Ti Napasnek a Tarigagayko nga Agserbi iti Dios
Lima pay laeng ti tawenko ngem am-ammodakon kas ti pilia idiay pagay-ayaman. Nageskuelaak idiay Perkins School for the Blind.
BINUSBOSKO ti 13 a tawtawen ti panagbiagko iti daytoy nga eskuelaan idiay Watertown, Massachusetts, E.U.A. Ammok a bulsek amin dagiti ubbing idiay eskuelaan, ngem impagarupko a makakitaak. Didak pulos trinato dagiti nagannakko a naisalsalumina ngem kadagiti lima a kakabsatko a babbai. Inaramidko ti aniaman nga inaramidda—dagiti trabaho iti balay, panagiskating, panaglangoy, panagkalay-at kadagiti kayo, ken dadduma pay. Saanak a natrato kas bulsek, isu a diak pulos imbilang ti bagik a bulsek.
Naragragsakanak iti biag, nagay-ayatak ti pannakigasanggasat, ken nagagarak iti ragragsak. Inallukoyko dagiti ubbing nga agay-ayam kadagiti pagdayusdusan, pagindayonan, ken iti maysa nga agpallapallayog a bangka. Kasta unay ti panangipallayogko a nagikkisan dagiti ubbing, ngem sipipigsa a nagkantaak ken nagriawak kadakuada tapno maragsakanda. Ngem nalabit nasobraak dayta, isu a nagbatingting ti kampana ket naayabanak ket nabaotnak ti agay-aywan babaen iti sagaysay ken naipatugawak iti maysa a tugaw a nairanta kadagiti naalikuteg. Daytat’ naikabil iti abay ti agdan a malabasan dagiti amin a mannursuro. Masansan a makitadak sadiay ket makaellekda nga agkuna, “Addaka manen dita?”
Palubosandak biit a mangilawlawag no apay a naggianak iti daytoy nga eskuelaan dagiti bulsek. Naiyanakak idi 1941, ket idi agtawenak iti dua, naipakaammo kadagiti nagannakko nga addaanak iti tumor iti optic nerve ti maysa a matak. Kasapulan a maikkat ti matak. Bayat ti operasion, natakkuatanda a nagramaramen ti tumor iti optic nerve ti maysa pay a matak ken agturturongen iti utekko. Kaipapanan daytoy ti pannakaikkat dagiti matak wenno pannakatayko. Iti dayta a tiempo, 1943, naibilang a dakdakes ti pannakabulsek ngem ti pannakatay. Kinuna ti maysa nga espesialista ti mata: “No anakko dayta, palubosak laengen a matay.” Di kimmanunong ti maysa nga espesialista. “Saan, palubosanyo nga agbiag.” Makaparagsak iti biangko, pinalubosandak dagiti nagannakko nga agbiag. Tallo a tawen kalpasanna, am-ammodakon kas ti pilia idiay pagay-ayaman.
Naisuro ti tunggal ubing iti bukodna a relihion. Gapu ta Katoliko ni nanangko, sinuruandak dagiti madre nga immay iti linawas manipud ti asideg a kumbento. Inestoriada dagiti pakasaritaan dagiti “santo” a nangipaay ti bibiagda iti Dios, ket iti naganus nga edad, tinukaynak ti maysa a napasnek a tarigagay nga agbalin a kas kadakuada. Kayatko nga ipaay ti amin a biagko iti Dios, ngem kinuna dagiti madre nga awan namnamakon. “Dakeska unay,” kinunada. “Saannaka a kayat ti Dios!” Kinunada daytoy ta makiay-ayamak ngamin kadagiti ubbing a Protestante ken Judio, idinto ta imbagada kadakami a dagiti laeng Katoliko ti pakiay-ayamanmi.
Ad-adda a napagsimronko dagiti madre babaen ti panangdamagko maipapan iti nagan ni Jehova. Itan, pasaray makipagadal ni nanangko kadagiti Saksi ni Jehova, ket no agawidak maminsan iti makabulan iti ngudo ti lawas, mangngegko a ti nagan ti Dios ket Jehova. Idi dinamagko kadagiti madre no apay a didakami isursuro maipapan ken Jehova, nakapungtotda, isu a naparuarak manipud iti klase kas dusak. Nalabit, kaguddua kadagiti nasapa a tawenko ti binusbosko iti pannakaparuar iti klase wenno pannakaipatugaw iti tugaw dagiti alikuteg.
