Ti Sao ti Dios Nabiag
Ania a Dios ti Pagserbianyonto?
TI ADDA iti ngato a saludsod ti mainugot unay ita a kas met idi 3,000 a tawtawenen ti napalabas. Iti dayta a tiempo ti mammadto ni Jehova a ni Elias inimtuodna dagiti tattao iti Israel: “Agpapan kaano ti panagalla-allayo iti dua a panunot?” Dagiti tattao dida makaikeddeng no ania a Dios ti pagserbianda. Gapuna adtoy a kunkunaen ni Elias: “No ni Jehova isu ti pudno a Dios, sumurotkayo kenkuana; ngem no ni Baal, sumurotkayo ngarud kenkuana.”
Kasano ti panangpabileg dagiti tattao iti kapanunotanda? Insingasing ni Elias ti panangsubok babaen iti apuy. ‘Bay-an dagiti 450 a mammadto ni Baal a mangala iti urbon a baka,’ kunana, ‘rangrangkayenda ket isu ikabilda iti rabaw ti kayo kas daton, ngem saanda nga ikkan iti apuy iti babana. Ket siak mangalaakto ti sabali nga urbon a baka ket kastanto met laeng ti aramidek. Ket bay-anyo ida nga umawag iti nagan ni Baal, ket umawagakto iti nagan ni Jehova. Ket ti Dios a sumungbat babaen iti apuy isu ti pudno a Dios.’ Immanamong dagiti amin a tattao a daytoy ket nasayaat a panangsubok.
Immuna a nangisagana dagiti mammadto ni Baal iti urbon a baka iti altarda. Kalpasanna, manipud iti agsapa agingga iti matoon, immawagda: “O Baal, denggennakami!” Ngem awan ti sungbat. Ket naaramid iti matoon a ni Elias rinabrabakna ida: ‘Umkiskayo iti natbag, ta mabalin nga isu nagpaing. Wenno nalabit isu matmaturog ket masapul a riingen.’ Ket, dagiti mammadto ni Baal nagikkisda iti natbag ket sinugsugatda dagiti bagbagida met ’laeng iti immuko ken durus inggana a ti dara nagarubos kadakuada. Ngem kaskasdi a saan a simmungbat ni Baal.
Itan tartarimaanen ni Elias ti altar ni Jehova a nadadael. Rinangrangkayna ti urbon a baka ket inkabilna iti kayo. Ket namitlo a daras a binuyatanna ti daton, kayo ken dagiti batbato iti altar iti danum. Pinunnona met iti danum ti dakkel a kanal iti agliklikmut ti altar.
Ket, idi a rumabiin, nagkararag ni Elias: “Ipangagnak, O Jehova, tapno daytoy nga umili maammuanna a sika, O Jehova, ti pudno a Dios.” Idin, ti apuy ni Jehova nagtinnag. Ket rinunawna ti daton a mapuoran, ken ti kayo ken dagiti bato ken ti tapok, ket dinilpatanna ti danum nga adda iti kanal. Ket idi nakita dagiti tattao daytoy, nagpaklebda a kunkunada: “Ni Jehova isu ti pudno a Dios! Ni Jehova isu ti pudno a Dios!”—1 Ar-ari 18:21-40.
Kasano a napabilegyo ti panunotyo no ania a Dios ti pagserbianyonto? Saan a mabalin nga agalla-allakayo iti dua a panunot. Adda laeng ti maymaysa nga umiso a pamay-an. Ti Dios daytoy a sistema dagiti bambanag, ni Satanas a Diablo, madaydayaw ita, ngem saan a kas iti panagserbi kadagiti lokal nga agrikultural a didios, a kas ken ni Baal idi ugma. Imbes ketdi maidaydayaw ni Satanas no dagiti tattao iyun-unada dagiti namaterialan a bambanag a pagserbianda ti bukodda a pagimbagan imbes nga aramidenda ti pagayatan ti Namarsuada, ni Jehova a Dios. Gapuna ti panagpili adda kadakayo. Impakita ni Jesu-Kristo ti umiso idi inadawna ti Sao ti Dios ket kinunana: “Agdayawka ken Jehova a Diosmo, ket isu ti pagserbiamto laeng.”—Mateo 4:10.