Ti Iyaadani iti Dios Tinulongannak nga Agibtur

AWAN interesko iti relihion. Para kaniak, amin dagiti organisado a relihion kasla managinsisingpetda. Awan makitak a pakagunggonaan dagiti tattao, malaksid ti panagbalinda a di mangikankano iti sabsabali. Naladawen idi a ‘60’s. Napapatay idi ti presidente ti E.U., ket rinibo dagiti matmatay iti gubat idiay Vietnam. Nariribuk ti lubong. Agpangpangadua ti biagko. Kasano nga adda Dios a maseknan kaniak wenno iti sangatauan?

Agtawenak iti 27, naasawaan ken addaan dua a babassit nga annak, ken agtartrabaho iti amin-tiempo iti maysa a mental institution idi a nangrugi ti maysa a kaarruba a nakipatpatang kaniak maipapan ti Biblia. Makapasiddaaw ta dimngegak met. Inlawlawagna ti aw-awaganna a maudi nga al-aldaw. Naisalsalumina ti isalsalaysayna, ket kayatko ti malawlawagan. Imbatina kaniak ti libro a napauluan Ti Kinapudno a Mangiturong iti Biag nga Awan Inggana. Binasak dayta iti maysa a rabii, kinitak amin a nasitar a kasuratan, ken nagsiddaawak, ‘Talaga aya a nasarakakon ti kinapudno?’

No kasta, naipasango kaniak ti maysa a parikut. Naiyanakak iti maysa a Judio a pamilia, addaan Judio nga asawa ken dua nga annak, ken Judio a kakabagian. Ammok a gumurada no agbalinak a maysa kadagiti Saksi ni Jehova. Diak met kayat a sairen ida no saan a kasapulan; masapul a siertoak. Rinugiak ti naregget a panagbasa iti literatura ti Biblia. Iti las-ud ti maysa a lawas, naallukoyak a daytoy ti kinapudno. Masapul nga adalek ti kinapudno. Gapuna, rinugiak ti nakipagadal kadagiti Saksi ni Jehova. Iti las-ud ti sumagmamano a lawas nangaskasabaakon. Naragsakanak a nakaammo a Jehova ti nagan ti Dios, a maseknan kaniak ken iti amin a sangatauan, ket posible ti biag nga agnanayon iti paraiso a daga. Nabautisaranak idi Hunio 12, 1970.

Kas impagarupko, saan a naragsakan ti pamiliak kasta met dagiti nakaikamangak, ken binusordak dagiti dadduma. Pasaray makipagadal ni lakayko ngem di pulos nagbalin a manamati. Nupay kasta, nagbalin a Saksi ni Jehova dagiti annakko. Manipud damo, kayatko ti agbalin nga amin-tiempo a ministro, a mangikaskasaba ti naimbag a damag ti Pagarian ti Dios kadagiti ruangan. Ngem addaanak ti dumakdakkel a pamilia ken di manamati nga asawa. Uray no agtartrabahoak iti amin-tiempo, naawanankam ti dua a pagtaengan [gaput’ saanmi a pannakabayad], ken namin-adu daras nga awan pagnaedanmi. Narigat a talaga ti agbiag.

Naminsan, naisalda ti balaymi. Masapul a panawanmi ti balay iti tengngat’ aldaw ti Domingo, ket awan pagkamanganmi. Inaramidko ti amin a kabaelak, ket iti bigat ti Sabado, ti kasakbayanna nga aldaw, naikeddengko nga aramiden ti kas kinuna ni Jesus iti Mateo 6:33​—birukenyo nga umuna ti Pagarian ket urayen a ni Jehova ti mangipaay kadagiti bambanag a kasapulan. Rimmuarak a napan nangasaba. Nakasangitak gapu iti rigat a rimsua, ngem simmayaat met laeng ti riknak iti las-ud ti lima a minuto. Kankanayon a mariknak nga addaan positibo nga epekto kaniak ti panangasaba; pabang-arennak manipud kadagiti parikutko, ken kanayon a paragsaken, parang-ayen, ken ikkan ti espiritu ni Jehova ti kinapateg ti biagko. Nupay kasta, idi nagawidak iti dayta nga aldaw, awan pay laeng pagkamanganmi, ngem nasaysayaaten ti riknak.

