Dakayo nga Agtutubo​—Saan a Lipaten ni Jehova ti Aramidyo!

“Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna, ta nagserbikayo kadagiti sasanto ken agtultuloykayo nga agserbi.”​—HEBREO 6:10.

1. Kasano nga ipakita dagiti libro ti Biblia a Hebreo ken Malakias nga ipateg ni Jehova ti panagserbim?

ADDA kadi naimbag a banag nga inaramidmo iti maysa a gayyemmo ngem di man la nagyaman? Makasair unay iti puso no matagilag-an ti maysa a naimbag nga aramid, wenno nakarkaro pay, no naan-anay a malipatan dayta. Ngem anian a naiduma no mangipaaytayo iti naimpusuan a panagserbi ken ni Jehova! Kuna ti Biblia: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna, ta nagserbikayo kadagiti sasanto ken agtultuloykayo nga agserbi.” (Hebreo 6:10) Panunotem ti kaipapanan daytoy. Ibilang ni Jehova a kinakillo iti pasetna​—maysa a basol​—no lipatenna ti naaramidam ken ti agdama nga ar-aramidem a panagserbi kenkuana. Anian a manangipateg a Dios!​—Malakias 3:10.

2. Apay a pudno a naisangsangayan ti agserbi ken ni Jehova?

² Adda naisangsangayan a pribilehiom nga agdayaw ken agserbi iti daytoy a manangipateg a Dios. Yantangay adda laeng agarup innem a milion a kakaduam nga agdaydayaw no idilig iti agarup innem a bilion a tattao iti sangalubongan, talaga a naisangsangayan ti pribilehiom. Maysa pay, gapu ta ipangpangag ken agtigtignayka iti mensahe ti naimbag a damag, pammaneknek dayta a personal a maseknan ni Jehova kenka. Kinapudnona, kinuna ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.” (Juan 6:44) Wen, tulongan ni Jehova dagiti indibidual a tattao tapno maaprobetsarda dagiti gunggona ti sakripisio ni Kristo.

Panangapresiar iti Naindaklan a Pribilehiom

3. Kasano nga inyebkas dagiti annak ni Kore ti apresasionda iti pribilehio nga agserbi ken ni Jehova?

³ Kas nausig iti immuna nga artikulo, addaanka iti naisangsangayan a gundaway a mangparagsak iti puso ni Jehova. (Proverbio 27:11) Dimo laglag-anen dayta a banag. Iti maysa kadagiti naipaltiing a salmo, inyebkas dagiti annak ni Kore ti apresasionda iti pribilehio nga agserbi ken ni Jehova. Mabasatayo: “Ti maysa nga aldaw kadagiti paraanganmo nasaysayaat ngem ti sangaribu iti sadinoman. Pinilik ti agtakder iti arsadanan iti balay ti Diosko imbes nga agsursor kadagiti tolda ti kinadangkes.”​—Salmo 84:10.

4. (a) Apay a mabalin a matmatan ti dadduma a makedngan ti wayawayada no agdayawda ken ni Jehova? (b) Iti ania a pamay-an nga ipakita ni Jehova a magagaran a kumita ken manggunggona kadagiti adipenna?

⁴ Kasta kadi ti panagriknam iti pribilehiom nga agserbi iti nailangitan nga Amam? Aminentayo a no dadduma, kasla makedngan ti wayawayam gapu iti panagserbim ken ni Jehova. Pudno a ti panagbiag maitunos kadagiti prinsipio ti Biblia kalikagumanna ti panagsakripisio. Ngem makitamto a pagimbagam ti aniaman a kalikaguman ni Jehova kenka. (Salmo 1:1-3) Kanayonanna, makita ni Jehova dagiti panagreggetmo ket paneknekanna ti panangipategna iti kinamatalekmo. Kinapudnona, insurat ni Pablo a ni Jehova “agbalin a mananggunggona kadagidiay sipapasnek a mangsapsapul kenkuana.” (Hebreo 11:6) Sapsapulen ni Jehova dagiti gundaway a maipakitana dayta. Kinuna ti maysa a nalinteg a propeta iti nagkauna nga Israel: “No maipapan ken Jehova, mapan nga agsublisubli dagiti matana iti intero a daga tapno ipakitana ti pigsana maigapu kadagidiay a ti pusoda naan-anay kenkuana.”​—2 Cronicas 16:9.

