Ti Gobierno a Makaaramid ti Di Maaramidan ti Tao
“Umaykayo, ket kitaenyo dagiti ar-aramid ti Dios. Nakaam-ames kadagiti aramidna a maipaay kadagiti annak dagiti tao.”—SALMO 66:5.
1, 2. (a) Kasano a ti makitkita nga uniberso ipakpakitana ti nakaskasdaaw a pannakabalin ti Namarsua? (b) Apay a rebbeng a patientayo ti kunaen ti naimpadtuan a Sao ni Jehova maipapan ti tiempotayo?
NI Jehova ti addaan ti pannakabalin a mangaramid ti di maaramidan ti tao. Kas panangiyilustrar: Dagiti tattao pagsidsiddaawanda ti pannakabalin ti nuklear a bomba; ngem ti pannakabalin dayta ket pinagbalin a bassiusit unay ti kasta unay a pannakabalin nga adda iti inittayo. Ket ti inittayo maysa laeng kadagiti agarup 200 bilion a bitbituen ti Milky Way a galaksitayo. Pinattapatta dagiti astronoma a ti intero nga uniberso mabalin nga adda agarup 100 bilion a galaksis, a tunggal maysa addaan binilbilion a bitbituen. Anian a nakaskasdaaw a pannakabalin ti innalana a mangparsua amin kadagita! (Isaias 40:26) Daytoy nakaskasdaaw a pannakabalin iti Namarsua pinagbalinna nga agpusisaw ti pannakabalin dagiti tattao iti kinaawan mamaayna.—Isaias 40:15.
2 Gapuna rebbeng nga awan koma ti agduadua a maaramidan ni Jehova ti kunana nga aramidennanto. (Isaias 46:9, 10; 55:11) Rebbeng a patientayo dayta no ibaga ti naimpadtuan a Saona kadatayo nga umas-asidegtayo iti panungpalan ti naikeddeng a panawen nga impalubosna a maipaay iti tao nga agturong iti agwaywayas a dalanda. Ipakita ti historia a ti naaramidan ti tao iti biag dagiti tattao ken an-animal, agraman ti daga a mismo, ket maysa a pakaibabainan, maysa a mantsa iti uniberso ti Dios. Gapuna, nainkalintegan a naan-anay ti panangpunas ni Jehova iti daytoy a mantsa a mamimpinsan nga agpaay iti agnanayonen.—Oseas 4:1-3; Judas 14, 15.
3. Aniat’ kunaen ti padto ti Biblia maipapan iti asidegen a masanguanan?
3 Ti mapaspasamak ditoy lubong ita ket nalawag a pammaneknek a daytoy a sistema dagiti bambanag ket talaga nga addan kadagiti maudi a paspaset ti “maudi nga al-aldawna” kas naipadto idiay 2 Timoteo kapitulo 3. Din agbayag, pukawenen ni Jehova daytoy a sistema ken ibaludnan ti ulona, ni Satanas a Diablo. Daytanto ti sarunuen ti maysa nga interamente a baro a sistema dagiti bambanag ditoy daga, a tengtenglen ti nailangitan a gobierno nga insuro ni Jesus a kararagen dagiti paspasurotna idi a kinunana: “Umay koma ti pagariam. Maaramid koma ti pagayatam, kas sadi langit, kasta met ditoy daga.”—Mateo 6:10; Daniel 2:44; Roma 16:20.
Ti Prinsipio ti Pannubbot
4. Kasanot’ panangusar ni Jehova iti prinsipio ti pannubbot idi kadaanan nga Israel?
4 Di mabalinan dagiti natauan a gobierno nga ikkaten ti basol, sakit, ken ipapatay. Kaskasdi, ti gobierno ti Dios ket maaramidanna ti di maaramidan ti tao. Maawatantayo no kasano ti panagkurri daytoy babaen ti panangsukimat kadagiti pannakilangen ni Jehova iti ilina iti kadaanan nga Israel. Idi inusar ti Dios ti prinsipio ti pananggatang manen, wenno subbot. Kas pangarigan, no napanglaw ti maysa nga Israelita, mabalinna nga ilako ti bagina kas maysa nga adipen iti maysa a saan nga Israelita. Ngem ti asideg a kabagian ti mabalin a mangsubbot kenkuana no isut’ addaan iti nawadwad a gatad a panggatang kenkuana—Levitico 25:47-49.
