Apay a Patientayo ni Jesu-Kristo?

“ADU a tattao nga uray saanda a Kristiano mamatida nga Isu ket naindaklan ken masirib a mannursuro. Awan duadua nga isu ti maysa kadagiti kadakkelan ti impluensiana a tao a nagbiag pay laeng.” (The World Book Encyclopedia) Asino? Ni Jesu-Kristo, ti nangipasdek iti Kristianidad.

Nupay kasta ti kuna ti encyclopedia, ginasut a milion a tattao iti Oriente ken iti dadduma a lugar ti mangmatmat ken Jesu-Kristo kas maysa nga estranghero, maysa laeng a nagan a nalabit malagipda manipud kadagiti libroda iti high school. Uray kadagiti simbaan ti Kakristianuan, kunaen ti dadduma a teologo ken klero a ditay talaga am-ammo ni Jesus ken pagduaduaanda pay ti kinapudno dagiti uppat nga adda a salaysay ti kabibiagna (dagiti Ebanghelio) a masarakan iti Biblia.

Mabalin ngata a pinarbo dagiti mannurat ti Ebanghelio ti pakasaritaan ti biag ni Jesus? Nikaanoman! Kalpasan a sinukimatna dagiti salaysay dagiti Ebanghelio, insurat ti nalatak a historiador a ni Will Durant: “Maysa a milagro a nakaskasdaaw unay no idilig iti aniaman a nairekord kadagiti Ebanghelio a sumagmamano a simple a tattao iti maymaysa a kaputotan ti nakaparbo iti maysa a personalidad a nakabilbileg ken makaay-ayo unay, nakatantan-ok a moral a pagalagadan ken makaliwliwa unay a sirmata iti natauan a panagkakabsat. Kalpasan ti dua a siglo a panangus-usig ti Higher Criticism, nagtalinaed a nalawag dagiti balabala ti biag, katatao, ken sursuro ni Kristo, ket nagbalin a kangrunaan a makakayaw a paset iti pakasaritaan ti tao iti Laud.”

Kaskasdi, adda latta dagiti mangikabkabilangan ken Jesu-Kristo gapu kadagiti inaramid dagiti agkunkuna a pasurotna. ‘Nagitinnagda iti bomba atomika idiay Nagasaki,’ kuna ti dadduma a taga Japan. ‘Ket ad-adu ti Kristiano sadi Nagasaki ngem iti kaaduan kadagiti siudad idiay Japan.’ Ngem mapabasolyo kadi ti doktor iti panagsakit ti maysa a pasiente no isu a mismo dina suroten ti imbalakad ti doktor? Nabayagen a di inkankano ti kaaduan nga agkunkuna a Kristiano ti impaay ni Jesus nga agas kadagiti sakit ti sangatauan. Nupay kasta, impaay ni Jesus ti solusion dagiti inaldaw a parikuttayo ken dagiti pakarigatan a sagsagabaen ti sangatauan. Dayta ti gapuna nga awisendakayo a mangbasa iti sumaganad nga artikulo ket kitaenyo a mismo no ania ti katataona idi.