Iti karabianna, nakaawatkami ti awag manipud iti ahensia ti real state a mangig-iggem kadagiti kasapulanmi. Agarup alas–11:30 t.r., ket maseknan unay ti ahente ti real state gapu ta awan pagkamanganmi, isut’ nangbiruk iti lugar a temporario a pagyananmi agingga a nakasaganan ti balay a pagyananmi koma. Isu nga idi Domingo, tinulongannakami dagiti padak a Saksi nga immakar iti dayta a balay. Nagnaedkam sadiay iti tallo a lawas a nakakarton pay laeng dagiti aruatenmi, sa kamaudiananna immakarkam iti balay idi a nakasaganan. Saan a nalaka ngem impaay ni Jehova kadagiti kasapulanmi. Daytoy ti nangpabileg unay kaniak ken nangpatibker iti pammatik. Kas ti adda a kinuna ni Ari David iti Salmo 37:25: “Nagubingak, ket ita lakayakon, diak pay nakakita iti sililinteg a nabaybay-an, wenno dagiti putotna man a makipalpalama ti kanen.”

Marigatankam a mangbadyet ti pundo ti pamilia. Sagpaminsan, kasapulan a siak ti mangiggem iti pundo ken mangpasayaat iti bambanag. Inkarkarigatak a pagtalinaeden ti panagasawami kadagita a tawen, kangrunaanna gaput’ panagayatko ken Jehova ken ti urnosna a panagasawa, ket il-iliwek nga agbalbaliwto ni lakayko ken dumasig iti kinapudno.

Kankanayon nga inkarkararagko ti agbalin a regular payunir, ket iti tunggal gundaway nagserbiak kas auxiliary payunir.a Ammok a ti panangasaba ti kasayaatan ken kapapatgan a pamay-an a pangusarak iti biagko. Ay-ayatek ni Jehova ken tartarigagayak ti amin-kararua a panagserbi kenkuana. Ay-ayatek met dagiti tao ken kalkalikagumak a tulongan ida. Naapresiarko manipud iti narigat a kasasaadko no kasano a makagunggona dagiti prinsipio ti Biblia ken nabigbigko a kasapulan dagiti tao ti namnama nga ipaay ti Pagarian. Ngem madanaganak di la ket ta agrigat ti pamiliak no diak agtrabaho. Marigrigatankami nga agbiag kas banagna.

Nagriawak, Nagtalaw ti Manangrames

Kalpasanna adda napasamak iti biagko a nangted kaniak iti pammati a kankanayon nga ipapaayan ken tultulongannak ni Jehova. Adda tao a nangserrek iti balayko ket pinanggepnak a ramesen. Rinautnak idi matmaturogak, ket idi nagbaringkuasak, namutbuteng a patayennak no agriaw wenno agkutiak. Nupay nagbutengak, tinulongannak ni Jehova a nagbalin a kalmado ket impamaysak ti panunotko tapno agkararag ken agpanunot iti kasayaatan a tignay nga aramidek. Napanunotko ti kuna ti Biblia maipapan ti panagriaw, ngem napanunotko a nalabit patayennak no aramidek, sa mariing dagiti annakko ket patayenna met ida. Ninamnamak a matayak idin, gapuna nagkararagak ken Jehova a salaknibanna dagiti annakko no bilang matayak. Uray kasta, inaramidko ti imbaga ti Biblia​—nagriawak. (Deuteronomio 22:26, 27) Nagtalaw ti manangrames. Talaga nga impagarupko a matayak idin a rabii. Ad-adda a simmingedak ken Jehova.

Nagsardengak a nagtrabaho ket rinugiak ti nagserbi kas regular payunir idi 1975. Nagpayunirak iti innem a tawen, ket binayadan ni lakayko dagiti utang. Makapaladingit ta nagsakitak iti diabetes iti nasapa nga edadko ken kasta unay ti rigatko iti maysa a gundaway. Tapno mapagballigiak, intultuloyko a pinarayray ti panagtalekko ken Jehova. Iti laksid dagiti kasasaadko, dagita ti kararagsakan ken kararang-ayan a tawen kaniak. Binendisionannak ni Jehova iti adu nga iyad-adalan ti Biblia a rimmang-ay agingga iti bautismo. Nagbalin pay ketdi a payunir ti dadduma.

Kalpasanna, idi 1980, nasinasina ti panagbiagmi. Nagsinakam ken lakayko. Mariribukan unay dagiti annakko, isu a pinadasko a salbaren ti panagasawami, ngem di inkankano ni lakayko dagiti panagreggetko. Iti daytoy a punto, ammok a panawenen a makisinaak a naibatay iti Kasuratan. Makadadael unay kadagiti annakmi ti epekto ti ipapanawna.