5. (a) Ania ti maysa kadagiti kasayaatan a pamay-an a maipakitam a naan-anay a naiturong ti pusom ken ni Jehova? (b) Apay a kasla narigat nga isarita kadagiti dadduma ti maipapan iti pammatim?

⁵ Maysa kadagiti kasayaatan a pamay-an a maipakitam a naan-anay a naiturong ti pusom ken ni Jehova isu ti panangisaritam kadagiti dadduma ti maipapan kenkuana. Pinadasmo kadin ti nakisarita kadagiti kaeskuelaam maipapan iti pammatim? No damo, kasla mabainka a mangaramid iti dayta, ken medio maamakka uray panunotem la dayta. ‘No ngay katawaandak?’ mabalin a mayimtuodmo. ‘No ngay panunotenda a karkarna ti relihionko?’ Binigbig ni Jesus a saan nga amin ket dumngeg iti mensahe ti Pagarian. (Juan 15:20) Ngem dina kayat a sawen a kanayonto lattan a maum-umsi ken mayaleng-alengka. Iti kasumbangirna, adu nga agtutubo a Saksi ti nakasarak kadagiti sidadaan nga umimdeng ken nagun-odda pay ketdi ti ad-adda a panagraem dagiti kapatadanda babaen ti panangsalimetmetda kadagiti patpatienda.

“Tulongannaka ni Jehova”

6, 7. (a) Kasano a nakasabaan ti maysa a 17 ti tawenna a balasang dagiti kaklasena? (b) Ania ti naadalmo iti kapadasan ni Jennifer?

⁶ Ngem kasano a situtured a maipakaammom ti pammatim? Apay a dimo padasen ti agbalin a napudno ken prangka no agsaludsod dagiti tattao maipapan iti relihionmo? Usigem ti kapadasan ti 17 ti tawenna a ni Jennifer. “Pangngaldaw idi idiay eskuelaan. Nairana a relihion ti pagsasaritaan dagiti babbai a kakaduak iti lamisaan, ket maysa kadakuada ti nagsaludsod no ania ti relihionko,” kunana. Nagnerbios kadi a simmungbat ni Jennifer? “Wen,” inaminna, “gapu ta diak ammo no anianto ti reaksionda.” Ania ngarud ti inaramid ni Jennifer? “Imbagak kadakuada a maysaak kadagiti Saksi ni Jehova,” intuloyna. “Idi damo, kasla naklaatda. Ipagarupda a karkarna a tattao dagiti Saksi ni Jehova. Daytoy ti nangtignay kadakuada nga agsaludsod kaniak, ket nabaelak a linawlawagan ti dadduma a di umiso a kapanunotanda. Uray kalpasan dayta nga aldaw, pasaray agsaludsod kaniak ti dadduma kadakuada.”

⁷ Pinagbabawyan kadi ni Jennifer ti panangisaritana kadagiti patpatienna? Pulos a saan! “Naragsak ti panagriknak kalpasan ti pangngaldaw,” kunana. “Ita, umison ti kapanunotan dagidi a babbai no siasino a talaga dagiti Saksi ni Jehova.” Simple laeng ita ti balakad ni Jennifer: “No marigatanka a mangasaba kadagiti kaklasem wenno mannursurom, agkararag a dagus iti ababa. Tulongannaka ni Jehova. Maragsakankanto a nangaprobetsar iti gundawaymo a mangasaba.”​—1 Pedro 3:15.

