Dagiti Saludsod Manipud Kadagiti Managbasa
◼ Asino wenno ania ti iladladawan ti “Leviathan” iti Isaias 27:1?
Ti Isaias 27:1 ti mabasa: “Iti dayta nga aldaw ni Jehova, babaen iti natangken ken dakkel ken napigsa a kampilan, dusaennanto ti Leviathan, a nasiglat nga uleg, ket ti Leviathan, a kalawikiw nga uleg, ket papatayennanto ti ulimaw nga adda iti baybay.” Matarusantay daytoy a padto nga agaplikar nga agpadpada ken Satanas a Diablo ken iti dakes nga organisasionna ditoy daga.
Inlawlawag ti The Watchtower iti Oktubre 15, 1985, a ti Isaias kapitulo 27 ket maysa a padto iti pannakaisubli. Ti umuna a kaitungpalanna ramanenna ti kadaanan a nasion ti Israel, a maisublinto iti daga a pagtaenganda kalpasan ti 70 a tawtawen ti pannakakayaw idiay Babilonia. Nupay kaaduan kadagiti nakayawan ti naggapu idiay Babilonia, dadduma ti agsubli manipud Egipto ken iti teritoria ti Asiria. Inkeddeng ni Jehova a Dios a ti ilina ti mawayawayaan, gapuna dagita a nasnasion didanto mapasardeng ni Jehova babaen kadagiti agwaywayas wenno ti napagtitipon a panagregget. Mabalin a dagiti tattao kasda la nakapigpigsa ken nasikap, a kas ti kadaanan a Leviathan (nalabit maysa a buaya), kaskasdi agballigi ni Jehova a maipaay iti kadaanan nga Israel.—Idiligyo iti Job 41:1-34.
Ngem, ania, ti iladawan ti “Leviathan” iti dakdakkel a kaitungpalan ti Isaias kapitulo 27? Kaawatan, malagip ni Satanas a Diablo, ta idiay Apocalipsis 12:9 isut’ mailadladawan kas “ti dakkel a dragon” ken “ti kadaanan nga uleg.” Isut’ nabayagen a kabusor ti Dios ken ti ilina. Mainayon pay, pagbalinen a nalawag dagiti Kasuratan a masarakanto ni Satanas ti panungpalanna. Naikeddeng ti Dios ti aldaw a panangwatwatna ti pannakabalinna babaen iti Anakna tapno pukawenna ti Diablo. Gapuna dayta a “dragon” wenno “uleg” magessatto iti dakkel ken napigsa a kampilan.—Hebreo 2:14; Apocalipsis 20:1-3, 10.
Laglagipenyo a dagiti nasinged a kabusor a naipasango iti kadaanan nga Israel isuda dagiti makitkita a nasional a bumusbusor, kas ti Egipto, Asiria, ken Babilonia. Kasta met itatta, dagiti Kristiano nga ad-adipen ti Dios iti intero a lubong ti naipasango babaen kadagiti makitkita a bumusbusor iti tengnga ti nagulo a baybay ti sangatauan a naisina iti Dios. (Apocalipsis 17:1, 15) Ni Satanas ti mangtengtengngel ti maysa a sangalubongan nga organisasion nga us-usarenna a manglapped kadagidiay “mangsalimetmet kadagiti bilbilin ti Dios ken addaanda ti pammaneknek ni Jesus.” (Apocalipsis 12:17) Daytoy iturturayan ti Diablo nga organisasion ti napaneknekan a nasikap ken narungsot, kas maysa a Leviathan. Kaskasdi, idi karrugi daytoy a siglo daytoy a “Leviathan” napukawna ti panangtengngelna iti naespirituan nga Israel, awan sabali, dagiti napulotan a Kristiano a Saksi ni Jehova. Ket iti kamaudiananna daytanto ti magessat inton, buyogen dagiti angheliko a buybuyotna, agsakayto ni Jesus nga addaan iti “maysa a kampilan a natadem, tapno pangdunorna kadagiti pagpagarian.”—Apocalipsis 19:11-16.
Gapuna uray pay iti maysa a banag mabalin a masao ni Satanas kas ti Leviathan iti Isaias 27:1, dayta a padto ramanenna saan laeng a “ti kadaanan nga uleg.” Isentro dayta nangnangruna iti makitkita a naindagaan nga organisasion nga iturturayanna. Gapuna, ti The Watchtower a nadakamat iti ngato mabalinna nga itudo kadagiti managbasana ti tiempo inton “ti agdama a dakes a sistema nga isut’ iturturayan ni Satanas a Diablo kas diosna ti maawanton. Iturongto ni Jehova ti atensionna iti simboliko a Leviathan, ti aguy-uyas, kalawikiw nga uleg nga adda iti tengnga ti baybay ti sangatauan. Isu ken dagiti nasnasion ken uray pay ti timpuyog dagiti nasnasion ket mapukawdanton.”