Inkarkarigatak nga intultuloy ti panagpayunirko kadagita a panawen ket nabaelak dayta iti agarup maysa a tawen. Nupay kasta, saan a nakaanus iti kasasaad ti balasangko, nangrugin nga agrebelde iti tunggal banag, agraman kaniak ken ti kinapudno. Insardengko ti nagpayunir gaput’ kababalinna bayat iti dayta a panawen. Daytoy ti nangpaliday unay kaniak; nagsardeng ti ragsak ti biagko. Nariknak nga agmaymaysaakon, a kas ket dagiti isuamin a banag naawandan malaksid ken Jehova.

Kadagitoy a panawen, nangipaay ni Jehova iti dua a manangipateg a kakabsat a lallaki a bimmadang kaniak iti kasta unay ngem iti pagarupda. Ti maysa ket manangaywan ti sirkito, ken ti sabali ket panglakayen iti sabali a kongregasion a nakaammo iti kasasaadmi, idi nga inyadalanna ni lakayko. Saan nga umdas ti panagyamanko ken Jehova gapu kadagitoy sagut a lallaki. Kankanayon a napategda unay kaniak.

Di nagbayag, ubing pay ngem nakiasawan ti balasangko iti awan iti kinapudno. Daytoy ti namagsisina iti pamilia ken naan-anay a nangpaliday kaniak. Kalpasanna, nagsolsolo a nagbiag ti barok. Awan ressat ti panangikarkararagko ken Jehova a tulonganna koma ti pamiliak a masalbar iti kinapudno. Napategda unay kaniak, ket ti laeng banag a kalkalikagumak isut’ panagtalinaedda koma ken Jehova. Daytoy ti kankanayon nga ikarkararagko bayat ti panagbiagko iti kinapudno. Daytat’ kadaksan a tiempo kaniak iti las-ud ti 20 a tawen a panagasawak​—nagdakes dagita a panawen. Nupay kasta, ammok nga uray kaskasano ket tulongannak ni Jehova, ken uray aniaman ti mapagteng, aramidek ti pagayatanna.

Maysa a pasamak ti malaglagipko unay. Payunirak pay laeng idi, ket naibusankam ti kuarta ngem kasapulanmi ti agarup $70 [E.U.] tapno maiturposmi ti maysa a lawas ken tapno adda pagpletemi iti sumaganad a makalawas a panagtrabaho. Nagtrabahoak iti dua nga aldaw kas temporario nga empleado. Gagangay nga agurayak iti makalawas sakbay a maalak ti sueldok​—agarup $40. Awan gastuekon maipaay iti taraon ken kurangen a pagpletek. Iti sumaganad a rabii inyadalak ti Biblia ti maysa a babai a nangiplete kaniak iti subway.

Ti sumaganad a bigat ket Biernes. Innalak dagiti naibuson, ket adda dua a surat. Ti maysa ket tseke a namnamaek pay laeng iti umay a lawas. Naipatulod iti banko idiay Siudad ti Nueva York ket indeposito ti banko iti accountko iti kurang a tallo nga aldaw. Anian a siddaawko. Kasapulak pay ti $29 wenno $30 tapno maan-anay ti kasapulak. Ti maikadua a sobre ket tseke a $29, apag-isu a kasapulak. Ti talaga a nakaskasdaaw iti daytoy a banag a ta idi Pebrero iti dayta a tawen, sinagutannak ti gobierno iti kuarta nga agpaay iti lana a pangpapudot ti pagtaengak. Agosto idi napanunotdan a nakautangda kaniak iti $29​—iti Agosto, agpaay a pagpapudot? Ti nakaskasdaaw ket no apay a napanunotda a nakautangda kaniak, ken ti lana iti dayta a bulan? Anian a makapabileg-pammati ti epektona kaniak!

Saan a Solusion ti Material a Bambanag

Nangrugiak a nagtrabaho iti amin-tiempo ken nasursurok nga usaren dagiti kompiuter iti trabahok. Nakarigrigat dagidi tawen a saanak a nagpayunir. Saanak a naragsak, nupay addaanakon iti permanente a panggedan ken kinatalged iti pinansial ken kadagiti material a banag. Agbukbukod nga agbiag dagiti annakko ket addaanda kadagiti narigat a parikut. Nagsubli iti kinapudno ti balasangko ngem addaan latta kadagiti parikut. Addada met parikut ti barok. Kalpasan ti sumagmamano a panawen, nariknak a mapukpukaw ti nadekket a relasionko ken Jehova nga ipatpategko unay. Nadlawko nga umad-adayoakon ken Jehova nupay awan ti makakitkita. Tumabtabunoak met kadagiti amin a gimong, agad-adal, ken mapan mangasaba, ngem saan nga umdas. Pinadasko ti makilangen nga ad-adda kadagiti gagayyem, ngem kaskasdi nga awan naitulongna.