5, 6. (a) Kasano a ti prinsipio ti panangsubbot agtrabaho a mangwayawaya iti sangatauan manipud natawid a basol? (b) Tunggal maysa ti automatiko aya a mawayawayaan manipud basol?
5 Umas-asping iti dayta, nangted ti Dios ti pannubbot a maipaay iti sangatauan manipud iti panangadipen ti basol. Ti gatad ket masapul a katupag daydiay napukaw. (Deuteronomio 19:21) Napukaw ni Adan ti perpekto, agnanayon a natauan a biag. Yantangay awan ti adda nga ik-ikutan dagiti managbasol a tattao a katupagna iti gatad, saanda a “masubbot uray ti kabsatda.” (Salmo 49:7) Nupay kasta, impadto ti Biblia ti iyaay ti maysa a makasubbot. Dayta awan sabali no di ni Jesu-Kristo. Naipanayag a ni Jesus ket addaan biag idiay langit sakbay panagbalinna a tao. Ngem ti biagna naiyalis idiay aanakan ni Maria babaen iti pannakabalin ni Jehova. Iti daytoy a pamay-an isut’ naiyanak kas tao. Ngem babaen ti Dios kas amana, saanna a natawid ti kinamanagbasol nga isut’ nangpakapuy iti amin a sangatauan.—Mateo 1:18-21; Juan 1:1, 14; 1 Pedro 2:22.
6 Gapuna, inikutan ni Jesus ti kakaisuna a banag a katupag ti pateg ti perpekto a natauan a biag—sabali pay a perpekto a natauan a biag. Ngem saan a kas ken nasukir nga Adan, nagtalinaed a natulnog ni Jesus iti Dios. Ket idi indatonna ti biagna a maipaay iti natauan a pamilia, inakseptar ni Jehova dayta kas maiyanatup a gatad ti pannubbot. (Galacia 1:4) Ngem kayat kadi a sawen daytoy a tunggal maysa ti automatiko a nawayawayaanen manipud basol ket makagun-odto ti kinaperpekto iti sidong ti turay ti pagarian? Saan, ta kuna ti Juan 3:16: “Ta kasta la unay ti panagayat ti Dios iti lubong nga intedna ti Anakna a bugbugtong tapno amin a mamati kenkuana saan a mapukaw no di ket adda biagna nga agnanayon.” No laeng ngarud awatentayo ti sagana ti pannubbot ken adda aramidentayo maipapan iti dayta a lak-amentayto ti pannakapabaro dagiti bagbagi ken is-isiptayo nga agturong iti kinaperpekto idiay Paraiso.—Apocalipsis 21:4.
Ti Edukasion Idiay Baro nga Urnos
7, 8. Ania a panginanamaan a maipaay iti masanguanan a panagsursuro ti adda iti uneg ti natauan nga utek?
7 Ti isip addaan iti nagdakkel a potensial wenno panginanamaan iti panagsursuro, uray pay iti agdama nga imperpekto a kasasaad ti tao. Ngem daytoy ket sangkabassit laeng a paset iti mabalinannanto nga adalen idiay Baro nga Urnos, a sadiay ti basol ket saannanto a lapdan ti panagandarna. Idiay The Brain Book kuna ti mannurat: “Iti uneg dagiti mismo nga ul-ulotayo isut’ maysa kadagiti karirikutan a sistema iti pagaammo nga uniberso. Ti pannakabalinna ken ti pannakibagaybagayna lab-awanna ti adayo ti uray aniaman nga aramid-tao a kompiuter.” Ket innayonna pay: “Masansan a makunkuna a mangus-usartay laeng iti 10 porsiento iti naan-anay a pannakabalin ti isiptayo. Daytoy agparang itan a nalabit maysa a nalabes a panangpattapatta. Nalabit ditay pay mangus-usar iti uray 1 porsiento—nalablabit 0.1 porsiento wenno basbassit pay.”
