Kasanot’ Panangmatmatyo iti Nagan ni Jehova?
DAYTOY addaan karitna a saludsod ti napataud a maipaay kadagiti delegado kadagiti “Panagrang-ay ti Pagarian” a Kumbension Distrito dagiti Saksi ni Jehova. Timpuar dayta babaen iti pannakairuar ti baro a broshur, The Divine Name That Will Endure Forever. Apay a napateg dayta a saludsod?
Manipud iti naindagaan a historia ti panamarsua, ti nagan a Jehova ti nausar a mangtukoy iti kakaisuna a pudno a Dios. (Genesis 2:4; 4:1) Ni Abraham a “gayyem ni Jehova” ti nangusar a siwayawaya iti dayta. (Santiago 2:23; Genesis 18:30-33) Naammuan ni Moises a Jehova ti nagan ti Namarsua “agingga iti panawen a di nakedngan.” (Exodo 3:15) Imparangarang met ni Jesus ti nagan ti Dios kadagiti pasurotna. (Juan 17:6) Ket dagiti ad-adalanna nagdaliasatda iti nawatiwat tapno tulonganda dagiti tattao nga ‘umawag iti nagan ni Jehova ken maisalakanda.’—Aramid 2:21.
Dadduma, nupay kasta, linaisda dayta a nagan. Dagiti Israelitas a di nangsalimetmet iti linteg ni Jehova ti nangrugit iti naganna. (Levitico 18:21; 19:12) Dagidiay Israelitas idiay sakaanan ti Bantay Sinai a nangusar iti nagan ti Dios a maitunos iti panagdayawda iti nabalitokan a baka ti nangyeg iti pakaumsian ti naganna. (Exodo 32:4, 6) Umasping met iti dayta, dagiti Judio a ti kamaudiananna gaput’ panagan-anito dida kayat nga ibalikas ti nagan ti Dios ti nangyeg iti pakaibabainan dayta, kas ti inaramid dagiti Judio a mismo a nangmatmat iti dayta kas maysa a simbolo ti mahika.
Uray met dagiti agkunkuna a Kristiano a di uniso ti pannakaammoda ti nangabbong iti dayta a nagan idi, kas kadagiti Judio, insardengda nga us-usaren dayta ken inikkatda pay dayta manipud kadagiti patarus a Griego ti Hebreo a Kasuratan. Ket daytoy, met, ti nangiturong kadagiti moderno a panangabuso. Dagiti tattao ita dida ikaskaso ti nagan ti Dios, a matmatmatanda dayta a di napateg wenno di nasken a maipaay iti panagdayaw.
Itultuloy a Padayawan ti Nagan
Kinapudnona, dagiti laeng Saksi ni Jehova itatta ti mangsursurot iti ulidan dagiti umuna nga ad-adalan ni Jesus ken mangtultulong iti tattao iti intero a lubong nga ‘umawag iti nagan ni Jehova ket maisalakan.’ Isuda laeng ti pudpudno a maaw-awagan “ili a maipaay iti naganna.” (Aramid 15:14) Ngem, posible kadi, nga uray datatyo met ket mabalin nga iwagtengtayo ti nagan ni Jehova?
Bueno, no agsalungasingtayo iti linlinteg ni Jehova ket agaramidtayo iti kinakillo, ti kinapudnona lalaisentayo ti naganna. (2 Timoteo 2:19) Ket no us-usarentayo ti nagan ni Jehova iti panagdaydayawtayo, ngem ipakita dagiti tigtignaytayo a ti pudpudno a namnamatayo iti masanguanan ket naibatay kadagiti material a bambanag wenno umas-asping kadagita, saantayo a naiduma kadagiti kadaanan nga Israelitas a nangusar iti nagan ni Jehova ngem ti kinapudnona agdaydayawda iti nabalitokan a baka. Mainayon pay, ti nagan a Jehova ket saan a maysa nga anting-anting. No iparparangtay dayta kas ti Tetragrammaton wenno iti moderno a pannakadeletiarna kadagiti pagtaengantayo wenno kadagiti luglugantayo iti namnama a daytat’ mangsalaknib kadatayo wenno mangyeg “gasat” kadatayo, kasanot’ pannakaigiddiatayo manipud kadagidiay managanito a Judio a nangmatmat iti dayta kas simbolo ti mahika?—Exodo 20:7.
Gapuna, no kasanot’ panangmatmattayo iti nagan ti Dios ket importante. Ti nagan a Jehova ket agnanayon a pakalaglagipan ti Dios. (Exodo 3:15) Irepresentar dayta ti di agbalbaliw a kualidad ken pangpanggepna. (Deuteronomio 32:3-43) Sibabaknang a bendisionan ni Jehova dagidiay agbuteng kenkuana ken mangdayaw iti naganna. (Malakias 3:6) Ti baro a broshur a, The Divine Name That Will Endure Forever, agraman ti nauneg a panangisalaysayna iti nasantuan a nagan, ti kaipapananna ken ti umiso a pannakausarna, ti sigurado a mangtulong kadagiti rinibribo pay a mangidayaw iti nagan ti Namarsuada, ni Jehova.—Apocalipsis 4:11.