ken parparikut a mainaig iti panagdakkel.
“Naminsan manen, idi a dadduma iti klasek ti nakakita kadagitoy a babbai a mangbasbasa ken pagsasaritaanda ti libro, inimtuodda no mabalinda ti maaddaan met iti kopia—uray met ti dadduma a lallaki. Gapuna, iti nakagupgopan, nakaipaimaak iti 17 a libro nga Agtutubo iti dayta nga okasion. . . .
“Iti sabali manen nga okasion maysa a babai iti eskuelaan ti nangibaga kaniak nga isu ti nagatender iti Sunday school ket binasana ti Biblia, ngem dina naawatan. Imbagak kenkuana nga addaanak iti Biblia a nalaka a basaen ket maragsakanak a mangitugot ti maysa a maipaay kenkuana. Saanko laeng nga intugotan iti New World Translation no di ket intugotak pay iti Ti Librok dagiti Estoria ti Biblia ket impakitak kenkuana no kasano a daytoy a libro ti pudno a mangtulong kenkuana nga umawat iti Biblia. Isut’ maragsakan iti dayta.”
Kasano ti panagrikna ni Susan maipapan iti panangasaba idiay eskualaan? “Pudno a tagtagiragsakek ti panangasaba kadagiti gagayyemko idiay eskuelaan ket ibilangko dayta a maysa a pribilehio a maaddaan iti daytoy a naisangsangyan a teritoria.”
Ages-eskuelakayo kadi? Apay a dikay gundawayan ti “naisangsangayan a teritoriayo”?