Nangrugi a nakariknaak iti panangay-ay iti bagik. Nagpanunotak, ken tiningitingko ti bagik. Saan aya a maiparbeng no maaddaanak ti ad-adu pay? Nabatad a kastoy a panagpampanunot ti kalkalikaguman ni Satanas. Damo unay a nariknak a maal-allukoydak dagiti katrabahuak. Napanunotko, ‘Masapul a kasabaak ida.’ Ket inaramidko. Ngem iti un-unegko nariknak a ti pusok mangrugi a mangmatmat kadagiti bambanag a saan maiparbeng. Saan a dagiti addat’ aglawlaw ti parikutko. Ti bagik a mismo. Diak mapaglibakan ti sinanay-Biblia a konsiensiak. Nagkararagak ken Jehova.

Agtartrabahoak iti amin-tiempo. Masapul nga ibbatak ti napatanorko a kinatalged iti material. Agbiaheak iti tallo nga oras agpapan-agawid iti kada aldaw manipud Long Island aginggat’ Wall Street sadiay Manhattan, New York. Nawadwad unay a tiempo dayta! Kasta met, saan a simmayaat ti kasasaadko a makilangenlangen kadagiti nainlubongan a tattao kadagiti tren. Nakipatangak kadagiti panglakayen ken tinabunuak dagiti asamblea iti ngudot’ lawas tapno matulongandak a mangipamaysa kadagiti napateg a banag. Iti damo unay iti biagko, saanak a maseknan kadagiti material a banag, ngarud apay a tarigagayak ida manen ita? Kalpasan ti makatawen a panagkarkararag, siaannad a pinanunotko no balbaliwak ti kasasaadko, daytat’ inaramidko.

Immakarak iti Brooklyn Heights iti New York. Simmarungkarak iti kongregasion ket ammok a ti espiritualidad sadiay ti kasapulak. Nagadu dagiti matalek a Saksi, nga agserserbi iti amin-tiempo iti adun a tawen​—daytat’ nangbang-ar iti riknak a kasla kamengnakon ti kongregasion. Iti las-ud ti innem a bulan nakasaganaakon a mangibbet iti karerak ket agpayunir. Naaddaanak ti paset-tiempo a trabaho, ket idi 1984, nadutokanak manen kas regular payunir.

Kadagiti tawtawen, nakaskasdaaw ti panangbendision ni Jehova kaniak, agraman dagiti nakaad-adu a napateg a leksion. Pinadasko ti agtalinaed a positibo, ken makaadal iti tunggal narikut a kasasaad. Saan a nakababain ti maaddaan kadagiti parikut; ti basol rumsua no saan nga usaren dagiti prinsipio ti Biblia a mangrisut kadakuada. Ditoy Brooklyn, awanen parikut a kas dagiti napasarak idi damok pay laeng iti kinapudno. Saanen a parikut dagiti gastosen. Awan metten ti di manamati nga asawa. Naritubar toy pusok. Nabendisionanak kadagiti adu a naespirituan nga annak.

Ngem kanayon nga adda latta dagiti baro a parikut ken karit. Idi 1987, naaddaan iti nervous breakdown ken nagsagaba iti napalaus a panagliday ti barok a ni Marc, ngem tinulongannakam ni Jehova a nangsaranget iti dayta. Umim-imbagen ni Marc ken rumangrang-ayen iti kongregasion. Ti balasangko a ni Andrea ket nagsubli iti kinapudno ken nabautisaran ket padpadakkelenna dagiti annakna iti kinapudno. Yantangay umas-asidegtayon iti dakkel a rigat, sigurado nga agtultuloy dagiti parikut ken nalabit daddadakkel pay, ngem kankanayon nga adda ni Jehova a tumulong kadatayo a sumaranget iti aniaman a tuben wenno karit a mapasarantayo.

Pudno, tinulongannak ni Jehova a maaddaan ti biag a naragsak ken nabunga. Namnamaek a busbosek ti dadduma pay kadagitoy a mangitultuloy iti iyaadanik kenkuana ken panangaramid iti pagayatanna.​—Kas insalaysay ni Marlene Pavlow.

[Footnote]

[Ladawan iti panid 23]

Ni Marlene Pavlow, amin-tiempo a manangaskasaba iti naimbag a damag ti Pagarian