Banag a Dakdakes Pay Ngem AIDS

“Dagiti panangsukimat ket positibo. Addaanka iti AIDS.” Dagidiay a sasao ti immaweng iti isipko bayat ti panangibabak iti telepono iti maysa nga aldaw idi napan a tawen. No koma no impangagko ti balakad ti Dios ken inyaplikarko dayta mabalin a naliklikak koma daytoy!

NAPADAKKELAK kas maysa a Saksi ni Jehova idiay estado ti Washington, ket sinigurado dagiti dadakkelko nga ammok no ania dagiti kalikaguman ti Dios. Gapuna nasdaaw dagiti adu a tattao idi rinugiak ti nagbiag a maisupadi iti pannakasanayko idi ubingak pay.

Ti agbalin a pagay-ayat dagiti dadduma nga ubbing idiay eskuelaan isu ti tartarigagayak. Pinadasko dagiti isuamin a bambanag tapno awatendak. Bueno, awan ti mamaay dayta, ket idi agtawenakon iti 15, pagarupek nga awanen ti namnamak iti isuamin. Pinadasko pay, nga awan ti panagballigina, ti agbekkel.

Gaput’ pagarupek a pasayaatenna dagiti bambanag, rinugiak ti nagusar iti tabako ken marihuana. Bueno, dina met pinasayaat dagiti bambanag. Kalpasan dayta, inkeddengkon a panawan ti organisasion ni Jehova tapno sapulek ti kinaragsak iti sabali a lugar. Impakaammok kadagiti gagayyemko idiay eskuelaan a saanakon a maysa a Saksi ni Jehova, ket kasla kayatda dayta.

Ti Immoral, di Agtutunos a Panagbiag

Kamaudiananna nakasarakak iti trabaho ken kasta met maysa nga apartment iti lugar dagiti walang, a sadiay ti pagpalpallailangan dagiti mammartek ken dagiti balangkantis. Imbagada kaniak no kasano a nakalaklaka a pagbalinen a kuarta dagiti taktika. Babaen iti tulongda, di nagbayag nasursurokon dagiti pamay-an. Nangrugiak a maysa nga agtarigagay nga agbalin a kaykayat ti tunggal maysa ken agbalin a naragsak a nagturong iti maysa nga us-usaren ti tunggal maysa ket nakalidlidayak.

Tarigagayak ti agbalbaliw, kayatko ti agawid ket mangrugiak manen. Mailiwak kadagiti dadakkelko ken iti biagko idi. Gapuna nagkararagak ken Jehova a maipaay iti tulong. Ti narigat a paset isu ti iyaadanik kadagiti dadakkelko ket dawatek ti pammakawanda. Agyamanak, ta nasarakak ti naimpusuan a pammakawanda kaniak.

Dagiti Kristiano a panglakayen nakipagkitada kaniak, ket inyebkasko ti tarigagayko a maisubli iti kongregasion. Saan a nalaka para kadakuada wenno para kaniak. Saan laeng nga addaanak kadagiti parikut iti epekto iti panangabuso ti droga no di ket nakaalaak pay iti nakaro a benereal a sakit. Imbaga ti doktorko kaniak a no nagurayak pay iti uray maysa laeng a bulan, mabalin a natayakon. Anian a gulo ti sinerrekko!

Kabayatanna, naisubliakon, ket nangasawaak pay iti maysa nga agtutubo a babai manipud iti kabangibang a kongregasion. Simmayaaten dagiti bambanag. Kaskasdi, diak pay laeng apresiaren ti ayat ni Jehova. Padpadasek nga aramiden dagiti bambanag a bukodko imbes nga agtaklin kenkuana a maipaay iti bileg.

Nakurkurang a dua a tawen kamaudiananna, naidiborsioak ken nailaksid manen gapu iti imoralidad. Nairamanak kadagiti nailubongan a tattao. Idi damo diak pagaammo dayta, ngem ti Nainkasuratan a pakdaar mapaneknekan nga umiso: “Ti dakes a pannakikadua dadaelenna dagiti nasayaat a kababalin.”​—1 Corinto 15:33.

Nailumlon Manen iti Kinadakes

Babaen ti iyaadayok, pagarupko a saanko a dangran iti kasta unay ti pamiliak. Awan ti parikutko a nagsapul iti trabaho ken iti pagtaengan idiay San Francisco, California. Maysa a managlako iti droga ti nangitukon kaniak iti trabaho nga agiwaras kadagiti droga. Nakikaduaak met kadagiti natatan-ok a grupona a mayat a mangpadas, a libre, kadagiti kabbaro a ‘nalalatak a droga’ a dumteng. Itan addaanakon iti baro a kinalatak. Tunggal maysa ammoda no siasinoak (ket adu) dagiti makaammo nga addaanak kadagiti droga. Umayda kaniak kadagiti kalsada, kadagiti bar, ken uray pay iti pagtrabahuan, a tarigagayanda ti gumatang kaniak.