Gapu ta naimbag a Katoliko ni nanangko, kasano a nakipagadal kadagiti Saksi ni Jehova? Kalpasan ti pannakaoperak immay simmarungkar ti padi kenkuana ket kinunana a nakapungtot ti Dios kenkuana gaput’ panangaramidna ti maysa a banag a dakes unay isu a nabulsekak. Imbes a liwliwaenna ni nanang iti daytoy nga an-anduranna a panagleddaang isut’ pinabasolna pay ketdi. Kasta pay met a pinabasolna ti Dios iti pannakabulsekko. Dagitoy a komento ti padi ti nangtignay ken nanang nga awatenna dagiti Saksi ni Jehova no umayda—nga isut’ dagus nga inaramidda.
Imbagada kenkuana ti nakaskasdaaw a naimbag a damag ti Pagarian ken kasta met a ti Dios saan a Dios a mangpasakit no di ket managayat. Gapuna, inrugi ni nanang ti nakipagadal kadagiti Saksi. Nupay kasta, naunday met a panawen sakbay a nagdedikar nga agserbi ken Jehova. Isut’ naigamer unay kadagiti ulbod a sursuro ti Katolisismo. Ngem dagiti naad-adalna a kinapudno ti Biblia ket “mannakabalinda iti Dios a mangrebbek kadagiti nasarikedkedan unay a banag,” isu a nagpabautisar ni nanang idi 1954 kas maysa kadagiti Saksi ni Jehova.—2 Corinto 10:4.
Itan, iti tunggal ngudo ti lawas iti binulan a panagawidko, kayat ni tatang a mapankami iti simbaan dagiti Baptist, dadduma kadagiti manangko ti mapan iti simbaan dagiti Metodista, itugotnak ni nanang idiay Kingdom Hall, ket maipagpaganetget unay idiay eskuelaan ti pannakaisurok iti Katolisismo. Aggigiddan ti uppat a nagduduma a relihion iti maysa a pamilia! Isu a mariribukanak unayen no aniat’ umiso a pamay-an ti panagdayaw iti Dios.
Idi agtawenak iti 16, kimmarkaro pay ti napasnek unay a tarigagayko nga agserbi iti Dios iti umiso a pamay-an. Inkararagko ken Jehova a no makiasawaakto, isuntot’ maysa a lalaki nga addaan ti umiso a relihion, aniaman dayta. Bueno, dimteng ti aldaw a nagparang daytoy kasla makaallukoy a lalaki a mayat a mangikasar kaniak. Ket gapu ta isut’ Katoliko ken kasla imbaon ti Dios kas sungbat ti kararagko, impatok a ti Katolisismo ti umiso a relihion. Nanipud idin, inkeddengko nga agbalinak a naimbag a Katoliko ken asawa ken ina.
Ngem makapaladingit, ta nagbalin a daksanggasat ti pannakiasawak. Iti las-ud ti 10 a bulan, naparaburankami iti anak a babai ket 22 a bulan kalpasanna, maysa nga anak a lalaki, bayat ti ikakaro ti kasasaad ti pannakiasawak. Masiguradok a dimmakes a talaga dagiti bambanag.
Nagbiddutak; dimmakes dagiti kasasaad. Naiyugalimin ti mapan makisala tunggal rabii ti Sabado, ket kalpasanna, agsubli ti grupo iti balaymi tapno agmerienda. Ngem iti daytoy naisalsalumina a Sabado, napankami iti balay ti maysa a gayyem a lalaki. Bayat ti kaaddami sadiay, nangngegko ti plano ni lakayko nga agsisinnukatda iti asawa agpaay iti seksual a panggep. Maysa a ganggannaet ti adda sadiay, ket dinamagna no sinot’ kasinnukatna, ket nangngegko ni lakayko a nagkuna: “Mabalin ti asawak.” Nagbutengak, naklaatak, nagtalawak iti dayta a balay. Kadagiti nasapa nga oras ti parbangon, sinagabak dagiti banag ti panagtalawko. Idi nagawid ni lakayko, kasta unay ti panangmalona kaniak. Kinunana a ti makagapu isut’ ‘panamagbalinko kenkuana a maysa a maag.’
