‘Agtaktakderak iti Pagwanawanan’

“Ket isu nagpukkaw a kas maysa a leon: ‘O Jehova, agtakderak nga agnanayon iti rabaw ti pagwanawanan iti aldaw, ket maisaadak nga agbantay nga agpatpatnag iti rabii.’”​—ISAIAS 21:8.

1, 2. (a) Aniat’ kalat idi ni Charles T. Russell? (b) Kasano a dagiti literatura ti Biblia makatulong a mangiringpas ti kalatna?

MAYSA a managbuteng iti Dios a 21-años a lalaki nga agnanaed idiay umamianan a daya ti Estados Unidos ti addaan ti maysa a mision. Ti kalatna ket isu ti panangibutaktakna kadagiti ulbod a narelihiusuan a sursuro idi kaaldawanna, nangnangruna kadagiti doktrina ti agnanayon a panagtutuok ken ti pannakaisigno. Kasta met, kayatna nga ikampeon ti kinapudno maipapan iti subbot ken ti ranta ken wagas nga iyaay ni Kristo. Kasanot’ panangaramid amin iti daytoy? Babaen ti panangisilnagna iti lawag ti Sao ti Dios, ti Nasantuan a Biblia, kadagiti narelihiusuan a pammati.​—Salmo 43:3; 119:105.

² Ni Charles T. Russell, ti umuna a presidente iti Watch Tower Society, isu dayta a lalaki, ket naikeddengna idi 1873 ti mangipablaak iti narelihiusuan a literatura kas pamay-an ti panangisentro iti lawag ti kinapudno ti Biblia. Kadagiti napasnek a managbasa, dagitoy a publikasion ti mangipanayag kadagiti rekka kadagiti dogma ti Kakristianuan. Aniaman a nalingdan a doktrinal a depekto ti di makapaglisi iti nagpigsa a lawag ti Biblia. (Efeso 5:13) Maigiddato iti dayta, daytoy a literatura ti mangiturong ti lawag kadagiti ‘makapasalun-at a sursuro’ a mangpabileg ti pammati dagiti managbasa. (Tito 1:9; 2:11; 2 Timoteo 1:13) Ti kadi regta a maipaay iti kinapudno ti Biblia a nangiduron ken ni Russell iti panagsapsapul ti addaan pakpakaunana?​—Idiligyo iti 2 Ar-ari 19:31.

Dagiti Umuna a Kristiano: dagiti Kampeon iti Sao ti Dios

3. Kasano a ni Jesu-Kristo nangted ulidan iti panangikampeon ti kinapudno?

³ Dagiti umuna-siglo a Kristiano ti kampeon iti panangusar ti Sao ti Dios kadagiti Judio ken kadagiti Gentil. Nagtakderda a kasla nakapuesto iti pagwanawanan, a mangiwarwaragawag ti kinapudno kadagiti amin a makangngeg. (Mateo 10:27) Ti Panguloda, ni Jesu-Kristo, ti nangipakita iti ulidan. Kunana: “Nayanakak gapu itoy, ken gapu itoy immayak ditoy lubong, tapno paneknekak ti kinapudno.” (Juan 18:37) Nupay perpekto, saanna a kinayat ti agpannuray iti kabukbukodanna a kinasirib wenno kadagiti personal nga opinionna. Imbes ketdi, dagiti sursurona ti namunganay iti Natantan-ok a Mannursuro, ni Jehova a Dios. “Awan ti aramidek a sisiak,” kinunana iti maysa a bunggoy dagiti Judio. “No di ket kas iti insuro kaniak ni Ama dagitoy ti sawek.” (Juan 8:28; kitaenyo met ti Juan 7:14-18.) Sigun kadagiti salaysay iti Ebanghelio maipapan iti naindagaan a ministeriona, isut’ pagaammo a nagad-adaw (wenno nagsao iti kapanunotan nga umasping kadagiti sasao) ti kagudua kadagiti libro ti Hebreo a Kasuratan.​—Lucas 4:18, 19 (Isaias 61:1, 2); Lucas 23:46 (Salmo 31:5).

