Kasanotay nga Agbalin a “Makaay-ayo a Naan-anay” ken Jehova?

ITATTA, anian a nagtakkon dagidiay maseknan no dagiti pampanunotda, sasaoda ken ar-aramidda ket makaay-ayo iti Dios! Uray pay dagidiay agkunkuna a maseknan nangnangruna agparang a mangipapaayda laeng iti panagserbi iti Dios babaen kadagiti bibigda. Kinapudnona, mabalin a maikuna ti kaaduan: “Dida makaay-ayo iti Dios.”​—1 Tesalonica 2:15.

Patien dagiti sumagmamano a Kristiano a la ketdi no saanda a salsalungasingen dagiti Sangapulo a Bilbilin, isudan ti makaay-ayo iti Dios. Ngem saan a kasta! Ti Ulidantayo a ni Jesu-Kristo kunana maipapan iti Dios: “Siak agnanayon nga aramidek dagiti makaay-ayo kenkuana.” (Juan 8:29) Wen, inay-ayona ni Amana babaen ti panagaramid kadagiti bambanag. Kasapulan ti positibo a panagtignay, kas met laeng ti makita manipud iti kararag ni apostol Pablo a maipaay kadagiti kapammatianna idiay Colosas. Inkararagna a “magna[da] a maikari ken Jehova iti panangay-ayo a naan-anay kenkuana [bayat nga] agbungada iti isuamin nga aramid a naimbag.”​—Colosas 1:9, 10.

Kaskasdi, posible kadi ti agbalin a “makaay-ayo a naan-anay” ken Jehova? Bueno, gapu ta imperpektoda, dagiti Kristiano dida maay-ayo a naan-anay ti Dios. Nupay kasta, mabalinda a pagreggetan a sipapasnek dayta a banag, nga addaan panggep a mangay-ayo a naan-anay kenkuana. Yantangay nadakawat ni Pablo ti “agbunga iti isuamin nga aramid a naimbag,” mairaman ditoy dagiti positibo nga ar-aramid. Siempre, saantay a maibalabala amin ditoy dagita nga ar-aramid. Ngem makaipaaytayo iti sumagmamano a pagpanunotan. No ipamatmat dagitoy a punto nga addada dagiti sumagmamano a paset iti panagbiag a rumbeng a pangaramidanyo ti pagbalbaliwan, makasigurokayo a bendisionan ni Jehova dagiti panagreggetyo a mangay-ayo kenkuana. Ti kinapudnona a ta ti ‘panangay-ayo a naan-anay’ ken Jehova kasapulanna nga annadantay dagiti panagpampanunot, sasao, ken tigtignaytayo.

Komosta ti Panagpampanunottayo?

Ibaga ti Sao ti Dios kadatayo nga “awan ti aniaman a parsua a saan a sipapanayag iti imatangna, no di ket dagiti isuamin a banag addada a lamolamo ken agdadata kadagiti mata daydiay a pagidatagantayo.” (Hebreo 4:13) Di mabalin a basaen dagiti tattao wenno dagiti demonio dagiti pampanunottayo, ngem mabalinan dayta ti Dios. Gapu ta kasta, tarigagayantay koma a dagiti pampanunottayo a mismo ket makaay-ayoda kenkuana. Gapuna naimbag no saludsodantay ti bagbagitayo: Ania ti kayatko a pampanunoten no di kasapulan nga usarek ti panunotko iti agdama a trabaho? Ania ti polo, a kayariganna, ti gagangay a pagturongan ti pagitudo ti kompas ti panunotko?

Mabalintay met a maisaludsod: Kayatko kadi ti agar-arapaap ken agtagtagainep a mangtagtagiragsak iti kinabaknang, kinalatak, wenno dayaw gapu kadagiti gapgapuanan? Negatibo aya ti panagpampanunotko, kas iti panagtalinaed kadagiti rekreklamo, a dagita dagiti dagdagullitek? Palpalubosak aya nga agtalinaed dagiti pampanunotko a ngangngani agtultuloy kadagiti panagragragsak iti sekso? Wenno kanayon a pumpunnuek ti panunotko kadagiti plano ken ganuat nga agsapul iti kuarta?