Iti intero nga aldaw ti Domingo, sipapasnek a nagkararagak ken Jehova a no adda pudno a relihion, maysa nga umiso a pamay-an ti panagserbi kenkuana, isurona koma kaniak. Ta no saan, kayatkon ti matay. Ti kakaisuna a manglaplapped iti pananggudasko iti biagko ket dagiti dua a babassit nga annakko. Siasino ti mangaywan kadakuada no matayak?
Iti kabigatanna, sakasakaak idiay ruar a manggapgapas iti karuotan—ti panagsakasakak tulongannak a mangammo no sadino ti kasapulan a matabasan idiay karuotan. Immay ti dua a Saksi ni Jehova, lalaki ken babai. Diak pulos malipatan ti kinasingpet ken kinaemma ti panagsao ti lalaki, ket adda intugotna a naisangsangayan nga artikulo iti Braille a pinataud ti Watch Tower Society. Intedna dayta kaniak ket kiniddawna no mabalinda ti agsubli iti sumaganad a lawas. Saanak a talaga a situtulok iti daytoy, ngem gapu ta agpadada a nasingpet ken mannakigayyem, saanak a nakapagkedked. Malagipko pay laeng ti pannagnak a nagsubli idiay balay a mangpampanunot: “Diosko, saan nga isuda, saan a dagiti Saksi ni Jehova! Saan kadi a mabalin a sabali laengen a relihion?”
Nagsublida a talaga, ket linawas a nagadalkami iti Biblia. Idi agangay, dua a babbai, ni Judy ken ni Penny ti immay. Dagitoy ket amin-tiempo a ministro (maaw-awagan espesial payunir) ket naisangsangayanda a bendision manipud ken Jehova. Ni Judy ket mannanao ken naingayyeman ken kasta met nagaget nga agadal ken nakasigsigo a mangbiruk kadagiti teksto ti Biblia. Ni Penny ket naul-ulimek ngem nainget a mangdisiplina isu a kasapulak. Ipapaayda ti intero a biagda iti panagserbi ken Jehova, ket idi agangay kayatkon ti agbalin a kas kadakuada imbes a kas kadagiti “santo” nga insarsarita dagiti madre kaniak.
Idi dinakamatda ti ipapanko panangasaba kadagiti ruangan a kas ar-aramidenda, napanunotko, ‘Saan, didak manamnama a mangaramid iti dayta! Bulsekak!’ Diak pulos pinagpambar idi ti kinabulsekko tapno liklikak ti panangaramid ti aniaman, ngem ita napanunotko, ‘Saan a siak. Diak rummuar nga agserbi kadagiti ruruangan.’ Isu a nakunak: “Kasanok a mabasa dagiti teksto kadagiti ruruangan?” Siemma a kinuna ni Penny: “Maimemoriam dagiti kasuratan, di kadi?” Ammona a mabalinak, agsipud ta iti tunggal lawas ket paimemoriada kaniak ti dua a baro a teksto. Diak makapagkedked iti aniaman kada Judy ken Penny!
Kalpasan ti pannakipagad-adalkon iti dua a tawen, inkeddengko a tabunuan ti Pananglaglagip ti ipapatay ni Kristo idi 1968. Nagkararagak sakbay a nagpakadaak ken lakayko. Ammok nga isut’ umingar a siraranggas, nga isut’ inaramidna. Inbugkawna a kaykayatna laengen a makitanak a matay ngem ti agbalin a maysa kadagiti Saksi ni Jehova. Ginammatanna ti maysa a kutsilio ket intutokna dayta iti tengngedko. “Ibagam kaniak a dika mapan, ket dikanto papatayen!” Siuulimek a nagkararagak ken Jehova: ‘Tulongannak nga agmatalek uray no kasapulan a matayak.’ Nasdaawak a nakarikna ti bang-ar ken nakapanunot iti, ‘Aniat’ kaes-eskan ti biag no saanak nga agserbi ken Jehova?’ Kasla awan gibusna daydin, ngem kamaudiananna inebbatanna ti kutsilio iti suelo. “Dika mapapatay,” inyanug-ogna. “Kayatko, ngem diak maaramid. Diak ammo no apay.”