8 Panunotenyo laengen ti maaramidanto dagiti tattao inton ti utek ket magtenganna ti naan-anay a pannakabalinna idiay Baro nga Urnos. Panunotenyo amin dagiti makakayaw a bambanag nga inkabil ni Jehova iti daytoy a daga a mabalintay nga adalen, kas kadagiti an-animalna, dagiti biag iti uneg ti danum, ken dagiti mulmula. Panunotenyo met, ti panagadalto maipapan iti nakaskasdaaw nga uniberso agraman dagiti binilbilion a galaksisna. Usigenyo amin dagiti kinasigo a mabalintayto a masursuro iti arte, musika, kadagiti ar-aramid ti im-ima ken ti dadduma a nagadu pay a bambanag.
9. Ania a tipo ti edukasion ti mangyegto ti kadadakkelan a gunggona idiay Baro nga Urnos?
9 Adda pay sabali a tipo ti edukasion idiay Baro nga Urnos a mangyegto iti kadadakkelan a gunggona kadagiti isuamin. Kuna ni Jesus: “Isuda amin sursuruanto ida ni Jehova.” (Juan 6:45) Isu daytoy ti kangangatuan a tukad iti edukasion. Ket dayta ti maipaayto kadagiti isuamin nga iturayan ti Pagarian ti Dios agraman dagidiay makalasat iti panungpalan daytoy a sistema dagiti bambanag. (Apocalipsis 7:9, 14) Dadduma pay kadagiti iturayan ti Pagarian ti naibaga idiay Juan 5:28, 29, a sadiay kuna ni Jesus: “Ta umay ti oras a dagiti amin nga adda iti tanem a pakalaglagipan mangngegdanto ti timekna ket rummuardanto.” Daytoy a panagungar dagiti binilbilion a natay a tattao—a naan-anay nga imposible a maaramidan dagiti tattao—kaipapananna ti maysa a naglawaan a trabaho a pangisuro a maaramidto nga agpaay kadakuada.
10. Kasanonto ti pannakaipapagna ti edukasion idiay Baro nga Urnos?
10 Ita nagadu dagiti agsusuppiat a sistema ti edukasion. Ngem idiay Baro nga Urnos, ti nailangitan a gobierno ti Dios ti mangipaayto ti sangalubongan a sistema ti edukasion a mangisuro kadagiti tattao ti kinapudno maipapan ken Jehova iti sangsangkatunos a pamay-an. Paset daytoy isunto ti panangisuro kadagiti tattao maipapan iti umiso a natauan a relasion. Awanto ti panangisursuro iti panagpannakkel ti rasa, nasionalidad, wenno iti takder iti kagimongan. Imbes ketdi, maadalto dagiti agtaeng iti daga ti panagayat iti maysa ken maysa, ti panangraem iti dayaw iti maysa ken maysa. Ti kasta nga edukasion ti mangibunganto iti nakaay-ayo a pannakabalbaliw ti personalidad a mangisarmingto iti natan-ok a kualidad ni Jehova.—Aramid 10:34, 35; Colosas 3:9-12
11, 12. Kasano a masiguradotayo a ti kasta nga edukasion agballiginto iti panggepna?
11 Agballiginto aya ti kasta nga edukasion? Makasigurotayo a dayta ti agballigi ken agballiginto. Maysa a rason a ta ni Jehova a di agulbod, kunana nga aramidennanto dayta. (Tito 1:2) Mainayon pay, daytoy a kita ti edukasion ket agkurri itan! Ni Jehova addaanen ti maysa a sangalubongan a manangisuro nga organisasion a mangisursuro kadagiti minilmilion a tattao maipapan iti gobierno ti Pagarianna ken dagiti pagalagadanna. Daytoy ti mapaspasamaken agsipud ta ti panagturay ti Pagarian ti agan-andaren nanipud pay panangrugi dagiti “maudi nga al-aldaw” idi 1914.
