Armagedon—Manipud Dios ti Ayat?
“ARMAGEDON”—ania ti kaipapanan daytoy a nagan iti Biblia? Iti tunggal pannakaiyam-ammona babaen iti napnuan kaipapanan nga abbong, maysa a serie dagiti makaisuro nga artikulo iti daytoy a topiko ti maitamtampok iti uppat a ruar Ti Pagwanawanan nga agpaay iti Hulio ken Agosto 1985. Mainanama a dagitoy a Nainkasuratan a panangilawlawag liwliwaennakayo iti pannakaammo no ania a talaga ti ARMAGEDON.
ANIA ti pampanunotenyo no makitayo ti sao nga “Armagedon”? Para kadagiti adu kaipapananna dayta ti narungsot a panagrupak iti nagbabaetan dagiti dadakkel a pannakabalin ti lubong. Sirsirmataen ti kaaduan ti ultimo a didigra—maysa a nuklear nga uram a mamagbalin iti dagatayo a maysa a nadadael, radioaktibo a nakset ti kasasaadna nga addaan laeng ti sumagmamano, no adda pay ketdi, dagiti makalasat. Kaskasdi, maikontra kadagita a popular a kapanunotan, saan a dayta ti kaipapanan ti Armagedon a pulos.
Ti sao nga “Armagedon” ti addaan gubuayan idiay Biblia. Ket daytat’ napasamak a naminsan laeng—idiay maika-16 a kapitulo iti libro nga Apocalipsis. Kalpasan ti panangibagana no kasano a dagiti “ar-ari ti amin a lubong” maur-urnongdanto “iti gubat ti Dakkel nga Aldaw ti Dios a Mannakabalin-amin,” kuna ti padto: “Inawisda dagiti ar-ari a sangsangkamaysa idiay disso a maaw-awagan, iti Hebreo, Armagedon.”—Apo 16 Bersikulo 13 agingga iti 16, The Jerusalem Bible.
“Ti gubat ti Dakkel nga Aldaw ti Dios a Mannakabalin-amin”! Nalawag, ti Armagedon ket isut’ gubat ti Dios. Pudno, ramanen dayta dagiti ar-ari, wenno nasnasion, iti lubong. Ngem umayda, saan a tapno agdadangadangda iti maysa ken maysa, no di ket tapno makilaban a maibusor ti Dios ken kadagiti nailangitan a buybuyot nga indauluan ti dinutokanna nga Ari a ni Jesu-Kristo—a nailadawan kas nakakabayo iti puraw a kabayo. Ket anianto ti pagtungpalanna? Mabasa ti salaysay ti Biblia: “Dagiti ar-ari ti daga ken dagiti buybuyotda naurnongda tapno gubatenda daydiay nagsakay iti kabayo ken daydi buybuyotna. . . . [Isuda] napapatayda babaen ti kampilan daydi nagsakay iti kabayo . . . Ket isuamin dagiti tumatayab nagbussogda kadagiti laslasagda.”—Apocalipsis 19:19-21.
Maysa a Nadara a Gubat
Makadadaelto unay ti Armagedon a gapu itoy ti panangdadaelna ti matuktukoy kas maysa a panangapit “ti anien ti daga” babaen iti maysa a natadem a kompay. “Ket daydi anghel inaramatna daydi kompayna itoy daga, ket inurnongna ti apiten nga ubas ti daga, ket impisokna iti pagpespesan daydi dakkel a pagdapilan iti pungtot ti Dios. Ket nabaddebaddek daydi pagpespesan iti ruar ti siudad, ket timbog ti dara iti pagpespesan a nagtenganna dagiti preno dagiti kabayo iti kaatiddog ti sangaribo ket innem a gasut nga estadio.”—Apocalipsis 14:15-20.
Wen, agayusto a nauneg ti dara iti sidong ti ima dagiti manangikisap a buybuyot ti Dios. Dagiti 69 milion a natnatay kadagiti dua a gubat sangalubongan awan ti mamaayna no maidilig kadagiti mapapatay iti gubat ti Dios nga Armagedon. Maipapan kadakuada nagsurat ni mammadto a Jeremias: “Ket dagiti napapatay gapu ken ni Jehova iti dayta nga aldaw addanto manipud iti maysa a pungto ti daga agingga met laeng iti sabali a pungto ti daga. Saandanto a masangitan, ket dida met maurnong uray maitanem. Isudanto ti rugit iti rabaw ti daga.”—Jeremias 25:30-33.
Dagiti umap-apuy a misil, dagiti umap-apuy nga arbis, ken dadduma pay a puersa iti langlangit a maipakuyog iti panangukom ti Dios dumtengto a nakabutbuteng iti puspuso dagiti tattao iti intero a daga. Ket iti pannakariribukda, isudanto ti agpipinnatay iti maysa ken maysa, ti maysa maibusor iti kaarrubana, bayat a duprakento dagiti manangikisap a buybuyot ti Dios dagiti isuamin a didanto bigbigen ti aniaman nga edad wenno sekso. Ta imbilin ti Dios kadakuada a dida mangipakita ti aniaman nga asi: “Kabilenyo. Saan koma a mangisakit ti matayo, ket dikayo met mangngaasi. Papatayenyo nga—ikisap—dagiti lallakay, babbaro ken babbalasang, ub-ubbing ken babbai.”—Ezequiel 9:5, 6; Zacarias 14:12, 13.
Ngem kasanonto daytoy? Kasano a ti Dios ti ayat mangtedto ti kasta a bilin? Wenno isu ketdi aya ti maysa a nakalamlamiis, awan ayatna ken manangibales a Dios nga awan pulos ti panangbigbigna iti sangatauan a parsuana? Wenno ti kadi Dios ti ayat iyegna ti gubat a kas ti Armagedon?