Bayat ti rambak ti Memorial, aglaplapusanan ti pannakariknak iti kinatalna ken kinasinged ken Jehova. Idi nagawidak, narikepanakon, ket addan iti ruangan dagiti aruatek. Nakiturogak kadagiti nagannakko. Kalpasanna nagtultuloy dagiti pangta ti kutsilio iti tengngedko, ken dagiti pannakamalmalo. Masansan a marikepanak iti balay no agawidak manipud kadagiti gimong. Kinuna ni lakayko: ‘‘No agserbika ken Jehova, isu ngaruden ti mangaywan kenka.’’ Insardengnan ti mangted ti gastuen. Naibusankamin ti taraon, awanen ti ibayadmi ti gas ken koriente, dikam mabayadanen ti abang ti balay. Ngem ni Jehova kankanayon a tinarabaynak ken dagiti ubbing.
Idi Hulio 1969 naangay ti maysa a dakkel a kumbension dagiti Saksi ni Jehova idiay Siudad ti Nueva York. Maysa nga oras sakbay ti iluluganko iti tren, rinangetnak ni lakayko, inaramidna dagiti datin a pammutbutengna, ket intutokna manen ti kutsilio iti tengngedko. Ngem nairuamakon kadagita ket diak pulos naupay. Iti dayta a kumbension, idi Hulio 11, 1969, insimbolok ti dedikasionko ken Jehova. Maysaak kadagiti 3,000 a kumbensionista a nabautisaran iti maysa a baybay.
Mamindua iti makatawen, busbusbosek ti 75 nga oras iti tunggal bulan, nupay pinaritannak ni lakayko a rummuar iti tay-ak ti serbisio. Ammok a bilin ni Kristo Jesus ti mangasaba, ket masapul nga agtulnogak kenkuana. (Mateo 24:14; 28:19, 20) Nupay kasta, sigagaget a nagtrabahoak idiay balay. Sinalimetmetak ti kinadalus dayta. Insaganak iti apag-isu a tiempo dagiti taraon ni lakayko. Kadagiti rabii dagiti gimong, naglutoak kadagiti paboritona a taraon. Apaman a makaawidakon, mangisaganaak kadagiti naisangsangayan a dulsena. Uray pay kasta, kasta unay latta ti panagreklamona. Nagrigat ti mapagsasawan no isut’ pakpakanem iti paboritona a dulse!
Idi 1975 inyakar ni lakayko ti pamilia idiay California. Idi Nobiembre 1976, nagpatingga ti panagasawami, kalpasan ti 17 a tawtawen. Diak pulos tinarigagayan ti makisina. Diak pulos pinati ti panagsina. Idiay Malakias 2:16, kinuna ni Jehova a ‘guraenna ti panagsina.’ Daytat’ maysa a makariribuk unay a kapadasan a sinarangetko. Nainayon pay iti panagleddaangko, dagiti annakko ti nakipagtaeng iti amada idiay California. Nagsubliak iti makindaya a paset ti E.U. nga isut’ datin a nagtaengak.
Nagtaeng sadiay dagiti nagannakko, a nangipaay kaniak iti nadungngo ken naayat a panagubing. (Natayen ni tatangko, ngem ni nanangko ket sibibiag pay, nasuroken a 80 ti tawenna ket maysa pay laeng a matalek a Saksi iti ngangngani 40 a tawtawen.) Agsolsoloak nga agbibiag, nupay kasta, ket ipapaay ni Jehova amin a kasapulak: pagtaengan, taraon, kawes, kuarta, panggedan no kasapulak ida, ken adu a naayat a gagayyem a makaandingay ken makaparegta unay. Maysa a nabayagen a gayyem, ni Judy Cole, nupay adayo itan ti pagtataenganna, ti kanayon nga umawag kaniak iti telepono, ibasbasaannak kadagiti artikulo manipud iti Ti Pagwanawanan, ken parparegtaennak. Isut’ kasayaatan a gayyemko—maikadua laeng ken ni Jehova, siempre, a ti pannakigayyemnat’ ad-adda nga ipatpategko ngem iti aniaman a pannakirelasion a mabalin a magun-odak!
