Talna ken Talged​—Babaen ti Pagarian ti Dios

“DAGITI Pangpanggep ti Naciones Unidas ket: 1. Mangtaginayon iti internasional a talna ken talged.”​—Charter of the United Nations.

Daytoy ket makomendaran a panggep, uray iti bassit laeng a pamay-an. Ngem kas napaliiwtayo, dagiti nagbanaganna kadagiti napalabas nga 40 a tawtawen ti nalawag a mangipamatmat a ti Naciones Unidas saan a nagballigi iti ‘panangtaginayon iti internasional a talna ken kinatalged.’ Ket awan met ti aniaman a nakaidumaan ti panangiwaragawagna iti 1986 nga “Internasional a Tawen iti Talna.”a

Adda laeng maymaysa a pamay-an a mangiyegto ti agnanayon a talna ken talged ditoy daga​—babaen iti Pagarian ti Dios iti im-ima ni Jesu-Kristo. Daytoy ket pudpudno a gobierno idiay langit isu nga insuro ni Jesus nga ikararag dagiti paspasurotna. (Mateo 6:9, 10) Ngem apay nga agballiginto ngem ti Naciones Unidas saan a nagballigi? Iti simply a panangibaga: Ti Pagarian ti Dios agballigi gapu kadagiti rason a saan a nagballigian ti Naciones Unidas.

Saan Laeng a Kinasirib ti Tao ti Kasapulan

Kadagiti napalabas a ruartayo, impamatmatmi a ti maysa a rason no apay a ti Naciones Unidas ket maikari iti pannakapaay a ta saan nga inikkan ti Dios ti tao ti kinasirib wenno kalintegan a mangituray iti bagina met laeng. (Jeremias 10:23) Gapuna, awan ti inaramid-tao nga organisasion, kasanoman ti kasayaat ti panggepna, nga agballigi a mangiyeg iti talna ken kinatalged.

Maisupadi iti dayta, ni Jesu-Kristo, ti natudingan nga Ari iti Pagarian ti Dios, kankanayon nga indemostrana ti natantan-ok ngem tao a kinasirib. (Mateo 13:54) Ti kangrunaan nga ulidan isu ti nalatak a Sermonna idiay Bantay. (Mateo, kapitulo 5 agingga iti 7) Iti dayta inlawlawagna no kasano ti makasarak iti pudpudno a kinaragsak, mangrisot kadagiti panagriringgor, panangliklik iti seksual nga imoralidad, ken ti kaadda iti natalged a masanguanan. Saan kadi a nainkalintegan a ti maysa nga agturay nga addaan iti kasta a kinasirib ken pannakaawat iti kasasaad ti tao ammona ti mangiyeg iti talna ken kinatalged?

Malaksid iti dayta, ti pannakaawat ni Jesus pinarang-ay pay ti namilagruan a kabaelanna a mangkita iti puso dagiti tattao ken ti panangammoda iti pudpudno a pangpanggep ken dagiti panagem ti puso. (Mateo 9:4; Marcos 2:8) Usigenyo no ania ti kaipapanan dayta: Maysa a dakkel a lapped iti talna ken talged ita isu ti di panagtalek. Gaput’ di pannakaammo iti kapanunotan ken pangpanggep iti maysa ken maysa, dagiti tattao ken nasnasion masansan a saanda nga agtalek. Dayta a di panagtalek ti lapped iti talna. Ngem para iti agturay “a makabasa iti puspuso dagiti tattao,” dayta pulos a saan a parikut.​—Juan 2:25, Knox.

Panangikkat kadagiti Nabilbileg Ngem Tao a Kabusor

Ti sabali pay a kangrunaan a rason no apay a ti panangikagumaan ti Naciones Unidas a mangiyeg iti talna ket naikeddeng a maduprak isu ti impluensia “ti agturay daytoy a lubong,” ni Satanas a Diablo. (Juan 12:31) Isu ken dagiti demonio a buyotna ammoda nga addaanda laengen ti “bassit a tiempo” sakbay a maikkatda. Gaput’ determinadoda a mangipaay iti “rigat ditoy daga,” linapdanda ti talna babaen ti panangbingaybingayda iti sangatauan iti politika ken iti nasion.​—Apocalipsis 12:9-12.