12 Nanipud pay iti dayta a tiempo, ti padto ti Mateo kapitulo 25 ti matungtungpalen. Ipakita dayta a ni Jesus umay iti pannakabalin ti Pagarian bayat a dagiti kabkabusor ti Dios addada pay ditoy daga. Kuna ti bersikulo 32: “Ket iti sanguananna maurnongto dagiti isuamin a nasion, ket paglalasinennanto dagiti maysa ken maysa, a kas iti pastor ilasinna dagiti karnero kadagiti kalding.” Dagitoy mara-karnero a tattao ti isursuro ni Jehova ita babaen iti dumakdakkel, makitkita nga organisasionna. Iti panangapresiarda iti inda maad-adal, agtartrabahodan a mangbalbaliw iti personalidadda iti ladawan iti Dios. Ket ti kinapudno a daytoy nga edukasion ti mangap-apektar iti minilmilion a tattao a maipaay iti naimbag itattan ket maysa a sigurado a pagilasinan a daytanto ti maaramidan iti dakdakkel a pamay-an idiay Baro nga Urnos ti Dios.
Panangibangon iti Maysa a Paraiso
13. Ania a naindaklan a trabaho a panagbangon ti maaramidto iti sidong ti turay ti Pagarian?
13 Maysa pay a kita ti trabaho iti sidong ti panagturay ti Pagarian isunto ti panamagbalin iti daytoy a daga a paraiso. Ket ti Paraiso dinanto mabalin nga iraman dagiti pagtaengan a narurugit wenno kinapanglaw. Kayat dagiti tattao dagiti disente a pagtaengan ken ti bassit a daga nga addaan kaykayo, sabsabong, ken minuyongan. Dagidiay situtulok a paisuro iti Dios maaddaandanto iti dayta. Impadto ti Isaias 65:21 ken 22: “Ket isuda bangonendanto dagiti balbalay ket agtaengdanto kadakuada; ket agmuladanto kadagiti kaubasan ket kanendanto ti bungada. Isuda didanto mangbangon ket sabali ti agnaed; didanto agmula ket sabali ti mangan. . . . Dagiti pinilik agragsakdanto iti mabayag iti aramid dagiti im-imada.”
14, 15. Apay makapagtalektayo a dagiti ad-adipen ni Jehova makaibangondanto ti maysa a paraiso?
14 Dikay koma pagduaduaan ti maaramidan ni Jehova babaen kadagiti situtulok a puso ken im-ima ti ilina idiay Baro nga Urnos. Uray pay itan ti lubong dagiti managbangon pagsidsiddaawanda ti maar-aramidan dagiti Saksi ni Jehova iti panagibangonda kadagiti patakder, kas kadagiti napartak pannakaibangonna a Kingdom Halls. Kalpasan ti pannakaibangon ti maysa kadagitoy idiay Estados Unidos, kuna ti editorial ti maysa a pagiwarnak: ‘Adda maysa a banag nga ad-adda a napatpateg ngem ti maysa a patakder a pinartuat dagidiay 2,000 a boluntario. Dagiti papangulo a sibiko kumitada pay koma a nasingsinged iti naaramidan iti napalabas a ngudo ti lawas. Ti entusiasmo, dedikasion ken tarigagay a maragpat ti maysa a kalat nausarda a mabuyogan iti nakaskasdaaw a resulta. No koma laeng dagiti lokal a grupo matengngelda dagidiay met laeng nga alikamen, aniaman a kalat—uray pay no dayta ket ti recycling, pananglapped ti krimen, wenno panangpapintas ti komunidad—ti nalaka a maragpat wenno maibanag. Pinaneknekan ti maysa a buyot dagiti managtrabaho no ania ti potensial wenno panginanamaan nga adda iti uneg ti maysa a biag no ti komunidad ket sangsangkamaysa. Manginanamakami a ti Kingdom Hall isunto ti lugar a maipaay iti ubbog ti pakatignayan iti kongregasion dagiti Saksi. Ti kaaddana ket maysan a pakatignayan kadatay amin.’
15 Daytoy a kinabulos-nakem ken dumakdakkel a kinasigo dagiti ad-adipen ni Jehova ti mausarto pay iti dakdakkel a pakagunggonaan idiay Baro nga Urnos ti Dios. Ket anian a makaparagsakto iti panangsukat kadagiti isuamin a di makaay-ayo a disso babaen kadagiti napipintas a pagtaengan ken aglawlaw! Anian a makapnekton a maammuan a tunggal aldaw ti panagreggetyo iyegnanto ti daga a maysa nga aldaw nga as-asideg iti panagbalinna a sangalubongan a paraiso!
