Ti Biag ken Ministerio ni Jesus
Idi Kaaddana Idiay Capernaum
ITATTAN ti kinalatak ni Jesus naglawan ti nagsaknapanna, ket adu a tattao ti agdaldaliasat a mapan iti ayanna kadagiti naiputputong a luglugar. Kalpasan ti sumagmamano nga aldaw, nupay kasta, isut’ nagsublin idiay Capernaum idiay igid ti Baybay ti Galilea. Ti damag dagdagus a nagsaknap iti intero a siudad nga isu nagsublin, ket adu ti umay iti balay nga ayanna. Immay dagiti Pariseo ken mannursuro ti Linteg manipud nakaad-adayo a Jerusalem.
Nagadu unay dagiti tattao ta pinekpekda ti ruangan, ket awan pay lugaren a pakastrekan ti siasinoman. Ti entablado ti kasla nakasagana a maipaay iti pudpudno a nakaskasdaaw a pasamak. Ti napasamak iti daytoy nga okasion nasken ti kinapategna, ta daytat’ mangtulong kadatayo a mangapresiar a ni Jesus addaan iti pannakabalin a mangikkat kadagiti pagtataudan ti panagsagaba dagiti tattao ken mangisubli iti salun-at kadagiti isuamin a pilienna.
Bayat ti panangisursuro ni Jesus iti umariwekwek, uppat a lallaki ti nangiyeg iti balay ti maysa a tao a paralitiko iti maysa a langkapi. Kayatda nga agasan ni Jesus ti gayyemda, ngem gapu kadagiti adu a tattao saanda a makastrek. Anian a makapaupay! Ngem saanda a simmuko. Immulida idiay plastado a bubong, nangaramidda ti abut iti dayta babaen ti panangikkatda iti atep a tisa, ket imbabada ti langkapi nga ayan ti tao a paralitiko idiay mismo a dumna ken Jesus.
Nakapungtot kadi ni Jesus gapu iti pannakasingana? Nikaanoman! Imbes ketdi, isu ti nagsiddaaw unay iti pammatida. Kunana utu tao a di makagunay: “Dagiti basbasolmo mapakawanda kenka.” Ngem aktual kadi a makapakawan ni Jesus kadagiti basbasol? Di patien dagiti eskriba ken Pariseo a kasta. Kunada iti puspusoda: “Asino ti makabalin a mamakawan kadagiti basbasol no saan laeng a ti Dios?”
Gaput’ pannakaammona iti pampanunotda, kuna ni Jesus kadakuada: “Ania ti nalaklaka, ti panagkuna, ‘Dagiti basbasolmo mapakawanda kenka,’ wenno ti panagkuna, ‘Tumakderka ket pidutem ti langkapim ket magnaka’?” Uray saannan nga inuray ti sungbatda, sinango ni Jesus ti paralitiko ket kinunana: “Tumakderka, bagkatem ta langkapim, ket inka iti balaymo.” Ket dagus nga inaramidna dayta, a magmagna nga awitna ti langkapina iti imatang dagiti isuamin! Iti panagsiddaaw indir-i dagiti tattao: “Dikam pay nakakitkita ti kaasping dayta”!
Nadlawyo aya a nadakawat ni Jesus dagiti basbasol maipapan iti sakit ken ti panangpakawan kadagiti basbasol ket mainaig iti pannakagun-od iti salun-at? Ilawlawag ti Biblia a ti immuna a naganak kadatayo a ni Adan nagbasol ket natawidtay amin ti bunga dayta a basol, awan sabali, ti sakit ken ipapatay. Ngem iti sidong ti panagturay ti Pagarian ti Dios, pakawanento ni Jesus dagiti basbasol amin dagiti agayat ken agserserbi iti Dios, ket iti kasta amin a sakit maikkatton. Anian a nagsayaatto dayta! Marcos 2:1-12; Lucas 5:17-26; Mateo 9:1-8; Roma 5:12, 17-19.
◆ Ania ti buya ti pudpudno a nakaskasdaaw a pasamak?
◆ Kasano a nagteng ti tao a paralitiko ni Jesus?
◆ Apay a managbasoltay amin, ngem kasanot’ panangipaay ni Jesus iti namnama a ti pannakapakawan ti basbasoltayo ken pannakaisubli ti naan-anay a salun-at ket posible?
[Ladawan iti panid 8]