8. (a) Kasano a nakatulong ken ni Nehemias ti kararag idi naipasango iti di ninamnama a kasasaad? (b) Ania ti dadduma a kasasaad idiay eskuelaan a nalabit kasapulam ti agkararag ken ni Jehova iti ababa ken naulimek?

⁸ Imutektekam ta insingasing ni Jennifer nga “agkararag a dagus iti ababa” ken ni Jehova no tumaud ti gundaway a mabalinmo nga ikasaba ti pammatim. Nalawag a kasta ti inaramid ni Nehemias, ti agaw-awit iti kopa ni Ari Artaxerxes ti Persia, idi naipasango iti di ninamnama a kasasaad. Nabatad a nariribukan ni Nehemias gapu ta nadamagna ti kasasaad dagiti Judio ken naammuanna a nadadael ti pader ken ruangan ti Jerusalem. Nadlaw ti ari a madanagan ni Nehemias, isu nga inimtuodna no ania ti parikut ni Nehemias. Sakbay a simmungbat, nagkararag ni Nehemias maipaay iti panangiwanwan. Kalpasanna, situtured a kiniddawna ti pammalubos nga agsubli idiay Jerusalem tapno tumulong a mangbangon manen iti nadadael a siudad. Pinatgan ni Artaxerxes ti kiddaw ni Nehemias. (Nehemias 2:1-8) Ti leksion? No agnerbioska no tumaud ti gundaway a mangisarita iti pammatim, dimo liwayan ti agkararag iti naulimek. “Iyallatiwyo [ken ni Jehova] ti isuamin a pakaringgoranyo,” insurat ni Pedro, “agsipud ta isu maseknan kadakayo.”​—1 Pedro 5:7; Salmo 55:22.

“Sisasagana a Mangikalintegan”

9. Kasano a ti agtawen iti 13 a ni Leah nabaelanna ti nangipaima iti 23 a kopia ti libro nga Iyimtuod ti Agtutubo?

⁹ Usigem ti sabali pay a kapadasan. Ni Leah, nga agtawen iti 13, basbasaenna ti libro a Dagiti Saludsod nga Iyimtuod ti Agtutubo​—Dagiti Sungbat nga Epektiboa kabayatan ti pangngaldaw idiay eskuelaan. “Palpaliiwendak dagiti dadduma,” kunana, “ket di nagbayag, inaribungbongandak. Inyimtuodda no ania ti linaon ti libro.” Iti malem, uppat a babbai ti nagkiddaw ken ni Leah iti kopia ti libro nga Iyimtuod ti Agtutubo. Di nagbayag, dagitoy a babbai inranudda ti libro kadagiti dadduma, ket kayatda met ti maaddaan iti kopia. Kadagiti simmaganad a lawas, nakaipaima ni Leah iti 23 a kopia ti libro nga Iyimtuod ti Agtutubo kadagiti kaeskuelaanna ken gagayyemda. Nalaka la kadi a nagsao ni Leah idi damo a nagsaludsod ti dadduma maipapan iti libro a basbasaenna? Saan! “Idi damo, nagnerbiosak,” inaminna. “Ngem nagkararagak ket ammok a tulongannak ni Jehova.”

10, 11. Kasano a ti maysa a balasitang nga Israelita natulonganna ti panguluen ti buyot ti Siria a mangam-ammo ken ni Jehova, ket ania a panagbalbaliw ti inaramid ti panguluen kalpasanna?

¹⁰ Mabalin a ti kapadasan ni Leah ipalagipna kenka ti umasping a kasasaad a nakaipasanguan ti balasitang nga Israelita a nakautibo idiay Siria. Agkukutel idi ni Naaman, ti panguluen ti buyot ti Siria. Mabalin a ti asawana ti nanglukat iti saritaan a nangted iti gundaway iti balasitang tapno agsao maipapan iti pammatina. “No adda laeng koma ni apok iti sanguanan ti mammadto nga adda idiay Samaria!” kinunana. “Iti kasta mapaimbagna koma iti kukutelna.”​—2 Ar-ari 5:1-3.