Maysa a Sangsangkamaysa a Sangalubongan a Pamilia
16. Apay a dagiti agtaengto idiay Baro nga Urnos didanto agpeggad iti kinaranggas?
16 Ket dagiti agtaeng iti Baro nga Urnos didanto metten marikna nga agpegpeggadda iti krimen, panagderraaw, wenno gubat. Kuna ti Salmo 46:9: “Ti [Dios] pasardengenna dagiti gubgubat inggana iti ungto ti daga.” Ti “Prinsipe ti Kappia,” a ni Jesu-Kristo, ipaalagadnanto ti manayon a sangalubongan a talna, ta “ti idadakkel ti panangiturayna ken ti kappia awanto ti inggana.” (Isaias 9:6, 7) Babaen iti pudpudno a talna, ken babaen iti pannakaedukarton ti intero a natauan a pamilia kadagiti isu met laeng a natatan-ok a pagalagadan, amin ti mapagkaykaysanton iti di mabungtol a singgalut iti ayat. Iti kasta, awanton ti aniaman a mamagsisina a pagbeddengan dagiti nasnasion.
17. Kasano kaadayon ti nagtengan ti talna ken panagkaykaysa dagiti ad-adipen ti Dios uray pay itan?
17 Dagita kadi a karkari naimbagda unay a pumayso? Saan, agsipud ta ti talna ken panagkaykaysa pudpudnon kadagidiay situtulok nga agpapaiturayen iti Pagarian! Usigenyo daytoy: Nasurok a dua ket kagudua milion a saksi ni Jehova ti naisaknapen iti intero a daga. Kaskasdi, tungtungpalendan ti Isaias 2:4, a kunana: “Ket pandayendanto dagiti kamkampilanda a pagbalinen a dingding ti arado ket dagiti pikpikada pandayendanto a komkompay. Ti maysa a nasion saannanto nga itag-ay ti kampilan a maibusor iti nasion ket didanto met adalenen ti pannakigubat uray kaano.” Iti uray ania a kasasaad dagiti Saksi ni Jehova didanto gagaraen nga alaen ti biag dagiti kakabsatda wenno ti uray siasinoman iti aniaman a daga. Kas inkomento ti maysa a pagiwarnak nga Italiano nga Il Corriere di Trieste: “Sisasaganada a sumango ken patay imbes a salungasingenda ti pamunganayan a pagalagadan . . . DIKA MAMAPATAY!” Gaput’ panangsalimetmetda kadagiti pagalagadan ti Dios, dagiti Saksi ni Jehova addaanda ti pudpudno a talna ken panagkaykaysa, nga imposible a magun-odan daytoy a lubong. Ket ti kinapudno a minilmilion kadakuadan ti mangtagtagiragsak iti daytoy iti tengnga daytoy nariribuk a lubong ti pammaneknek no anianto ti maaramid inton ti Pagarian ti Dios iturayannanton amin nga ar-aramid ti daga.—Juan 13:34, 35; 1 Juan 3:10-12.
18, 19. Aniada dagiti sumagmamano a dadduma a gunggona nga umayto kadagidiay mangsalimetmet kadagiti nangato a pagalagadan ti Dios?
18 Mainayon iti daytoy internasional a kappia ken panagkaykaysa, ti panagannurot iti natantan-ok a pagalagadan ti Dios ti mangpataud kadagiti tattao nga addaan ayat kadagiti kaarrubada ken iti sanikua dagiti kaarrubada. Gapuna ‘agbiagda a sitatakneng kadagiti isuamin a bambanag.’ (Hebreo 13:18) Maipapan iti daytoy maysa a kolumnista a Pranses-Canadiano a managsurat idiay Le Journal de Montreal, kinunana maipapan kadagiti Saksi ni Jehova: “No is-isuda laeng kona dagiti tattao ditoy lubong, ditay kasapulanen nga ikandado dagiti ruruangantayo iti rabii ken ikabil dagiti pangbugaw ti mannanakaw.”