Siasino ti makabalin a mangikkat iti nabilbileg ngem tao a mananggargari iti gubat? Sumungbat ti Biblia, ni Jesu-Kristo, ti natukoy a Miguel, isu a, kaduana dagiti anghelna, intappuakna ni Satanas ken dagiti demoniona manipud langit. Gapuna mabasatayo: “Ket nakitak ti maysa nga anghel [ni Jesus] a bumaba nanipud langit nga adda kenkuana daydi tulbek ti mangliwengliweng nga abut ken ti maysa a dakkel a kawar iti imana. Ket tiniliwna daydi dragon, ti uleg a kadaanan, nga isu ti Diablo ken Satanas, . . . ket isu ingarangugongna iti abut a mangliwengliweng ket inrikepanna ken sinelloanna ti rabawna.” (Apocalipsis 20:1-3) Gapuna maikkatto a lapped ni Satanas. Iti daytanto laeng a mabalin a tagiragsaken ti biag iti pudpudno a talna ken talged.

Maysa nga “Anak” ti Dios

Ti napalabas a ruartayo impamatmatna ti maikatlo a rason no apay a ti Naciones Unidas pulos a dinanto maiyeg ti talna ken talged: Dayta ti anak daytoy a lubong ket, iti kasta, dayta tinawidna ti pagkapuyan, pagdaksan, ken kinadakes a kasasaad dagiti miembrona a nasnasion.

Iti makabang-ar a pagsupadian, ti Pagarian a mangiyegto ti talna ken talged ti nailadawan idiay Apocalipsis 12:5 kas “anak” iti Dios. Dagiti agtuturayna isarmingda dagiti kababalin ti Dios. Paliiwenyo ti dadduma kadagitoy nakaay-ayat a kualidad nga iparangarang ti agturayna, ni Jesu-Kristo: managsakripisio nga ayat (Juan 15:12, 13); kinabara ken pannakipagrikna (Mateo 9:10-13; Lucas 7:36-48); kinapakumbaba (Juan 13:3-5, 12-17); kimanangngaasi (Marcos 6:30-34); pannakipagrikna (Hebreo 2:17, 18; 4:15); kinatibker a maipaay iti kinalinteg (Isaias 11:4, 5). Dikay kadi maragsakan nga agpaituray iti kasta nga Agturay?

Sumrek a Kadua ti “Baro a Daga”

Ti maudi a rason no apay a ti Naciones Unidas pulos a dinto agballigi a mangiyeg iti talna ti impamatmat dagiti sasao ti dati a Sekretario-Heneral a ni Dag Hammarskjöld nga, idi 1953, kinunana: “Ti kadadakkelan a namnamatayo a ta mapalubosantayo koma a mangisalakan iti daan a daga.” No pampanunotentayo ti panangisalakan itoy a sangalubongan a sistema dagiti bambanag, ngarud ti kasta a panangikagumaan a mangisalakan iti “daan a daga” naikeddengen iti saan a panagballigi. Apay?

Maysa a makagapu, daytoy “daan a daga” buklen dagiti inaramid-tao a gobgobierno a mangipaganetget iti nasionalismo, isu a mangbingaybingay iti tao; ti nasionalismo ipaganetgetna ti pagimbagan ti maysa a nasion imbes a sapulenna ti pagimbagan ti isuamin a nasnasion. Daytoy a panagimbubukodan ti mangpakapuy ti aniaman a panangikagumaan iti Naciones Unidas a mangiyeg iti talna. Iti editorial iti pagiwarnak a Briton a The Guardian napaliiwna: “Agsipud ta awan kadagiti miembro a nasnasion ti sisasagana a mangisakripisio iti bukodda a pagimbagan a maipaay iti pagimbagan ti isuamin, ti namnama iti panagbalbaliw ket mammano. Ti laeng pudno a trabaho ti [United Nations General] Assembly isu ti panagserbina a kas maysa a barometro iti sangalubongan a kapanunotan. Dagiti panagsasarita iti gimongna napno kadagiti isyu a napagsusuppiatan bayat dagiti tawtawen nga addaan laeng ti bassit no adda a rinang-ayan nga agturong iti solusion.”

