Kinaragsak Babaen iti Nasudi A Relasion

“TI MAYSA a nabiag nga aso naim-imbag ngem ti maysa a natay a leon.” (Eclesiastes 9:4) Kadagidiay sumagmamano a sasao, ni Ari Salomon idi ugma sinaona ti pamunganayan a kinapudno a ti biag ti ad-adda a napatpateg ngem ti aniaman a namaterialan a sanikua wenno aniaman nga ambisioso a kalat a mabalin a namnamaentay a maragpat. No awan ti biag, ditay pulos magunggonaan manipud aniaman kadagitoy a bambanag. Wen, ti biag nasken iti intay panagsapul iti kinaragsak.

Banag a “Nasaysayaat Ngem ti Biag”

Nupay no ti biag nakapatpateg, adda pay banag a nasaysayaat. ‘Posible kadi dayta?’ mabalin a panunotenyo. ‘Ania ngata ti napatpateg ngem ti biag a mismo?’

Ni Ari David iti kadaanan nga Israel mangted sungbat kadatayo. Kasasaona ti Namarsua, ni Jehova a Dios, kunana a buyogen ti nauneg a panangipateg: “Ta ti kinamanagayatmo nasaysayaat ngem ti biag, dagiti bibigko idaydayawdakanto.” (Salmo 63:3) Dagiti naimpusuan a sasao ni David ipakitana a ti panangawattayo iti kinamanagayat ti Dios, a naibatay iti kaadda iti nasayaat a pannakirelasiontayo kenkuana, ti ad-adda a nasudsudi wenno nasaysayaat ngem ti biag a mismo. Apay a kasta daytoy?

Aniat’ Mamagbalin a Posible ti Biag

Kas pangarigan adda inawatyo a regalo, banag a kaykayatyo unay. Siempre maragsakankayo nga umawat iti regalo ket nalabit maaddaankay ti dakkel a ragsak a mangus-usar iti dayta. Ngem pudno nga awan ti utangyo a naimbag a nakem, no dagiti pampanunotenyo ket saan a lumbes iti regalo nga agturong iti daydiay nangted. Saan kadi a ti personal a relasionyo iti daydiay nangted ti namagtignay iti dayta a regalo? No awan koma ti kasta a relasion, awan koma met ti regalo ket awan met ti panangtagiragsak iti dayta.

Pudno met dayta iti biag. Gaput’ kinapateg dayta, masapul a silalagiptayo no sadino ti naggappuan ti biag ken no kasano ti pannakasustener dayta. Siempre saantayo a pinarsua ti bagbagitayo, ket saantayo met a sussusteneren dayta nga agwaywayas manipud amin kadagiti nakaskasdaaw a sagana nga inaramid ni Jehova ditoy daga. (Salmo 100:3; Aramid 14:17) Ti kinapudnona nga adda biagtayo, ken awan duadua tagiragsakentayo dayta, ket ebkas ti kinamanagayat iti biang ti Naindaklan a Namarsuatayo, ni Jehova a Dios. Ditay aya makita no apay a naimpusuan ti panagrikna ni Ari David a “ti kinamanagayat [ti Dios] nasaysayaat ngem ti biag”?

Adda pay sabali a rason no apay a ti kaadda ti naanamongan a pannakirelasion iti Namarsua nasaysayaat ngem ti kaadda ti biag a mismo​—ti masanguanantayo agpannuray iti dayta. Kitaentayo no kasano daytoy.

Dikay kadi umanamong a ti biag aglabas ken napno kadagiti panagpangpangadua? Nalabit agtrabaho a sigagaget ti maysa a tao iti adu a tawtawen tapno magun-odanna ti sumagmamano a materialistiko a kalat a pampanunotenna a napateg. Kaskasdi, ti ipapatay di agbayag mangtakawto kadagiti isuamin a nagun-odanna. Isut’ kas kinuna ni masirib nga Ari Salomon: “Ta ania ti maadda iti tao iti amin a bannogna ken iti panagagawa ti pusona a nagbannoganna iti baba ti init? Ta amin dagiti al-aldawna isuda dagiti ladladingit laeng, ket ti ut-otna isu ti liday. Uray iti rabii saan a makainana ti pusona. Daytoy kinaubbaw met.”​—Eclesiastes 2:22, 23; idiligyo met ti 2:3-11.

Agpapan pay kastoy, panggep ti naayat a Namarsuatayo nga amin dagidiay agayat ken agtulnog kenkuana mawayawayaanto manipud kadagiti kinaubbaw ken kinabarengbareng nga isut’ gasattayo itatta. Impasiguro ni Jehova kadatayo dagiti nakaskasdaaw a karina: “Isuda didanto mangbangon ket sabali ti agnaed; didanto agmula ket sabali ti mangan. Ta kas kadagiti al-aldaw ti maysa a kayo kastanto dagiti al-aldaw ti ilik; ket dagiti pinilik agragsakdanto iti mabayag iti aramid dagiti im-imada.”​—Isaias 65:22.

Saan kadi a daytoy nga ebkas iti kinamanagayat ti Dios nasaysayaat ngem ti agdama a limitado ken agpangpangadua a biag? Tapno awatentayo daytoy a kinamanagayatna, wen, tapno agbiag iti dayta Baro nga Urnos ken tagiragsaken ti biag a napudno iti panggep ken kaipapananna ti pudno a maikari unay a kalat. Tapno magun-odan dayta naragsak a panginanamaan, masapul a magun-odan ti maysa itan ti anamong ni Jehova ken taginayonen ti nasinged a pannakirelasion kenkuana ken ti ilina.

