Naabutna ti Kalatna

Adu nga agtutubo itatta ti awanan ti panggep iti biag. Maisupadi iti dayta, maysa a tin-edyer a babai idiay Italia ti nangikabil iti kalat ket nagtenganna dayta, ket maragsakankami a mangiraman iti kapadasanna kadagiti managbasami.

ITI agarup makabulan pay makagtengakton iti edad a 14. Siak ti inaunaan kadagiti uppat nga agkakabsat a lallaki ken babbai. Ti pamiliak ket nabingaybingay iti naespirituan, ta ni tatangko ket saan a maysa a Saksi ni Jehova.

Ni nanangko nagbalin a maysa a Saksi idi sumagmamano pay laeng a bulanko. Nanipud pay idi damo, impapusona ti rebbengen a mangpadakkel kadakami nga annak iti “panangiturong-panunot ni Jehova.” (Efeso 6:4; Proverbio 22:6) Kinapudnona, agingga iti malagipko, kankanayon ti panangyadalna iti Biblia kadakami, agsaganakami a sangsangkamaysa a maipaay kadagiti gimgimong, ket kuyogenmi iti ministerio a panagbalaybalay iti linawas. Paneknekanmi met ti pammatimi idiay eskuelaan.

Nanipud pay iti kinaubingmi, pinadpadas ni Nanang nga impasagepsep iti pusomi ti panagtarigagay iti amin-tiempo a ministerio babaen iti panangibasana kadakami kadagiti kapadasan dagidiay Saksi nga adda iti amin-tiempo a ministerio iti adun a tawtawen. Kangrunaan ngem amin, isut’ nangipaay iti ulidan kadakami. Kinapudnona, pulos a saan a kalkalikaguman ni Nanang ti panangaramidmi iti maysa a banag a dina ar-aramiden.

Nupay no dagiti tattao siraragsak a dumngegda kadagiti ubbing a sumarungkar iti pagtaenganda iti ministerio, no dadduma nasungitda kadagiti nataengan a mangkuykuyog kadakuada. Naminsan idi agtawenak iti walo wenno siam, sumarsarungkarak kadagiti pagtaengan a kaduak ti maysa a panglakayen. Maysa a babai ti nanglukat iti ruangan, ket rinugiak ti panangiparangko. Iti nasungit a pamay-an, kinuna ti babai iti kabsat a lalaki: “Obligarenyo pay dagitoy a nakakaasi nga ubbing a mangasaba!” “Saan Madam,” dagus a simmungbatak. “No addaak ditoy, bukod a pagayatak dayta!” Kalpasan dayta, ti babai, saan a nakatagari, inawatna ti pagbasaan nga intukonko.

Idi agtawenak iti sangapulo, nakiramanak iti amin-tiempo a ministerio bayat ti bakasion iti eskuela idi Hulio, nupay no saanak pay a nabautisaran. Daytoy ramanenna ti bassit a sakripisio, ta masapul a laksidek ti ipapanko panaglangoy iti baybay. Nupay kasta diak nagbabawian dayta, agsipud ta ti ragsakko iti ngudo ti bulan ket di madeskribir.

Nabautisaranak idi Hunio idi agtawenak iti 12 1/2. Iti kalgaw dayta a tawen, nakiramanak manen iti amin-tiempo a ministerio, ket kalpasanna, babaen ti tulong iti maysa nga eskediol, nagsayaatan ti panangusarko iti bakasionko iti Krismas. Inaramidko daytoy agsipud ta iti pangrugian ti panageskuela, masapul a mangipaayak iti maysa a kalat. Naikeddengko, ket imbagak ken Jehova babaen iti kararag, a turposek ti panageskuela iti tawen nga addaan iti dayaw, magun-odak ti diploma iti maikatlo a tawen iti high school, ket sumrekak iti amin-tiempo a ministerio.

Nanipud idi inkeddengkon daytoy, naaddaanakon kadagiti parparikut. Agsipud ta nalaingak kadagiti dadduma a suheto, pilitendak dagiti mannursurok nga agtuloy nga agadal. Dakkel ti pannulisog ta kayatko ti ageskuela, ngem diak nalipatan ti kalatko ken ti karik ken ni Jehova.

Idi nakagtengen kadagiti mannursurok ti damag a diak kayat nga ituloy ti panagadalko, kimmaro ti panangpilit, uray pay iti biang ti maysa a mannursuro a pulos a di pay nangipakita iti panagayat kaniak idi. Tapno agtalinaedak iti natalged a lugar, siam a bulan sakbayna intedkon ti aplikasionko iti amin-tiempo a ministerio kadagiti panglakayen iti kongregasionko. Saan a nagsardeng ti panangpilit idiay eskuelaan, ngem iti daytoy a tiempo saanakon a dumdumngeg. Ti determinsaionko nakatulong met kaniak a mangparmek iti panangpilit dagiti kaeskuelaak.

Kamaudiananna naturposen ti panageskuela idi Hunio, ket idi Hulio, nangrugiakon kas auxiliary nga amin-tiempo a ministro. Adu dagiti bendision, ngem timmaud manen ti sabali a parikut. Adda dagiti magun-odan a trabaho iti paktoria a pagtartrabahuan ni tatangko, ket kayatna nga agtrabahoak a kaduana iti amin-tiempo. Basta diak ammo ti aramidek, ngem tinulongannak ni Jehova. Saanak pay a nakagteng iti 14 nga edad, gapuna didak maikkan iti trabaho.

Kalpasanna idi Agosto kinuna ni tatangko: “Inton Oktubre kaduakanton nga agtrabaho.” No mapanak agtrabaho iti dayta a paktoria awanton ti umdas a tiempok iti amin-tiempo a ministerio, ket gapu ta agtrabahoak a makisinnublat, malanganak met dagiti gimong. Inkararagko dayta ken ni Jehova.

Saan a nabayag ti iyaay ti sungbat ni Jehova​—ngangngani dagdagus nakasarakak iti paset-tiempo a trabaho! Ket, siraragsak, idi Setiembre 1, 1987, rinugiak ti regular nga amin-tiempo a ministerio. Nakaragragsakak ta diak makasarak kadagiti sasao a mangdeskribir iti rag-ok. Mariknak nga asideg ni Jehova kaniak, ket ikarkararagko nga itultuloynanto a bendisionan ti panangikagumaanko.​—Naipatulod.