Ita panunotenyo: Mabalin kadi nga agbalintayo a “makaay-ayo a naan-anay” ken Jehova babaen iti panangpunnotay ti is-isiptayo kadagita a pampanunot? Siempre saan! Gapuna babaen iti napasnek a panagkararag ken babaen iti tulong ti Dios, paksiatenyo ida babaen iti panangpunno iti isipyo kadagiti naimbag, positibo, makaay-ayo, nadalus, ken nakaay-ayat a pampanunot. (Filipos 4:8) Anian nga ad-adda a nasaysayaat kadatayo a disiplinaen ti is-isiptayo tapno agpanunot kadagiti bambanag maipapan iti panagdaydayawtayo ken Jehova! Panunotenyo ti Pagarian ti Dios, a nakaas-asidegen. Laglagipenyo dagiti punto a naadalyo iti nabiit pay manipud iti Sao ti Dios. Repasuenyo dagiti bambanag a mausig kadagiti mapasungad a panaggigimong ti kongregasion, ken nangnangruna ti aniaman a paset a mabalin nga adda kadakayo para iti programa. Pampanunotenyo met no kasanoyo a parang-ayen ti ministerioyo iti tay-ak. Laglagipenyo a dakayo, umuna unay, ket maysa a ministro a Kristiano.

Dadduma ti natultulongan babaen iti panangulitda kadagiti Kasuratan a naikabisadoda, agraman ti panangikankanta kadagiti kankanta ti Pagarian. Kas maysa a panangipalagip, maysa a Kristiano a ministro nasarakanna a makatulong ti panangputar ken panangpampanunot iti daytoy a rhyme:

“O God please help me to submit,

To what your will and love permit.

O may I never once rebel,

Since you are doing all things well.”

Wen, itultuloyyo ti agkararag kas ken Ari David idi ugma: “Dagiti . . . pampanunot toy pusok maawatda kadi”​—kayatna a sawen, makaay-ayoda​—“ita saklangmo, O Jehova.”​—Salmo 19:14.

Komosta Met dagiti Sasaotayo?

Inkararag met ni David: “Dagiti sasao toy ngiwatko . . . maawatda kadi ita saklangmo, O Jehova.” (Salmo 19:14) Kas naammuantayo manipud Santiago 3:2-12, ti laeng tao a perpekto ti naan-anay a makamedmed ti dilana. Ngem masapul a pagreggetantayo a mamedmedan dayta no kayattayo ti agbalin a “makaay-ayo a naan-anay” ken Jehova.

Nagadu a sasao ti iyeb-ebkastayo iti kada aldaw, ken, siempre, ditay mabalin a namnamaen a limitaran dagiti sasaotayo kadagiti Nainkasuratan a bambanag. Agpapan pay aniaman a banag ti sarsaritaentayo, nupay kasta, mabalintayo ti silalagip a kanayon a makaay-ayo ken Jehova. Kas pangarigan, ammotayo a ti panagsao iti dakes, wenno dagiti nagubsang ken bulgar a panagsasao ket saanda a makaay-ayo iti nailangitan nga Amatayo. Gapuna rebbeng a liklikantayo ti kakasta a panagsao.​—Efeso 5:3, 4.

Sa manen, no kayattayo ti agbalin a makaay-ayo a naan-anay iti Namarsuatayo maipapan iti sasaotayo, masapul nga annadantayo ti agsao ti makadadael a banag, a mangpardaya kadagiti dadduma. Rebbeng a maikuna koma kadatayo: “Dayta a saan a mamadpadakes gapu iti dilana. Ket saan a mangranggas iti gayyemna ket saan a mangumsi a maibusor iti kaarrubana.” Uray pay no agsagabatayo manipud kadagiti kinaulpit, agannadtay koma a “di agsao ti dakes maipapan iti uray siasino.”​—Salmo 15:3; Tito 3:2.