Ngem addada ad-adda pay a makapilit a rason no apay a ti panangikagumaan ti Naciones Unidas a mangisalakan iti “daan a daga” ket awan ti mamaayna: Dayta ket maibusor iti pangpanggep ti Dios. Kasano a kasta? Iti imatang ti Dios ti “daan a daga” saanen a mabalbaliwan. Asidegen ti tiempo inton ti naibagan a panggepna matungpalton. Kas dineskribir ni apostol Juan: “Ket nakitak ti maysa a langit a baro ken maysa a daga a baro; ta daydi immuna a langit ken daydi immuna a daga napalabasdan.” (Apocalipsis 21:1) Iti panangikkatna kadagiti inaramid-tao a gobgobierno, ti Pagarian ti Dios ikkatennanto ti mangbingaybingay a nasionalismo. Iti lugarna “maysa a baro a daga,” maysa a nalinteg panagpampanunotna a natauan a sosiedad, ti rumang-ayto iti sidong ti maymaysa a nailangitan a gobierno, ti Pagarian ti Dios. Kalpasanna, ken iti daytanto laeng a tiempo, a ti sangatauan tagiragsakennanto ti pudpudno a talna ken talged iti sangalubongan.

‘Panangpanday iti Kamkampilanda a Pagbalinen a Dingding ti Arado’

A daytoy ket pudpudno a namnama ti impanamnama dagiti sasao ti maysa a padto ti Biblia a naikitikit iti diding a nakasango iti Naciones Unidas. Sadiay kunaenna: “Ket pandayendanto dagiti kamkampilanda a pagbalinen a dingding ti arado. Ket dagiti pikpikada pandayendanto a komkompay: ti maysa a nasion saannanto nga itag-ay ti kampilan a maibusor iti nasion. Ket didanto adalenen iti pannakigubat uray kaano.”​—Naadaw manipud Isaias 2:4.

Saan, ti Naciones Unidas saan a nagballigi a nanglapped kadagiti nasnasion a ‘mangitag-ay iti kampilan’ a maibusor iti maysa ken maysa. Nupay kasta, addada tattao a mangipaay iti sibibiag a pammaneknek a ‘pinandaydan dagiti kamkampilanda a pinagbalin a dingding ti arado.’ Imdemostrada ti panagkaykaysa a mangringbaw iti aniaman a lapped iti rasa ken nasion. Awan ti panangpilit a makapuersa kadagitoy a Kristiano a neutral a “mangitag-ay iti kampilan” a maibusor kadagiti padada a tao. Siasino dagitoy? Dagiti Saksi ni Jehova.

Ti pangarigan iti sungbatda no mapilitda a makipaset iti gubat iti nasion isu ti napasamak iti maysa a Saksi iti maysa a pagilian ti Africa a napnapno iti panagriringgor ken napolitikaan a terorismo.

Tapno makagun-odda kadagiti miembro ti buyot ti guerilia, maysa a grupo ti terorista iti daytoy a pagilian ti mangkidnap kadagiti lallaki ket kalpasanna pagpilienda ida: Agserbika iti buyot ti terorista wenno mapaltogan. Maysa nga aldaw kinidnapda ti maysa a Saksi ni Jehova. Dagiti papangulo, a nagiinum nangipaayda ti panagpili kenkuana. Babaen ti panangipasangoda iti dua a botelia ti beer, intudoda ti maysa a dayta irepresentarna ti gobierno, ket ti sabali ti grupo ti terorista. ‘Sadino ti pagpaayam?’ inimtuodda. Ti Saksi nagpanunot iti apagkanito, ket gaput’ nakitana ti sabali a botelia ti beer iti asideg, pinidutna dayta ket inkabilna iti nagbaetan dagiti dua, a kunkunana: ‘Ditoy ti ayanko.’ Kinunana pay: ‘Neutralak, agsipud ta agpaayak iti Pagarian ti Dios.’ Kalpasan daytoy, isut’ pinangpang-orda iti namin-adu a daras. Kalpasanna isut’ napilit nga agtrabaho iti kampo ti guerilia kas adipen, a dina ammo no isut’ mapaltogan wenno saan. Kalpasan ti walo a bulan, isut’ nawayawayaan idi a ti puersa ti gobierno ti nangatake iti kampo.

