No Apay ti Panangabuso iti Pannakabalin Sigurado nga Agpatingga
KUNA ni Ari Salomon idi ugma maipapan iti panangabuso ti pannakabalin idi kaaldawanna: “Idi nagbaw-ingak ket nakitak amin a pammarigat [di umiso a panangusar ti pannakabalin] a maar-aramid iti baba ti init, ket adtoy! dagiti lulua dagiti naparigat, ket isuda awananda ti mangliwliwa; ket iti biang dagiti mangparparigat kadakuada adda idi pannakabalin.”—Eclesiastes 4:1.
Mabalin a maisaludsodyo, ‘Yantangay ta ti panangabuso ti pannakabalin ti nakabaybayagen, agnanayonto aya nga adda kadatayo?’ Saan. Agsipud ta, kas insurat a mismo ni Salomon iti sidong ti pannakapaltiing, adda Daydiay mangpalpaliiw amin iti dayta: “No makitam ti pannakaparigat ti napanglaw ken ti maipapilit a pannakaikkat ti kinahustisia ken kinalinteg iti maysa a probinsia, dika masdaaw iti dayta a banag, ta maysa a nangatngato ken ti kangatuan ti mangikankano, wen, ti Kangatuan ti adda iti ngatuenda.”—Eclesiastes 5:8, Rotherham.
Ti Sao ti Dios, ti Santa Biblia, ipakpakitana a ni Jehova, ti Kangatuan, awan ti pagpatinggaan ti pannakabalin ken kinasiribna, ken kasta met perpekto iti kinahustisia, ken isu ti personipikasion ti ayat. Agsipud ta isut’ kasta a Dios, dinanto palubosan nga agnanayon dagitoy nakillo a kasasaad. Insurat ni salmista David: “Dika agalimuteng tapno laeng agaramid iti dakes. Ta dagiti agaramid ti dakes magessatdanto, ngem dagidiay nga agpannuray ken ni Jehova tawidendanto ti daga.”—Salmo 37:8, 9.
Maaddaantayo pay ti kanayonan a pammasiguro manipud sasao ni mammadto Isaias: “Ket dusaekto . . . dagiti managdakdakes a gapu iti kinadangkesda. Ket pasardengek ti kinapusong ti natangsit, ket ipababakto ti kinapalangguad ti nakabutbuteng [dagiti manangabuso ti pannakabalin].”—Isaias 13:11.
Ngem sinigsiglon ti pannakaisurat dagita a sasao, gapuna apay a makasiguro a tungpalento pay laeng ni Jehova a Dios ti karina a mamagpatingga amin a panangabuso ti pannakabalin? Ngamin ta kadagiti napalabas a tiempo indemostrana ti determinasionna a mangaramid iti dayta. Sakbay ti Layus idi kaaldawan ni Noe, adda met ti dakkel a panangabuso ti pannakabalin. Mabasatayo a “napno ti daga iti ranggas.” (Genesis 6:5, 11) Ket ania aya ti kinaranggas no di ti panangabuso ti pannakabalin? Pudno met dayta kadagiti nagdakes a siudad ti Sodoma ken Gomorra idi kaaldawan ni Lot. (Genesis 18:20, 21; 19:4-29) Kadagitoy dua a kaso pinagpatingga ni Jehova ti panangabuso. Gapuna makitatayo a ni Jehova a Dios ket saan a daydiay mangpalugod iti panangabuso ti pannakabalin iti awan inggana.
Ti kanayonan pay a pangibatayan ti pannakasigurotayo nga agtignayto ni Jehova isu ti kinapudno nga isu ti naimon a maipaay iti naganna, ket amin a panangabuso ti pannakabalin ti insulto iti kinatan-okna. Paliiwenyo daytoy a pakainaigan kadagitoy a teksto: “Ti mamarigat iti napanglaw laisenna ti Namarsua kenkuana.” “Siasinoman a mangrabrabak iti napanglaw, umsienna ti Namarsua kenkuana.”—Proverbio 14:31; 17:5.
Ngarud, makasigurotayo, a ti Kangatuan dinanto palugodan iti amin a tiempo ti pannakaumsina. Daytat’ nangibati ti maymaysa laengen a saludsod: Kaanonto ti panagpatingga ti panangabuso ti pannakabalin?
Kaanonto ti Panagpatingga Dayta?
Pakaammuannatayo ti Sao ti Dios a “maipaay iti tunggal banag adda nakedngan a tiempo, ket maysa a tiempo maipaay iti tunggal panggep iti baba ti langit.” (Eclesiastes 3:1) Mabalin a dagiti dadduma dida makaan-anus iti pagorasan ti Dios, ngem naibaga kadatayo: “Saan a namayamay ni Jehova a maipapan iti karina, . . . no di ket agur-uray a siaanus gapu kadatayo a dina kayat a mapukaw ti uray siasino.”—2 Pedro 3:9.
Ipamatmat dagiti kaitungpalan ti padto ti Biblia nga agbibiagtayon kadagiti maudi nga al-aldaw daytoy dakes a lubong, wenno sistema dagiti bambanag. Nakitan daytoy a kaputotan ti kaitungpalan ti naindaklan a padto ni Jesus maipapan ti kaaddana ken ti panungpalan daytoy a sistema dagiti bambanag: dagiti gubat, ginggined, bisin, sakit, ilalanlan ti kinadakes, ken ti panangikaskasaba ti naimbag a damag ti pagarian ti Dios. (Mateo 24:1-35; Lucas 21:10, 11) Daytat’ mangitudtudo iti panawentayo kas ti maudi nga al-aldaw daytoy dakes a lubong.
Gapu ta dagitoyen dagiti maudi nga al-aldaw, mainanamatayo nga iti mabiiten makitatayon ti pannakatungpal ti padto idiay Sofonias 3:8: “‘Ngarud aguraykayo a maipaay kaniak,’ kuna ni Jehova, ‘agingga iti aldaw nga itatakderko a mangsamsam, ta ti panangikeddengko isu ti panangurnong kadagiti nasnasion, tapno maummongko koma dagiti pagpagarian, tapno ibukbukko kadakuada ti ungetko, ti met laeng narungsot a pungtotko; ta isuamin a daga malamutto iti apuy ti imonko.’”
Pudno unay, a dagidiay a sasao ti pammasiguro a ni Jehova a Dios pagpatinggaennanto ti panangabuso ti pannakabalin.