Anian a gundaway nga adda kadatayo nga agbalin a “makaay-ayo a naan-anay” ken Jehova no maipapan iti sasaotayo no oras ti pannangan! Gagangay saan nga oras daytoy a maipaay kadagiti naunget wenno mamagpungtot a sasao. Nagadu dagiti nagsasayaat a bambanag a mapagsasaritaan! Nangnangruna nga alertotay koma kadagita a gundaway no datayo ti sangngaili wenno mangsangsangaili. Masansan a dagidiay nalalaing a sumao imbes a dagidiay natataengan a Kristiano ti mangdominar iti panagpapatang. Maaddaankayto aya iti Kristiano a sangaili nga aduan adu a tawtawen a kapadasan ti amin tiempo a ministerio? Isu aya ti mannakaammo unay iti Sao ti Dios? No kasta usaren ti kinamannakaawat tapno makasakdo kenkuana. “Ti patigmaan iti puso ti tao kas nauneg a danum, ngem ti tao a mannakaawat maaonnanto,” nga agpaay a pakagunggonaan dagiti isuamin a siimatang.​—Proverbio 20:5.

Mainayon pay, tapno “makaay-ayo a naan-anay” ken Jehova iti panagsasaotayo, alertotay koma kadagiti gundaway a maipaay iti di pormal a panangaskasaba maipapan iti nagan ken Pagarian ti Dios. Kinapudnona, no maminsan dakdakkel ti magapuanan ti maysa a Kristiano a ministro babaen iti kasta a di pormal a panangaskasaba. Nupay kasta, ti kangrunaan a pamay-an a panangay-ayo ken Jehova babaen iti sasaotayo, bayat a pakabendisionan met dagiti dadduma, isu ti panagbalaybalay babaen iti mensahe ti Pagarian.​—Aramid 20:20.

Tapno dagiti sasaotayo ti “makaay-ayo a naan-anay” ken Jehova, no makipaspasettayo iti Kristiano a ministerio iti tay-ak, masapul a pagregreggetantay koma a kanayon a parang-ayen ti panangiparangtayo iti mensahe ti Pagarian. Agsipud ta naitalek kadatayo ti “naimbag a damag,” datayo, kas ken apostol Pablo, tarigagayantayo ti ‘agsao, saan a kas kadagiti mangay-ayo kadagiti tattao, no di ket ti Dios a mangsuot kadagiti puspusotayo.’ Ket di met liplipatan isu ti obligasion a panangusar kadagiti bibigtayo a mangipaduyakyak iti publiko iti pammatitayo kadagiti Nakristianuan a gimgimong, a sadiay mabalintayo ti mangparegta kadagiti dadduma iti ayat ken kadagiti naimbag nga ar-aramid.​—1 Tesalonica 2:4; Hebreo 10:23-25.

Ti ‘Panangay-ayo a Naan-anay’ ken Jehova Babaen iti Kababalin ken Ar-aramidtayo

Tapno agbalintayo a “makaay-ayo a naan-anay” ken Jehova, masapul a naannadtayo met iti inaldaw-aldaw a kababalintayo, agraman ti panaglinglingaytayo. Wen, uray pay no birbirukentayo ti intay panaglinglingay, ditay mabalin nga ipuera ti Dios. Aglablabes aya unay dayta? Nikaanoman, ta kuna ni Pablo: “Gapuna uray mangankayo wenno uray uminumkayo wenno uray ania nga aramidenyo, aramidenyo amin a maipaay iti dayaw ti Dios.” Ken laglagipentayo koma a kanayon ti pakdaar a “dagiti agbiag a linalasag saanda a mabalin nga ay-ayuen ti Dios.” Gapuna, kangrunaan ngem amin, rebbengna a dagiti panaglinglingaytayo koma ti makaay-ayo.​—1 Corinto 10:31; Roma 8:8.