Dagiti Saksi ni Jehova nagpeggadda iti pannakaibalud, uray pay ti ipapatay, imbes, a makipasetda iti gubgubat dagiti nasnasion. Gapuna, idiay Nazi nga Alemania rinibribo kadakuada ti naikabil kadagiti kampo konsentrasion gapu ta saanda a suportaran ti Nazi a turay iti kinaranggas. Ginasgasut a Saksi ti napapatay wenno natay kadagiti kampo. Ngem itan, a ti dakes a turay ti gobierno a Nazi ti nabayagen a napukaw, adun dagiti Saksi ni Jehova idiay Alemania ken iti aglawlaw ti globo.

Ngem apay a nabaelanda a ‘pinanday dagiti kampilanda a pinagbalin a dingding ti arado’? Ti pangripiripan iti dayta ti masarakan idiay preamble iti UNESCO Charter, a kunkunana: “Agsipud ta dagiti gubgubat mangrugida iti is-isip dagiti tattao, masapul a maibangon dagiti depensa iti talna iti is-isip dagiti tattao.”

Maitunos iti dayta, no maipapan kadagidiay a ‘nangpanday kadagiti kampilanda a dingding ti arado,’ kuna ti padto ti Isaias, “ket didanto adalenen ti gubat uray kaano.” Imbes ketdi, babaen iti panagadal ken aplikasion iti Kasuratan, ‘adalenda dagiti daldalan ti Dios ket magnada iti daldalanna.’ (Isaias 2:3, 4) Babaen iti tulong ti nasantuan nga espirituna, ‘balbaliwanda ti panunotda,’ ket agbalinda a mannakikappia.​—Roma 12:2, 18.

Ti nalawag a pammaneknek a dagiti Saksi ni Jehova ‘pinandaydan dagiti kampilanda a dingding ti arado’ paneknekanna a ti panagbiag iti sidong ti talna ken talged posible. Ti agdama a pamay-an ti panagbiagda idemostrana iti bassit a pamay-an no anianto ti ibanag ti Pagarian ti Dios babaen ni Kristo iti isuamin a daga iti asidegen a masanguanan.

Ti kadi kasta a namnama awisennakayo? Dagiti Saksi ni Jehova maragsakandanto a mangiraman kadakayo ti pammaneknek a ti Pagarian ti Dios iyegnanton ti agnanayon a talna ken talged. Apay a dikay makiuman kadakuada iti lokal wenno agsurat kadagiti manangipablaak daytoy a magasin? Ammuenyo ti ad-adu pay maipapan iti no kasano a ‘pandayenyo dagiti kampilanyo a dingding ti arado’ itan, nga addaan iti namnama iti mabiiten a panangtagiragsak iti biag iti intero a lubong nga awan ti gubat.

[Dagiti Footnote]

[Kahon iti panid 5]

Apay a Di Nagballigi ti Naciones Unidas:

◻ Limitado ti sirib ti tao (Jeremias 10:23)

◻ Ti impluensia ni Satanas ti mangikeddeng ti panangikagumaanna iti pannakadadael (Apocalipsis 12:12)

◻ Dayta ti anak daytoy a lubong ket tinawidna dagiti pagkapuyanna (1 Juan 5:19)

◻ Padpadasenna nga isalakan ti “daan a daga,” a maibusor iti pangpanggep ti Dios (1 Juan 2:17)

Apay nga Agballigi ti Pagarian ti Dios:

◻ Ti agturayna addaan ti natantan-ok ngem tao a sirib ken mabasana dagiti puspuso ti tattao (Juan 2:25)

◻ Ikkatennanto ti dinidemonio a manggargari iti gubat (Apocalipsis 20:1-3)

◻ Dayta ti “anak” ti Dios, ket ti agturayna isarmingna dagiti kualidad ti Dios (Apocalipsis 12:5)

◻ Dayta ipasdeknanto ti maysa a nalinteg a “baro a daga” iti sidong ti maymaysa a nailangitan a gobierno (Apocalipsis 21:1)

[Ladawan iti panid 7]

Ti Pagarian ti Dios ipasdeknanto ti “maysa a baro a daga,” maysa a nalinteg a natauan a sosiedad, nga agandarto iti sidong ti maymaysa a nailangitan a gobierno