19 Dagitoy a nasungdo nga iturayan ti gobierno ti Dios awan problemada iti krimen iti nagbabaetanda, nupay dayta saanen a matengngel ti lubong. Kasta met, yantangay annurotenda ti nangato a pagalagadan ti Biblia saanda a masaplit kadagiti saksakit a maiyallatiw gapu iti sekso wenno kadagiti aborsion nga isu ti epidemia ti tunggal nasion. Ket salsalimetmetan met dagiti ad-adipen ni Jehova a nadayaw ti panagasawa a maisupadi iti nalulok a panangmatmat iti lubong iti urnos ti panagasawa. Apay a mataginayon dagiti Saksi ni Jehova dayta a pagalagadan? Agsipud ta ni Jehova ti mangiwanwan kadagiti nasungdo a managdaydayawna, ken “iti Dios ti isuamin mabalin.”—Mateo 19:26.
Pannakaurnong iti Pudno a Panagdaydayaw
20. Ania ti kapapatgan unay a tignay kadagiti moderno a panawen?
20 Pagaammo man dagiti tattao dayta wenno saan, ti sangalubongan a pannakaur-urnong dagiti mara-karnero a tattao iti organisasion ni Jehova ti kapatgan a tignay kadagiti moderno a panawen. Daytoy ti kaitungpalan ti nakaskasdaaw a padto ti Isaias 2:2, 3: “Ket maaramidto kadagiti maud-udi nga al-aldaw a ti bantay ti balay ni Jehova [ti naitan-ok a pudno a panagdaydayawna] mabangonto iti rabaw dagiti bambantay, ket maibayogto a nangnangruna ngem kadagiti turturod; ket isuamin a nasion agayusdanto agingga kenkuana. Ket adu dagiti inilin-ili a mapanto ken agkuna: ‘Umaykayo, ket sumang-attayo iti bantay ni Jehova . . . ket isuronatayonto kadagiti dalanna, ket magnatayonto kadagiti danana.’”
21. Aniat’ maparegta nga aramiden dagiti nasingpet-panagpuspusona a tattao?
21 Paregtaenmi amin dagiti nasingpet-panagpuspusona a tattao nga agbalin a paset daytoy nakaragragsak a sangalubongan a tignay nga agturong iti pudno a panagdayaw ken nalinteg a gobierno. Tagiragsakenyo itan dagiti bendision nga umay manipud pannakitimpuyog iti maysa nga ili a masursuruanen kadagiti linlinteg ken prinsipio ti Dios. Sisusungdo nga agpaituray iti gobierno iti Pagarian nga iti mabiiten mangrugin a pagbalinenna daytoy a daga a paraiso. Ikabilyo ti panagtalekyo iti dayta a Pagarian ket saan nga iti ganuat daytoy a lubong ta kuna ti Salmo 127:1: “No saan a ni Jehova ti mangbangon iti balay, agbannogda a barengbareng dagiti mangbangon.” Agtulnogkayo iti awis ti Salmo 66:5: “Umaykayo, ket kitaenyo dagiti ar-aramid ti Dios. Nakaam-ames kadagiti aramidna a maipaay kadagiti annak dagiti tao.” Gapuna umaykayo iti Dios a mangipanamnama iti kasayaatan a gobierno a maipaay iti sangatauan, ti gobierno a makaaramid iti di maaramidan ti tao, ti gobierno nga iti mabiiten isunto ti kakaisuna nga adda iti daytoy a daga.
Kasano ti Isusungbatyo?
◻ Apay a makasigurotayo nga aramidento ni Jehova dagiti pangpanggepna?
◻ Kasano a ti prinsipio ti pannubbot agkurri iti pannakawayawaya ti maysa manipud basol?
◻ Ania a naindaklan nga edukasion ken trabaho a panagbangon ti maaddanto idiay Baro nga Urnos?
◻ Ania ti pammaneknek a ti talna, panagkaykaysa ken ayat ti maaddanto iti isuamin a daga idiay Baro nga Urnos?
[Ladawan iti panid 17]
Iti sidong ti turay ti Pagarian, dagiti managayat-kinapudno a tattao “paisurodanto ken Jehova”
[Ladawan iti panid 19]
Ti talna ken panagkaykaysa ket pudpudnon kadagidiay nga agpaituray iti gobierno ti Pagarian