Ti Masanguananyo Asino ti Makaipadles iti Dayta?

TI PANANGPADPADAS a mangipadles iti masanguanan ti nalaka. Ti kinaumiso ket narigat a mapasamak. Daytat’ agbalin a panagaramid iti kinaubbaw no dagiti pammadles bumalandrada, kas ti nalawag nga ipamatmat dagiti naipakuyog a pangarigan.

Nanipud pay idi ugma, pinadpadasen ti tao a sukalan no ania ti salsalimetmetan ti masanguanan. Uray pay itatta, kaaduan kadatayo ti addaan tarigagay a sumirip iti masakbayan. Daytoy a panagsapsapul iti pannakaammo maipapan kadagiti mapasungad a paspasamak ti nangiturong iti tao a nangpadas iti nagadu a metodo. Kas pangarigan, sinuksukimatdan ti natauan a bagi a maipaay kadagiti pagilasinan kadagiti kababalin ti rupa, dagiti pannakaporma ti bangabanga, ken dagiti ug-uged ti palad ti ima. Ti tao inad-adalnan dagiti an-animal​—ti panagkuti dagiti utot wenno uleg, ti panagtayab dagiti billit, agraman pay ti pamay-an a panangtuktok ti maysa a kawitan kadagiti binukel ti trigo a naikabil iti daga. Dadduma agar-aramatda kadagiti bambanag a kas ti kristal a bola, dagiti baraha, ti dice, dagiti bulong ti tsa, wenno giniling a kape. Dagiti pamay-anda ti nagduduma a kas kadagiti tattao, ug-ugali, ken pampanawen, ngem dagiti bungana agpaparehoda amin: pannakapaay.

Kaskasdi, adda Maysa a makaipadles nga apagpag-isu iti masanguanan. Asino? Ni Jehova a Dios. Ni Jehova naisalsalumina agsipud ta isu “Daydiay mangipalawag ti panungpalan manipud iti pangrugian.” Uray pay no dagiti paspasamak saanda pay a nagtengan ti naan-anay a kaitungpalanda, maipadles ti Dios no ania ti pagbanagan dayta. Wen, mabalin nga iyukrad ni Jehova ti masanguanan iti imatang ti matmata ti tao saan laeng a maipaay iti sumagmamano nga aldaw iti masakbayan no di ket uray pay adu a siglo iti masanguanan!​—Isaias 46:10.

Gapuna, ti panagsapsapul ti pannakaammo iti masanguanan ti di rebbeng nga agtungpal iti kinaubbaw. Ti Sao ti Dios, ti Biblia, ti nangibalabala kadagiti kangrunaan a bambanag para kadatayo. Ania ti ipakpakita dayta a salsalimetmetanna nga agpaay iti sangatauan?

[Dagiti ladawan iti panide 3]

“Imposible dagiti nadagdagsen ngem ti angin a makina nga agtayab.”​—Lord Kelvin, Briton a matematiko, pisisista, ken Presidente ti British Royal Society, c. 1895.a

[Dagiti Footnote]

“No rugiantay a padpadasen ken tarusan ti biag no anianto dayta inton 1960, masapul a rugiantayo a bigbigen a ti taraon, kawes ken pagtaengan ti nalaklakanto bassiten kas ti angin.”​—John Langdon-Davies, Briton a mannurat ken Fellow of the Royal Anthropological Institute, 1936.

“Isu pay laeng daytoy ti kadadakkelan a minamaag a banag a naaramidantayo. . . . Ti bomba ti dinto bumtak, ket agsasaoak kas maysa nga eksperto kadagiti dinamita.”​—Admiral William Leahy, manangbalakad ken Presidente Harry Truman iti E.U. maipapan iti proyekto ti bomba atomika ti E.U., 1945.

[Credit Line]

U.S. National Archives