Dagiti Ebanghelio—Kinapudno wenno Parparbo?
DAGITI makunkuna a nangangato a kritiko nabayagen nga at-atakarenda dagiti salaysay ti Ebanghelio maipapan ti panagbiag ni Jesus kadagiti nadumaduma a bambanag: Kunada a dagitoy a salaysay ti napunno kadagiti panagsusuppiat ken naisuratda nabayagen kalpasan dagiti pasamak tapno maikuenta a pudno a historia. Ibagbagada a dagiti namilagruan nga elemento ket pinabpabrika laeng.
Iti librona a Caesar and Christ, ni historiador a Will Durant sireregget a sinukimatna dagiti salaysay ti Ebanghelio manipud iti addaan panggep a punto de bista—kas dagiti dokumento ti historia. Nupay inaminna nga adda dagiti kasla panagsusuppiat ken problema kadagiti salaysay ti Ebanghelio, nupay kasta naikeddengna: “Dagiti panagsusuppiat ti nakabasbassitda [kadagiti nagbabassit a detalye], saan a ti sustansia; kadagiti nasken a bambanag dagiti synoptiko nga ebanghelio ti nakaskasdaaw iti panagaanamongda, ken buklenda ti napamaysa a ladawan ni Kristo.”
Ngem ania ngay ti adda a panagkuna dagiti nangangato a kritiko a dagiti Ebanghelio dida maragpat ti pamrayan ti pudpudno a historia? Intuloy ni Durant: “Gaput’ ragsakda kadagiti nadisdiskubreda aglablabes unay ti panangiyaplikar ti Nangatngato a Kriticismo kadagiti panangsuot iti kinapudno ti Baro a Tulag a babaen kadakuada dagiti ginasut a maikari a tattao idi ugma—k.p., da Hammurabi, David, Socrates—maibilangda laengen kas sarsarita wenno leyenda. Agpapan pay kadagiti panagil-ilem ken teolohikal a kapampanunotan dagiti managebanghelio, inlanadda dagiti adu a paspasamak a dayta koma ti inlemmeng dagiti basta managimbento—ti panagsasalisal dagiti apostol a maipaay iti nangatngato a saad idiay Pagarian, ti panagtatarayda kalpasan ti pannakaaresto ni Jesus, ti panangilibak ni Pedro . . . Awan asinoman a mangbasbasa kadagitoy a buya ti agduadua iti kinapudno dagiti tattao nga adda kadagiti nalikudanda.”
Nagpatingga ni Historiador Durant a kunana: “A ti sumagmamano a simple a tattao ket iti maymaysa a kaputotan nangimbentoda iti maysa a nakapigpigsa ken makaallukoy a personalidad, a natan-ok ti kababalinna ken mangtignay iti pannakasirmata iti maysa a natauan a panagkakabsat, ti maysa a milagro nga adayo a nakaskasdaaw ngem iti aniaman a nailanaden kadagiti Ebanghelio. Kalpasan ti dua a siglon ti Nangatngato a Kriticismo dagiti balabala ti biag, tattao, ken pannursuro ni Kristo, ti rasonable a nakalawlawag, ket buklenda ti makakayaw unay a paset iti historia ti Makinlaud a tao.”