¹¹ Kas resulta ti kinatured daytoy a balasitang, nabigbig ni Naaman nga “awan ti Dios iti sadinoman a lugar iti daga no di laeng iti Israel.” Inaramidna pay a kalat a “saanton nga agidatag iti daton a mapuoran wenno sakripisio kadagiti aniaman a sabali a didios no di laeng ken Jehova.” (2 Ar-ari 5:15, 17) Sigurado a binendisionan ni Jehova ti kinatured dayta a balasitang. Mabalinna met nga aramiden ken talaga nga aramidenna ti kasta kadagiti agtutubo ita. Napaneknekan ni Leah a pudno dayta. Idi agangay, immasideg kenkuana ti dadduma kadagiti kaeskuelaanna ket kinunada a simmayaat ti kababalinda gapu iti libro nga Iyimtuod ti Agtutubo. “Maragsakanak,” kuna ni Leah, “gapu ta ammok a tultulongak ti dadduma a mangammo iti ad-adu pay maipapan ken ni Jehova ken matultulongak ida nga agbalbaliw.”

12. Kasano a mapabilegka a mangidepensa iti pammatim?

¹² Mabalinmo a matagiragsak ti umasping a kapadasan da Jennifer ken Leah. Surotem ti balakad ni Pedro, a nangisurat a kas maysa a Kristiano, masapul a kanayonka a “sisasagana nga agikalintegan iti sanguanan ti tunggal maysa nga agkalikagum kadakayo iti rason maipaay iti namnama nga adda kadakayo, ngem aramidenyo ti kasta buyogen ti naalumamay a kababalin ken nauneg a panagraem.” (1 Pedro 3:15) Kasano a maaramidmo dayta? Tuladem ti inaramid dagiti Kristiano idi umuna a siglo a nagkararagda ken ni Jehova tapno tulonganna ida a mangasaba “buyogen ti isuamin a kinatured.” (Aramid 4:29) Kalpasanna, situtured nga isaritam kadagiti sabsabali ti maipapan kadagiti patpatiem. Mabalin a masdaawkanto kadagiti resultana. Maysa pay, maparagsakmo ti puso ni Jehova.

Dagiti Video ken Espesial a Proyekto

13. Ania dagiti gundaway nga inaprobetsar ti dadduma nga agtutubo tapno makaipaayda iti panangsaksi? (Kitaen dagiti kahon iti panid 20 ken 21.)

¹³ Adu nga agtutubo ti nakailawlawag iti pammatida kadagiti kaeskuelaan wenno maestro ken maestrada babaen dagiti video. No dadduma, nangted iti oportunidad dagiti proyektoda iti eskuelaan tapno idayawda ni Jehova. Kas pagarigan, dua a lallaki a Saksi ni Jehova nga agtawen iti 15 ti nadutokan nga agaramid iti report maipapan iti maysa a relihion ti lubong, kas paset ti klaseda iti world history. Nagtinnulongda a dua a nagaramid iti report maipapan kadagiti Saksi ni Jehova, nga inusarda kas reperensia ti libro a Dagiti Saksi ni Jehova​—Manangiwaragawag iti Pagarian ti Dios.b Masapul met a mangiparangda iti lima-minuto nga oral a report. Kalpasanna, adu unay ti saludsod ti mannursuro ken dagiti estudiante isu a nagtalinaed ti dua nga agtutubo iti sanguanan ti klase iti kanayonan a 20 a minuto. Sumagmamano a lawas kalpasanna, nagtultuloy a nagimtuod dagiti kaklaseda maipapan kadagiti Saksi ni Jehova!

14, 15. (a) Apay a maysa a silo ti panagbuteng iti tao? (b) Apay a saanmo nga ibain nga iranud ti patpatiem kadagiti dadduma?

