Report dagiti Manangiwaragawag ti Pagarian
Teokratiko nga Irarang-ay Idiay Venezuela
ITI sumagmamano nga aldaw ti pudotna ti aglaplapusanan ti panangparigatna. Dagiti lumablabas ti masmasdaawan unay iti pannakakitada kadagiti trabahador nga agob-obra iti sidong ti napalalo a pudot ti init idinto a dagiti sabsabali ad-adda a kayatda iti aginana iti maysa a linong wenno iti maysa a kuarto nga air-conditioned. Nagin-inot, ti sangal ti maysa a baro a pasdek ti nangrugin a tumpuar. Iti tallo ket kagudua a bulan, nairingpas dagiti lallaki ti uppat a grado a pasdek—ti baro a kanayonan ti pasdek ti sanga ti Watch Tower Society idiay La Victoria, Venezuela.
Daytoy kinapudnona ti maikadua a daras a napadakkelanen ti sanga idiay Venezuela nanipud pananglukatna idi 1946, idi adda laeng 13 a mangibumbunannag ti Pagarian iti pagilian. Idi 1977 ti bilangda ti dimmanon iti nasuroken a 13,000. Gapu itoy, maysa a baro a pasdek ti sanga ti nakompleto ken naidedikar idiay La Victoria iti dayta a tawen. Nanipud idin, ti bilang dagiti Saksi iti pagilian ti nasursurok ngem doble. Panawen manen ti panangpalawa.
Ti baro a nainayon (makinlikud a kanawan iti retrato), nga addan nasurok 20,000 pie kuadrado (1,900 m kuadrado) nga espasio iti suelo, nasursurok a paminduaenna ti dagup a kapasidad ti sanga. Ti pagnaan idiay makinkannawan a pungto ti agturong iti 15-kotse a garahe idiay sirok ti balay. Ti pagimalditan ti nairuar iti daydiay 1977 a patakder [ti atiddog a pasdek nga adda iti tengnga] a naipan iti umuna a grado iti baro a nainayon, a sadiay ti ayan met ti maintenance ken ti shop ti karpentero ken dadduma nga opisina. Ti dadduma iti baro a pasdek ti mangbukel kadagiti pagtaengan ti pamilia ti Bethel.
Ti baro a patakder ti naaddaan met iti kabukbukodanna a tangke ti danum ken ti generator a mangted ti koriente, ta ti kinakiddit ti danum ken ti panagpalya ti koriente ti masansan iti daytoy a paset ti lubong. Ken tapno gundawayan a naan-anay ti manayon a pudot ti init ken pul-oy ti angin, ti paglabaan ti masarakan idiay tuktok ti patakder.
Aniat’ pagarup dagiti lokal a tattao iti baro a naibangon? Nupay ay-ayen dagiti dadduma ti pannakapukaw ti nagpintas a hardin a naminsan adda idi sadiay, patien dagiti adu a ti patakder ti nanginayon iti mapagraraeman a langa iti sangakaarrubaan. Maysa a nalatak nga arkitekto, a nakangngeg ti adu unay maipapan iti dayta a panagbangon ti immay a kumita a mismo, ti nagkuna kadagiti kakabsat: “Awan duadua nga isu daytoy ti kapipintasan a naaramid a pasdek iti La Victoria.” Ti nagsiddaaw met isu ti inheniero ti munisipio, a siraragsak a nangted iti permiso iti panangokuparda ket sana kinuna: “Maysa a dayaw ti panangted iti permiso ti panangokupar iti maysa a pasdek a kas iti daytoy.”
Dagiti Saksi idiay Venezuela nagragsakda idi Abril 21, 1985, idi 15,802 kadakuada ti nagtataripnong idiay Valencia para iti dedikasion, ken 38,059 ti nagtataripnong kadagiti dadduma pay a lima a siudad tapno dumngeg iti programa babaen iti pannakaikonektarda kadagiti telepono. Dayta a bilang dagiti timmabuno ti nasursurok ngem ti dagup a bilang dagiti agibumbunannag iti pagilian. Agyamyaman ken siraragsakda iti daytoy nadiosan a sagana a nangkabal kadakuada tapno maikaskasabada a nasaysayaat pay ti naimbag a damag ti Pagarian sakbay a dumteng ti panungpalan daytoy a sistema.—Mateo 24:14.