Ket ditay met mabalin a lipatan dagiti bambanag maipapan iti kinatimbeng ken ti panangitiempo. Tapno agbalin a “makaay-ayo a naan-anay” ken Jehova, masapul nga ikabiltayo ti panaglinglingay iti umiso a lugarna, kas banag a nairana ken saan a kangrunaan. Ditay met koma pulos a birbiruken ti panaglinglingay, dayta man ti panagbuybuya iti naisangsangayan a programa iti TV wenno ti ipapan kadagiti ay-ayam, agingga iti punto a bay-antayo a dagita ti mangsinga iti itatabunotayo kadagiti Nakristianuan a panaggigimong wenno pannakiraman a kanayon iti tay-ak ti ministerio.​—Mateo 6:33.

Ti ‘panangay-ayo a naan-anay’ ken Jehova ramanenna met ti panagaramid ti naimbag kadagiti Kristiano a kakabsattayo no addaantayo ti gundaway ken no adda ti pakasapulan, Iti daytoy a pamay-an, mabasatayo: “Dikay lipatan ti panagaramid iti naimbag ken ti panagririnnaman, ta ti Dios pagay-ayatanna unay dagiti kakastoy a daton.” Kinuna ni apostol Pablo a ti kinamanangngaasi nga impakita dagiti Kristiano a taga Filipos kenkuana ket “daton a napateg, a pagay-ayatan unay ti Dios.”​—Hebreo 13:16; Filipos 4:18.

Kasano a dagiti ub-ubbing agbalinda met a “makaay-ayo a naan-anay” ken ni Jehova no maipapan iti kababalinda? Impakita ni Pablo a ti nagpateg unay a pamay-an isut’ babaen ti panagtulnogda kadagiti dadakkelda “gapu iti Apo.” Kinunana pay met: “Dakayo nga annak, agtulnogkayo kadagiti nagannak kadakayo kadagiti isuamin a banag, ta daytoy makaay-ayo unay iti Apo.”​—Efeso 6:1-3; Colosas 3:20.

Amin a dedikado nga ad-adipen ti Dios naglak-amda iti kasta unay a naayat a kinamanangngaasi ken Jehova ken manipud iti naindagaan a kalasuganna a, gapu iti aglaplapusanan nga ayat ken panagyaman, rebbengna a maseknantay koma a kanayon iti panagbalin a “makaay-ayo a naan-anay” kenkuana. Nalawag, ti naayat a panagyaman sapulenna a ditay koma “awaten ti di kaikarian a kinamanangngaasi ti Dios nga awan pagmamaayanna.” (2 Corinto 6:1) Ti panagbalin a maseknan iti naan-anay a panangay-ayo ken Jehova ket isu met ti nainkalintegan, ti umiso, a banag nga aramiden, yantangay isu ti Sapasap a Soberano. Mainayon pay, ti panangsapul iti ‘panangay-ayo a naan-anay’ ken Jehova ket isu met ti kasisiriban a kurso, ta ti panangaramid iti dayta ket makagunggona kadatayo itan ken salimetmetanna ti kari ti biag nga umay.​—1 Timoteo 4:8.

Wen, kayattayo a masalwadan dagiti panagpampanunottayo, dagiti sasaotayo, ken dagiti kababalin ken ar-aramidtayo. Babaen iti tulong ni Jehova, daytoy ti aramidentayo tapno ad-adda pay a makaay-ayo kenkuana. Ket iti panangaramid iti dayta, ditay koma sumuksuko. Imbes ketdi, sapay koma ta ipangagtayo a kanayon ti patigmaan ni apostol Pablo kadagiti Kristiano idiay Tesalonica: “Kamaudiananna, kakabsat, dawatenmi ken bagbagaandakayo ken Apo Jesus, a kas iti sinursuroyo kadakami no kasano ti rebbengmi a pannagna ken panangay-ayo iti Dios, kas ar-aramidenyo met, rumang-aykayo a rumang-ay koma.”​—1 Tesalonica 4:1.

[Ladawan iti panid 23]

Dikay palubosan ti panaglinglingay a mangsinga iti Nakristianuan nga aramid