Malaksid iti dayta, diak nagtaktak a nakiraman iti imoralidad; dayta ti pamay-an tapno kayatendak. Ket kaykayatdak unay. Nasursurok ti mangusar kadagiti dadduma a tattao babaen iti sekso tapno magun-odak dagiti bambanag a tarigagayak. Iti adu a tawtawen kastoy ti wagas ti panagbiagko.

Malaglagipko pay laeng a naimbag iti maysa nga okasion a nakaro ti gurigorko ken nakapsutakon. Saan nga ammo ti doktorko no ania ti sakitko. Idi agangay napalabas dayta. Diak ammo no ania ti nakaisarangak agingga a tallo a tawen kamaudiananna.

Bayat daytoy a tiempo, rirriribukendak dagiti demonio, a naminsan pudno a naatakeak. Mariknak a ti maysa a demonio padpadasenna ti sumrek kaniak. Pudno a nakidangadangak tapno makapagsaoak. Naulit-ulit a pinadasko agingga a nabaelak nga inriaw, “Tulongannak Jehova!” Dagdagus a pimmanaw ti demonio.

Panunotenyo laengen ti riknak! Ditoy agbibiagak iti nakaro nga imoral a panagbiag ken pampanunotek laeng ti bagik, ngem adda turedko nga umawag ken Jehova a maipaay iti tulong! Mababainak. Apay nga impagarupko a mabalin a tulongannak ni Jehova? Naglidayak iti kasta unay. Ginagarak nga inkabil ti biagko iti pannakadangran, a tarigagayak ti maysa a mangpapatay kaniak.

Tarigagay nga Agbalbaliw

Maysa nga aldaw, bayat ti pannakikaduak kadagiti gagayyem iti maysa a party, nagsasaritakami maipapan kadagiti ar-aramid ti lubong. Idi pinagsaludsodandak no ania ti pagarupko maipapan iti masanguanan, nasarakak ti bagik a mangibagbaga kadakuada iti panggep ti Dios a maipaay iti daga ken dagiti tattao iti dayta. Nasdaawda. Ngem maysa a tao ti naupay kaniak ket inawagannak ti managinsisingpet! Isut’ naan-anay nga umiso. Agbibiagak iti doble a panagbiag. Kaskasdi, iti kaunggan ti pusok, ammok a ni Jehova ti kakaisuna a pakaisalakanantayo ket ti organisasionna ti kakaisuna a pakaikamengan.

Agarup iti daytoy a tiempo a ti biagko ken ti biag dagiti adda iti aglawlawko nangrugin nga agbalbaliw. Adu kadagiti gagayyemko ti nakaalan iti AIDS. Narigat ti mangbuya kadagiti tattao nga idi ket nasalun-at nga agin-inot a kumapuy ket matay. Mariknak nga awan ti gawayko a mangliwliwa kadakuada. Nangnangruna a makaupay ta ammok ti nasaysayaat a pamay-an iti panagbiag. Ammok idin a tarigagayak ti agsubli iti ayat ni Jehova. Ngem kasano?

Rinugiak ti agkararag ken ni Jehova a maipaay iti tulong. Nakarigrigat nga aramiden. Mariknak a mabainak ken narugitak. Maysa nga aldaw nakaawatak iti awag ti telepono. Daytat’ naggapu iti ikitko, a diak nakitkitan iti unos ti siam a tawen. Tarigagayanna ti umay mangkita kaniak. Nupay no saanna nga ikutan ti pammati dagiti dadakkelko, imbagak kenkuana a tarigagayak a baliwan ti panagbiagko ken agsubli nga agbalin manen a maysa kadagiti Saksi ni Jehova. Makitana ti kinapasnekko ket tarigagayanna ti tumulong.

Ti Atiddog a Dalan nga Agsubli

Inawisnak ti ikitko a makipagnaed kenkuana agingga a makapagtakderakon a bukbukod. Idi inimtuodna no makatulong dayta, basta nagtakderak sadiay ket nagsangitak. Ammok a daytoy ti pamay-an nga ilalapsut a kasapulak, gapuna pinanawak dagiti dati a kakaduak. Dagiti sumaganad a sumagmamano a bulbulan ket saan a nalaka, ngem agtalekak a tulongannak ni Jehova a makalapsut kadakuada. Pagarupko nga agaplikar ditoy ti Malakias 3:7: “‘Sumublikayo kaniak, ket siak sumubliakto kadakayo,’ kuna ni Jehova dagiti buybuyot.”