Ti Apagbiit nga Interes Kontra Mabayag a Gunggona

Gapu kadagiti napalabas a punto, maysa a kinakuriteng ken saan a kinanainsiriban no ipamaysatayo dagiti bagbagitayo a nangnangruna iti panagsapsapul iti kabukbukodantay a paginteresan, a nalabit daytat’ kinatan-ok, kinabaknang, karera, nangato nga adal, personal a kaitungpalan, wenno aniaman nga ibilbilang dagiti dadduma a napateg iti daytoy a sistema dagiti bambanag. Numan pay dagitoy a kalat saanda met a dakes a mismo, ti panangsurot iti aniaman kadakuada kas ti kapatgan unay a banag nalabit mamagbalin kadatayo a mangliway kadagiti rebbengentayo iti Namarsuatayo. Kamaudiananna, mabalin a mapukawtayto ti anamongna ket ditayto magun-odan “ti pudpudno a biag.”​—1 Timoteo 6:19; Lucas 9:24.

Ti panangala iti kasta a kurso ti mabalin a maiyarig iti maysa nga agtutubo a dinan intuloy ti panageskuelana ket napanen nagtrabaho kas maysa a di nasigo a trabahador tapno maaddaan laeng ti kuarta a gastuen. Nalabit pampanunotenna nga isut’ nawayawayaanen manipud kadagiti kinainget ti eskuelaan ket isu itan addaan iti good time. Ngem saanna kadi nga isaksakripisio dagiti mabayag a gunggonana gapu laeng iti sumagmamano a mapagduaduaan a mabiit nga intereses? Umasping met iti dayta, saan kadi a kinakuriteng iti maysa a tao no liwayanna ti pannakirelasionna iti Namarsua gapu laeng ta isut’ okupado a mangsapsapul wenno mangsursurot iti sumagmamano a personal a kalatna?

Uray no kasanot’ kinaokupadotayo amin, masansan masarsarakantay met laeng ti panawen ken pigsa a mangaramid kadagiti bambanag nga ibilbilangtayo a napateg, saan aya? Gapuna, buyogen iti di nagbiddut a pannakaawat iti natauan a kasasaad, sibabatad a kinuna ni Jesus: “Ta no adino ti yan ti gupityo, addanto met idiay ti pusoyo.”​—Mateo 6:21.

Gapuna iti ania a kita ti “gupit” ti nangikabilanyo ti pusoyo? Ti kinaraniag ken buya ti lubong nalabit kasla makaallukoy kadakayo. Ngem saludsodanyo ti bagbagiyo: Kasano kapaut dagiti maipagpagarup a gunggona a magun-odan manipud kakasta a bambanag? Makaiyeg aya ti pudno a ragsak wenno apagbiit laeng a ragsak, kas ti droga, a mangibati pay iti di makaay-ayo wenno nasakit pay a bungana?

Agpilikay a Nainsiriban

Adda ti nagpateg a leksion a maadal manipud kadagiti tattao idi kaaldawan ni Lot. “Manganda idi, aginumda, aggatangda, aglakoda, agmulada, agbalayda,” kuna ni Jesus. Iti sabali a pannao, okupadoda a mangsursurot iti impagarupda a nasken, a dida pulos inikkan ti atension ti pagayatan ti Dios. Ti resulta? “Ngem idi aldaw nga iruruar ni Lot idiay Sodoma nagtudo manipud langit ti apuy ken asupre ket pinukawna amin ida.” Kalpasanna, agpaay a pakagunggonaantayo, innayon ni Jesus: “Kastanto iti aldaw a pannakaiparangarang ti Anak ti tao.”​—Lucas 17:28-30.

Amin ipampamatmatda a “dayta nga aldaw” adda kadatayon. Gaput’ pannakaseknanna iti agnanayon a pagimbagantayo, ni Jehova a Dios mangmangted ti maulit-ulit nga iyaawag babaen iti saona ken iti organisado nga ilina kadagiti amin a nasnasion. Ti awis ket isut’ panangtallikuden kadagiti inaagum a bambanag ket makikappian kenkuana. Pudno a saan a nainsiriban ti panangipalubostayo kadagiti personal nga intereses a mangokupar iti amin a tiempotayo ken pigsatayo, a gapu iti dayta ditay maipangag daytoy naayat a panangaw-awisna. Imbes ketdi, kas panagkuna ni apostol Pablo, bigbigentayo koma ti kinaganat ti panawen: “Adtoy! Ita isu ti tiempo a maiparbeng. Adtoy! Ita isu ti aldaw ti pannakaisalakan.”​—2 Corinto 5:20; 6:2.

Maysakayto aya kadagidiay mabendisionan iti naragsak a panginanamaan a makalasat inton panungpalan iti agdama a sistema dagiti bambanag nga agturong iti nalinteg a Baro nga Urnos nga inkari ti Dios? Agpannuray dayta iti ibilbilangyo kas kapapatgan iti biagyo itan ken no aniat’ aramidenyo iti pananggun-od iti naanamongan a pannakirelasion iti Dios. Ti panagpili adda kadakayo!

[Dagiti ladawan iti panid 5]

No siyayamankayo iti mannangted . . .

. . . ti ngay naindaklan a mannangted, ni Jehova a Dios?