¹⁴ Kas ipakita dagiti nadakamat a kapadasan, masagrapmo dagiti dakkel a gunggona no isaritam kadagiti dadduma ti maipapan kadagiti patpatiem kas maysa a Saksi ni Jehova. Dimo palpalabsen ti pribilehio ken rag-o a tumulong kadagiti sabsabali a mangammo ken ni Jehova gapu laeng iti panagbuteng iti tao. Kuna ti Biblia: “Ti panagpigerger iti tattao isu ti mangipakat iti silo, ngem daydiay agtalek ken Jehova masalaknibanto.”​—Proverbio 29:25.

¹⁵ Laglagipem a kas maysa nga agtutubo a Kristiano, tagtagiragsakem ti maysa a banag nga il-iliwen dagiti kasadaram​—ti kasayaatan a biag ita ken ti naikari a biag nga agnanayon iti masanguanan. (1 Timoteo 4:8) Makapainteres ta idiay Estados Unidos​—maysa a pagilian a nalabit ipagarupmo a ti kaaduan a tattao ket manangyaleng-aleng wenno naigamer iti trabaho​—ipakita ti maysa a surbey a di kumurang ngem kagudua kadagiti agtutubo ti serioso a mangmatmat iti relihion, ken kakatlo kadagiti agtutubo ti agkuna a ti narelihiosuan a pammati “ti kapatgan nga impluensia” iti biagda. Agparang a kasta met laeng ti kasasaad iti adu a paset ti lubong. Mabalin ngarud a maragsakan dagiti kapatadam idiay eskuelaan nga agimdeng kadagiti isaritam maipapan iti Biblia.

Kas Maysa nga Agtutubo, Umadanika Ken Jehova

16. Ania ti nairaman iti panangparagsak ken ni Jehova malaksid iti panangisarita iti dadduma ti maipapan kenkuana?

¹⁶ Siempre, saan laeng a ti panangisarita maipapan ken Jehova ti mangparagsak iti pusona. Masapul met nga itunosmo ti kababalinmo kadagiti pagalagadanna. Insurat ni apostol Juan: “Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.” (1 Juan 5:3) Mapaneknekam a pudno daytoy no umadanika ken ni Jehova. Kasano a maaramidmo dayta?

17. Kasano a makaadanika ken ni Jehova?

¹⁷ Basaem a naimbag ti Biblia ken dagiti naibatay-Biblia a publikasion. Bayat nga umun-uneg ti pannakaammom ken ni Jehova, nalaklaka ti agtulnog kenkuana ken isarita kadagiti dadduma ti maipapan kenkuana. “Ti naimbag a tao mangiruar iti naimbag manipud iti naimbag a gameng ti pusona,” kinuna ni Jesus, “ta manipud iti naruay iti puso agsao ti ngiwatna.” (Lucas 6:45) Gapuna, penkem ta pusom kadagiti naimbag a bambanag. Apay a dika mangipasdek kadagiti kalat iti daytoy a banag? Mabalinmo a parang-ayen ti panagsaganam para kadagiti gimong ti kongregasion iti sumaganad a lawas. Nalabit ti sumaruno a kalatmo isu ti pannakipaset babaen ti panangipaaymo iti ababa ngem naimpusuan a komento. Siempre, napateg met nga iyaplikarmo dagiti bambanag a maadalmo.​—Filipos 4:9.

18. Uray no agsagabaka iti sumagmamano nga ibubusor, iti ania a makapagtalekka?

¹⁸ Dagiti gunggona nga iyeg ti panagserbi ken ni Jehova ket pudno nga agpaut​—kinapudnona, iti agnanayon. Pudno, pasaray makapasarka iti ibubusor wenno pannakaumsi gapu ta maysaka a Saksi ni Jehova. Ngem laglagipem ni Moises. Kuna ti Biblia a “kimmita a sipapasnek iti pannakabayad ti gunggona.” (Hebreo 11:24-26) Makapagtalekka met a gunggonaan ni Jehova dagiti panagreggetmo a mangammo ken mangisarita ti maipapan kenkuana. Kinapudnona, dinanto pulos ‘lipaten ti aramidmo ken ti ayat nga impakitam maipaay iti naganna.’​—Hebreo 6:10.