Idi Oktubre 1, 1986, iti alas-onse iti rabii, immawag kaniak manipud San Diego, California ti balasangko a ni Linda. Kinunana kaniak nga iti daydi a kanito, ti anakko a ni Stephen, a 23 años idin, ti adda iti intensive care ket din manamnama pay nga agbiag. Bayat a nakalugan iti motorsiklona iti maysa nga agkurba a dalan, nadungparna ti maysa a kayo, ket natinnag iti nasurok a 45 metro a derraas, ken nagdisso iti maysa a ginget iti baba. Maymaysa a balay ti adda iti asideg. Alas dos idin iti parbangon, ngem ti lalaki nga agtataeng idiay ket nairana a nakariing pay laeng nga agad-adal. Nangngegna ti pannakadungpar, rimmuar, nakitana ti napasamak, ket dagus nga inayabanna dagiti paramedics sadiay.
Awan ti puot ni Stephen, natukkol ti dua a sakana, narumek ti tumengna, ket kasta unay ti panagdara ti utekna. Idi nakagtengak sadiay, kinuna kaniak dagiti doktor a dida namnamaenen nga isut’ agbiag. Awan a pulos ti puotna iti maysa a lawas. Addaak sadiay idi isut’ nakapuoten. “Hi, Mama,” kinunana. Dagiti kararagsakan pay laeng a sasao a nangngegak! Isut’ agbiag! Nanayonan pay ti rag-ok idi ni Stephen ket nagbautisar kas maysa kadagiti Saksi ni Jehova idi Hulio 1988, maysa a tawen kalpasan ti aksidentena.
Maysa pay a rag-o ti manglawag itan iti biagko: nangaramid ti Watch Tower Society iti adu a literatura a magun-odan iti Braille! Daytat’ nakaskasdaaw, nagsayaatan a sagut kaniak! Idi naammuak ti kinapudno, awan pay laeng ti magun-odan a Braille. Ngem ita, addan ti libro a Naindaklan a Mannursuro, ti libro a Dagiti Estoria ti Biblia, ti libro nga Iyimtuod ti Agtutubo, ken ti nabiit pay a libro a Ti Katan-okan a Tao a Nagbiag Pay Laeng.
Kas pananggupgop makunak nga amin dagiti nakasuotak ti ad-adda pay a nangiyadani kaniak ken Jehova. Dagitoy pinabilegda unay ti pammatik. Diak pulos naikapis iti panagkita, diak pulos ammo ti kasasaad ti makakita. Siempre, nakakitaak agingga a nagtawenak iti dua, ngem diak pulos malagipen dayta. Ngem, ti maysa kadagiti paboritok a teksto isut’ Salmo 145:16, a kunaenna: ‘Uk-ukraden ni Jehova ti imana ken pennekenna ti tarigagay ti tunggal nabiag.’ Aniaman dagiti tarigagay a saan a mapennek ita ket mapennekto iti inkarina a Paraiso a daga, a sadiay pagbalinennanto amin a bambanag a baro. (Apocalipsis 21:3-5) Makakitaakton, kas impalagip kaniak ti maysa a Saksi.
Ti rag-o nga adda iti pusok ita isut’ gundawayko a mangitungpal iti agnanayon iti napasnek a tarigagayko nga agserbi ken Jehova!—Kas insalaysay ni Collette Nunes.
[Blurb iti panid 19]
“No anakko dayta, palubosak laengen a matay”
[Blurb iti panid 19]
“Dakeska unay,” kinunada. “Saannaka a kayat ti Dios!”
[Blurb iti panid 20]
Ti padi pinabasolna ti Dios iti pannakabulsekko
[Blurb iti panid 20]
Nangngegko ti plano ni lakayko nga agsisinnukatda iti asawa
[Blurb iti panid 21]
Ginammatanna ti kutsilio ket intutokna dayta iti tengngedko. “Ibagam kaniak a dika mapan, ket dikanto papatayen!”
[Ladawan iti panid 17]
Ni Collette ken ti mangiwanwan nga asona
[Dagiti Ladawan iti panid 18]
Ni Collette idi agtawen iti 17 ken 2 (idi isut’ makakita pay)