Dagdagus a nakipagkitaak kadagiti panglakayen kalpasan ti iyaakarko. Imbagak kadakuada ti isuamin maipapan iti bagik met laeng ket pudno a tarigagayak ti agserbi ken ni Jehova. Ammoda ken ammok a ti panagsublik saan a dumteng iti agpatnag laeng iti aniaman a pamay-an. Addaanak iti nakababain a pakasarsaritaan. Kaskasdi, determinadoak iti daydi a tiempo. Inaldaw ken rinabii a kankanayon a nagkararagak ken Jehova a maipaay iti tulong. Kankanayon a pampanunotek a nakakapkapuyak a tao. Iti pagarupko talaga a kastaak. Ngem no addaanka iti tulong ni Jehova, nakaskasdaaw no kasano ti kinabilegyo.

Nagus-usarak iti droga iti adu a tawtawen tapno makapagballigiak iti inaldaw-aldaw a panagbiag. Itan masapul nga agbiagakon nga awan dagitoy. Maamakak. Mabutengak kadagiti bunggoy, ket literal nga agsakitak no mabayag unay nga addaak iti aglawlawda. Maigiddato iti dayta, padpadasek met nga isardeng ti agsigarilio kalpasan ti pannakairuamkon iti panagsigarilio iti ngangngani uppat a pakete iti inaldaw. Ti laeng nakatulong kaniak a makalapsut kadagitoy amin isu ti kararag ken ti kanayon a panangipalagip iti bagik a dagiti mangkorehir a tigtignayko ket makaay-ayoda ken Jehova. Maliwliwaak met ken makasarak iti talna babaen iti kankanayon nga itatabuno kadagiti gimgimong. Nupay no diak makisarsarita iti siasinoman gapu ta nailaksidak, kaskasdi a mariknak ti ayat ken kinabara kadagiti masanguanan a naespirituan a kakabsatko a lallaki ken babbai sadiay.

Kamaudiananna, agarup makatawen kalpasan ti panangbalbaliwko iti biagko, nakita ni Jehova a maitutopen ti panangisubli dagiti ad-adipenna kaniak iti organisasionna. Ammona ti eksakto a tiempo a panangabrasada manen kaniak. Dina palubosan ti pannakasuotyo iti nalablabes ngem ti kabaelanyo nga ibturan. Di nagbayag kalpasanna, inawatko dayta nga awag manipud iti doktor a mangibagbaga kaniak nga addaanak iti AIDS. Kinapudnona, pudno ti kunaen ti Galacia 6:7: “Dikay koma maallilaw: Ti Dios saan a marabrabak. Ta ti aniaman nga imulanto ti maysa a tao, apitennanto met.”

Umuna nagsangitak. Dimteng dagiti amin a kita ti pampanunot kaniak. Nasirmatak a kasla limmabas iti imatangko dagiti napalabas a panagbiagko. Nakitak a mismo no ania ti aramiden daytoy a sakit iti maysa a tao, agraman ti panagtignay dagiti dadduma iti sakit. Anian a kinamaag ti panangpanunotko a ti lubong adda ti maipaayna! Ket anian a pannakasayang ti nagpateg a tiempo!

Pannakapnek Nupay Addaan AIDS

Ammok nga addada dagiti agtutubo nga adda met iti kasasaad a kas kaniak, nga agtartarigagay nga awaten dagiti nailubongan a kakaduada. Pangngaasiyo, ta dikay maallilaw a mamati a ti napasamak kaniak iti lubong ket saan a mapasamak a mismo kadakayo no dikay ikankano ti balakad ti Dios. Mabalin a naiduma dagiti pangawis ni Satanas, ngem kankanayon nga isu met laeng dagiti resultana.

Nupay kasta, nasursurok met a nupay kasano ti kadakesyo wenno aniaman ti naaramidyo a kinadakes, kaskasdi a tulongannakayo ni Jehova ket pakawanennakayo no sipapasnek a tarigagayanyo ti mangay-ayo kenkuana ken umadanikayo kenkuana iti napasnek a kararag.

Aniaman ti mapasamak kaniak pudno a din mangriribuk kaniak. Sigurado, sagpaminsan malidayanak, ngem di agbayag maparmekkon dayta. Ti laeng pakaseknakon ita isu ti panangay-ayok ken Jehova. Isu ti pudno a gubuayan iti rag-ok ken liwliwak. Ammok a no ar-aramidek ti isuamin a kabaelak a mangay-ayo kenkuana, maaywananak a naimbag ken ayatennak.

Agyamanak iti kasta unay ta nakasubliak manen a kadua ti ili ni Jehova agsipud ta uray no matayak sakbay ti panangitan-okna iti bagina met laeng inton Armagedon, addaanak iti namnama a panagungar. Makadalkayo kaniak, ti panagbiag nga awanan iti ayat ken anamong ni Jehova ket dakdakes pay ngem iti addaan ti AIDS.​—Naipatulod.

[Blurb iti panid 13]

Ti agbalin a pagay-ayat dagiti dadduma nga ubbing isu ti tartarigagayak