[Footnotes]

Malagipmo Pay?

• Apay a masiguradom nga ipateg ni Jehova ti panagserbim?

• Aniada a wagas ti panangasaba idiay eskuelaan ti napaneknekan dagiti dadduma nga epektibo?

• Kasano a mapabilegka a mangasaba kadagiti kaklasem?

• Kasano a makaadanika ken ni Jehova?

[Kahon/Dagiti Ladawan iti panid 20]

Uray Dagiti Ubbing Maidaydayawda ni Jehova!

Uray dagiti ubbing mabalinda ti mangasaba idiay eskuelaan. Usigenyo dagitoy a kapadasan.

Iti uneg ti klase ti agtawen iti sangapulo a ni Amber, nga adda iti maikalima a tukad ti elementaria, basbasaenda ti libro maipapan iti panangparigat ti Nazi kadagiti Judio idi Gubat Sangalubongan II. Inted ni Amber iti maestrana ti video a Purple Triangles. Nasdaaw ti maestrana idi maammuanna a naidadanes uray dagiti Saksi ni Jehova iti sidong ti turay ti Nazi. Impabuya ti maestra ti video iti intero a klase.

Idi agtawen iti walo, nagsurat ni Alexa iti klasena tapno ilawlawagna no apay a di makiraman iti panangrambakda iti Krismas. Nagustuan unay dayta ti maestrana isu nga impabasana ken ni Alexa dayta a surat iti sanguanan ti klasena ken iti dua a sabali pay a klase! “Naisuro kaniak no kasano a raemek dagidiay naiduma ti pammatina,” kinunana iti konklusion, “ket agyamanak iti panangraemyo iti desisionko a di mangrambak iti Krismas.”

Di nagbayag kalpasan a simrek iti umuna a tukad ti elementaria, intugot ni Eric idiay eskuelaan Ti Librok Dagiti Estoria ti Biblia ket dimmawat iti pammalubos nga ipakitana dayta kadagiti kaklasena. “Adda nasaysayaat a napanunotko,” kinuna ti maestrana. “Apay a dimo basaen ti maysa nga estoria iti sanguanan ti klase?” Kasta ti inaramid ni Eric. Kalpasanna, inawisna nga agitayag dagidiay interesado a maaddaan iti kopia dayta a libro. Nagitayag ti sangapulo ket walo a kaklasena, agraman ti maestrana! Marikna ita ni Eric nga adda bukodna a teritoria.

Agyaman unay ti siam ti tawenna a ni Whitney, gapu iti broshur a Dagiti Saksi ni Jehova ken ti Edukasion.c “Kada tawen, masansan nga ikkan ni nanangko iti daytoy a broshur dagiti maestrak,” kunana, “ngem iti daytoy a tawen, siak ti nangted kadakuada. Pagyamanan iti dayta a broshur, siak ti inikkan ti maestrak iti pammadayaw kas ‘mapagulidanan nga estudiante iti lawas.’”

[Footnote]

[Kahon/Dagiti Ladawan iti panid 21]

Dagiti Gundaway nga Inaprobetsar ti Dadduma Tapno Isaritada ti Maipapan iti Pammatida

Idi natudingan nga agaramid iti report wenno proyekto iti eskuelaan, pinili ti dadduma ti maysa a suheto a nangted kadakuada iti gundaway a mangasaba

Adu nga agtutubo ti nangted kadagiti maestro wenno maestrada iti maysa a video wenno publikasion a mainaig iti suheto a maus-usig iti klase

Dadduma nga agtutubo a mangbasbasa iti Biblia wenno iti maysa a naibatay-Biblia a publikasion kabayatan ti recess ket inasitgan ti dadduma nga agtutubo nga addaan kadagiti saludsod

[Ladawan iti panid 18]

Dagidiay aduan iti kapadasan mabalin a makatulongda a mangsanay kadagiti agtutubo nga agserbi ken ni Jehova