Maysaka Kadi nga Amin-Tiempo a Saksi?
1 Sungbatanyo kadi daytoy a saludsod iti wen? Nupay saan nga amin a dedikado nga adipen ni Jehova ket makastrek iti amin-tiempo a ministerio, saan kadi nga umiso a namnamaen a matmatantay koma amin ti bagbagitayo kas amin-tiempo a Saksina? Rumbeng a kasta.
2 Awan ti makuna a paset-tiempo a Kristiano. Kinuna ni Jesus maipapan ken amana: “Kankanayon nga aramidek dagiti bambanag a makaay-ayo kenkuana.” (Juan 8:29) Ni Pablo, a kasta met laeng ti nariknana, indagadagna kadatayo nga ‘aramidentayo ti isuamin a bambanag a maipaay iti dayag ti Dios.’ (1 Cor. 10:31) Rumbeng ngarud a matmatantay amin ti bagbagitayo kas amin-tiempo a Saksi ni Jehova. Ti panangpampanunottay iti bagbagitayo kas amin-tiempo a Saksi maimpluensiaannatayo iti naimbag iti tunggal aramidentayo.
3 Usigenyo ti Ebidensia: Ti langa, panagsasao, ken kababalintayo maipakitana kadagiti sabsabali a tattao a datayo ket pudno a Saksi ni Jehova. Sipapanunottayo a nasken ti natakneng a panaglanglanga, nasayaat a panagsasao, ken umiso a kababalin no makiramramantayo iti tay-ak ti serbisio wenno tumabtabuno kadagiti Nakristianuan a gimong. Nupay kasta, mapantay man idiay eskuelaan, agtartrabaho, wenno aglinglingay, amin a banag maipapan kadatayo mangipaay koma iti ebidensia nga agbibiagtayo a maitunos kadagiti nalinteg a pagalagadan ni Jehova.
4 Kinuna ni Jesus: “Ti maysa a siudad di mabalin nga ilemmeng no naisaad iti rabaw ti maysa a bantay. . . . Agsilnag koma ti silawyo iti sanguanan dagiti tattao, tapno makitada dagiti nasayaat nga aramidyo ket mangipaayda ti dayag iti Amayo nga adda iti langlangit.” (Mat. 5:14-16) Rumbeng a pudno daytoy iti amin nga aramidentayo ken iti amin a gundaway. No mariknatayo nga agalikakatayo a mangasaba gapu iti lugar nga ayantayo wenno iti ar-aramidentayo, masapul nga iyimtuodtay iti bagbagitayo, ‘Agserserbiak kadi ken Jehova iti paset-tiempo wenno iti amin a tiempo?’ Ditay koma pulos palabsen ti gundaway a makisarita kadagiti sabsabali maipapan iti naimbag a damag ti Pagarian ti Dios.
5 Laglagipenyo, maidayaw ken maparagsaktay ni Jehova no masungbatantayo iti agal-allungogan a “Wen!” ti saludsod a, “Maysaka kadi nga amin-tiempo a Saksi?”