Ti Biag ken Ministerio ni Jesus

Adu a Samaritano ti Namati

IDI makapagsublida manipud Sicar nga adda awitda a taraon, nasarakan dagiti adalan ni Jesus idiay bubon ni Jacob a nangibatianda kenkuana. Ngem itan isut’ makisasaon iti maysa a babai a taga Samaria. Ti babai ti pimmanaw idi dimteng dagiti adalan, nga imbatina ti karamba a pagsakdona, ket isut’ nagturong idiay siudad.

Gaput’ napalalo nga interesna kadagiti bambanag nga imbaga ni Jesus kenkuana, kunana kadagiti tattao idiay siudad: “Umaykayo, kitaenyo ti maysa a tao nga imbagana kaniak ti amin nga inaramidko.” Kalpasanna, iti pamay-an nga isut’ mamagtignay iti panagusiuso, insaludsodna: “Saan ngata nga isu ti Kristo?” Naaramidan ti saludsod ti panggepna​—napan dagiti tattao tapno makitada met a mismo.

Kabayatanna, kiniddaw dagiti adalan ken Jesus a kanenna ti taraon nga inyegda manipud iti siudad. Ngem simmungbat: “Adda taraonko a dikay ammo.”

“Adda ngata nangyeg kenkuana ti makan?” insaludsod dagiti adalan iti maysa ken maysa. Inlawlawag ni Jesus: ‘Ti taraonko isu ti panangaramidko iti pagayatan ti nangibaon kaniak ken panangturpos ti aramidna. Dikay kuna aya nga adda pay uppat a bulan ket santo dumteng ti panagani?’ Ngem iti panangtukoyna iti naespirituan a panagani, kuna ni Jesus: ‘Ti agani umawat ti tangdan ket agurnong ti bunga a maipaay iti biag nga agnanayon.’

Nalabit makitkita ni Jesus ti dakkel nga epekto iti panangaskasaba daytoy babai a taga Samaria​—nga adu ti namati kenkuana gapu iti pammaneknekna. Idi dagiti tattao ti Sicar immayda kenkuana idiay bubon, indawatda nga isu ti agtalinaed tapno makapagpalawag pay ti adu kadakuada. Inawat ni Jesus ti panangawisda ket nagtalinaed pay iti dua nga aldaw.

Bayat a dimngeg dagiti taga Samaria ken Jesus, adu pay ti namati. Kalpasanna kinunada iti babai: “Ita mamatikami saan a gapu iti saom, ta dakami met laeng nangngegmi ket ammomi a pudno a daytoy ti manangisalakan ti lubong.” Pudno unay a ti babai a taga Samaria nangted ti nagsayaat nga ulidan no kasano ti panangtedda iti pammaneknek maipapan ken Kristo babaen ti panangpataud ti panagusiuso tapno dagiti tattao agsukimatda pay!

Laglagipenyo nga uppat pay a bulan sakbay ti panagani​—nalawag a ti panagani ti sebada, maar-aramid idiay Palestina iti primavera. Gapuna nalabit nga ita ket Nobiembre wenno Disiembre. Kaipapanan daytoy nga iti sumaganad a Pasko iti 30 K.P., ni Jesus ken dagiti adalanna ti nangbusbos ti walo a bulan wenno nabaybayag pay idiay Judea a nangaskasaba ken nangbautisar. Itan agrubuatdan a mapan iti teritoriada a Galilea a pagtaenganda. Aniat’ agur-uray kadakuada sadiay? Juan 4:27-42.

◆ Ania a panangaskasaba ti inaramid ti babai a taga Samaria ket ania ti imbungana?

◆ Kasano a ti taraon ni Jesus nainaig iti panagani?

◆ Kasanotay a maikeddeng ti kaatiddog ti ministerio ni Jesus idiay Judea a simmaruno iti Pasko iti 30 K.P.?

[Ladawan iti panid 25]