Ti Panagpaadu ti Biag—Babaen iti Ebolusion wenno Manipud iti Dios?
“DATDATLAG unay ti kinarikutna.” Kastat’ panangiladawan ti pagiwarnak a Science News maipapan iti sistema a panagpaadu ti babai. Ngem ti itlog manipud ti obario ti maysa a babai ket di makapataud ti biag a bukbukodna. Tapno mapasamak daytoy, ti maysa nga sperma a selula manipud iti sistema a panagpaadu ti lalaki ti masapul a maitipon iti pannakamata ti itlog. Ngem aniat’ aramiden ti sperma tapno pagbalinenna a biag ti itlog? Dayta a saludsod ti kaskasdi a mangriro kadagiti sientista.
Ti panamati iti ebolusion ti mamataud pay iti sabali a saludsod: No dagiti organo ti pagpaadu ti lalaki ken ti babai naglasatda iti ebolusion, kasanot’ panagtultuloy ti biag sakbay ti naan-anay a pannakabukel dagiti dua?
Ti panagpaadu ramanenna pay dagiti dadduma a pagsidsiddaawan. Ti genetiko a material iti pertilisado nga itlog ti makita laeng babaen iti tulong ti mikroskopio. Ket kaskasdi irepresentar dayta ti “naglawaan a libraria dagiti impormasion,” kas panangyebkas da Propesor Friar ken Davis iti libroda nga A Case for Creation. “Awan sabalin a pangarigan iti panangpabassit a maidilig iti daytoy,” innayonda. Daytoy a mikrolibraria ti mangiturong iti panagdakkel amin dagiti paset ti bagi, agraman dagiti detalye kas ti kolor ti mata ken ti buok.
Di agbayag kalpasan ti pertilisasion, ti selula agbingay iti dua, ti dua agbalin nga uppat, ken kasta a kanayon, aginggana nga addan ti maysa a masa dagiti selula. Ti panagbibingay dagiti selula ramanenna ti panagdoble ken ti panangiyurnos kadagiti minilmilion a molekula. Daytat’ maiyarig iti maysa a pabrika nga automatiko nga agbibingay iti dua a nagsina nga establisimiento a kompleto kadagiti agpadpada a makinaria a mangpataud iti isu met laeng a produkto, ket daytoy a panagpaadu ti maulit-ulit a kankanayon. Kalpasanna maysa manen a nakaskasdaaw a banag ti mapasamak.
Dagiti nagduduma ti langana a selula mangrugida a maporma—dagiti selula ti nerbio, dagiti selula ti piskel, dagiti selula ti kudil, ken amin dagiti nagduduma a tipo a mangbukel iti bagi ti tao. Ti kinamanagdudumaduma ti selula ket maysa a misterio. Kasta met ti naan-anay a bilang ti selula. “Awan ti sigurado a makaammo,” kuna ti Science Digest, “no apay a dagiti dadduma a maur-urnong a selula ti mangbukel iti maysa a bato bayat a dagiti dadduma tumiponda a mangbukel iti dalem, ken dadduma pay.” Inton agangay, ti bagi ti tao dumanonton iti naan-anay a panagdakkelna, a buklen iti agarup 100,000,000,000,000 a selula.
Sigun iti teoria ti ebolusion, ti natauan a biag ti aglasat iti ebolusion manipud iti simple a mikroorganismo. Ngem, saan a kas kadagiti tattao, kaaduan kadagiti mikroorganismo ti aggapu manipud maymaysa laeng a naganak. Isuda ti agpaadu a kabukbukodanda. Kasano a daytoy a langa ti panagpaadu ti naglasat iti ebolusion iti ad-adda a komplikado a porma a mangbukel kadagiti dua a nagannak? Narigat a sungbatan daytoy dagiti ebolusionista, kas ipakita ti grupo dagiti parsua iti immuna a panid.
Daytoy dakkel a panaglagto ti sisasayaat nga inlawlawagda a kas “ti imbento ti seksual a panagpaadu.” Ngem dadduma kadagiti sientista addaanda ti tured a sumuppiat. Ni Propesor Jaap Kies, iti University of the Western Cape, Sud Africa, isalaysayna dayta kas “nakadakdakes a panangpugpugto.”
Adda laeng maymaysa a makapnek a panangilawlawag a maipaay iti panagpaadu iti biag. Daytat’ maysa a sagut a naggapu iti kasisiriban a Namarsua, ni Jehova a Dios. Kas kunaen ti Biblia: “Isuamin a sagut a nasayaat ken isuamin a sagut a naan-anay naggapuda iti ngato.”—Santiago 1:17.
[Kahon iti panid 3]
No Ania ti Admitiren dagiti Ebolusionista Maipapan iti Panagpaadu
“Uray pay iti kabassitan ditay ammo ti maudi a makagapu iti seksualidad; no apay a dagiti baro a biag ti rebbeng a mapaadu babaen ti panagtipon dagiti dua a seksual nga elemento, imbes a babaen iti pamay-an a parthenogenesis [panagpaadu a makasapul laeng iti maymaysa a naganak] . . . Ti intero a tema ti kaskasdi nga aglemlemmeng pay laeng iti kasipngetan.”—Charles Darwin, 1862.
Maipapan iti panangmatmat ni Darwin, innayon ti Science News, Setiembre 8, 1984: “Mabalin nga isu ti agsursurat maipapan itatta.”
“Daytoy a libro,” kuna ni Propesor George C. Williams iti pakpakauna ti Sex and Evolution, “ket naisurat manipud iti pammati a ti kaadda ti seksual a panagpaadu kadagiti nangatngato a mulmula ken animal ket di maitunos iti agdama a teoria ti ebolusion.”
Iti librona a The Evolution of Sex, imparang ni Propesor John Maynard Smith ti “maysa a gakat a maipaay iti namunganayan ti sekso,” nga inawaganna dayta “ti kasayaatan a gakat a maitukon.” Kas konklusion kunana: “Diak mabalinan ti manglimlimo a maaddaan ti dakkel a panagtalek iti daytoy a panangilawlawag.”
“Ti sekso ket isu ti reina kadagiti parparikut ti ebolusionario a biolohia. . . . Agparang a dadduma kadagiti pamunganayan unay a salsaludsod ti ebolusionario a biolohia natakkonda a maisalsaludsod . . . Ti kadadakkelan ken ti kabassitan a di ibilbilang ken ti katatangkenan unay kadagitoy a salsaludsod ket, apay a ti sekso?”—The Masterpiece of Nature, ni Propesor Graham Bell.