4. Mangted kadagiti pangarigan no kasanot’ panangusar ni Jesus ti Sao ti Dios a nangisuro ti kinapudno.

⁴ Uray pay kalpasan ti ipapatay ken panagungarna, ni Kristo ti kaskasdi a nagusar ti Sao ti Dios a mangisuro ti kinapudno. Kas pangarigan, idi a ni Cleofas ken ti kaduana agdaldaliasatda manipud Jerusalem nga agturong Emmaus, tinulongan ni Jesus dagitoy nga adalan nga agrason iti Kasuratan. Kuna ti salaysay: “Ket idinto a rinugianna manipud ken Moises ken dagiti isuamin a Mammadto impalawagna kadakuada dagiti amin a Sursurat a mangsarita ti maipapan kenkuana.” (Lucas 24:25-27) Kamaudiananna iti dayta met la nga aldaw, nagparang ni Jesus kadagiti 11 nga apostol ken sumagmamano kadagiti adalanna tapno pabilgen ti pammatida. Kasano? Babaen iti nasigo a panangusar iti Kasuratan. Insurat ni Lucas: “Idin linawaganna [ni Jesus] dagiti isipda tapno maawatanda dagiti Sursurat, ket kinunana kadakuada: ‘Kasta ti adda a naisurat ngem masapul a ni Kristo agsagaba ken agungar kadagiti natay iti maikatlo nga aldaw.’”​—Lucas 24:45, 46.

5. Idi Pentecostes 33 K.P., kasano ti panangsurot ni Pedro ti ulidan ni Kristo iti panangusar kadagiti Kasuratan?

⁵ Babaen iti panangsurotda iti Manangulidan, idi tawen 33 K.P. rinugian ti kongregasion Kristiano ti ministerio publikona babaen ti panagusar ti Kasuratan. Ti lugar: maysa a napanayag a disso iti ruar ti maysa a balay idiay Jerusalem. Kalpasan ti pannakangngeg ti daranudor “ti kasla panagpuyupoy ti napigsa unay nga angin” manipud iti daytoy a balay, ti rinibo a Judio iti Jerusalem ken dagiti peregrino a Judio naallukoyda iti daytoy a lugar ket nagtataripnongda. Immaddang ni Pedro​—a dagiti 11 a dadduma nga apostol ti adda iti aglawlawna​—ket buyogen ti napigsa a timek nangrugi nga agsao: “Dakayo a lallaki a Judio ken dakay amin nga agnaed iti Jerusalem, ammuenyo koma daytoy ket imdenganyo dagiti saok.” Kalpasanna babaen ti panangitudona iti “sinao ni mammadto a Joel” ken ti “kuna ni David,” inlawlawag ni Pedro dagiti datdatlag a kalkalpas a napasamak ken kasta met “daytoy Jesus nga inlansayo iti kayo, inaramid ti Dios nga Apo ken Kristo.”​—Aramid 2:2, 14, 16, 25, 36.

6. (a) Ilawlawag no aniat’ napasamak iti taripnong ti immuna-siglo a bagi a manarawidwid. (b) Kasano a napakaammuan dagiti kongregasion iti desision ti bagi a manarawidwid, ket ania dagiti gunggonana?

⁶ Idi kasapulan dagiti immuna a Kristiano dagiti makailawlawag nga impormasion maipapan ti pammati ken kababalin, ti immuna a siglo a bagi a manarawidwid ti nagusar met a sisasayaat kadagiti Kasuratan. Kas pangarigan, iti taripnong ti bagi a manarawidwid idi tawen 49 K.P., ni adalan a Santiago, a nagtignay kas tsirman, ti nangiturong ti atensionda iti maysa a pertinente a kasuratan a nasarakan idiay Amos 9:11, 12. “Lallaki, kakabsat, denggendak,” kunana. “Ni Simon sinaritana no kasano ti panangrugi ti Dios a nangsarungkar kadagiti nasnasion tapno mangala kadakuada ti tattao a maipaay iti naganna. Ket maiyannugot itoy dagiti sao dagiti Mammadto, kas iti naisurat.” (Aramid 15:13-17) Immanamong ti intero a bagi iti proposision ni Santiago ket sada inkabil iti naisurat a porma ti naibatay iti kasuratan a pangngeddengda tapno daytat’ maipatulod kadagiti amin a kongregasion ken mabasada ida. Aniat’ resultana? Dagiti Kristiano “nagragsakda gapu iti panangliwliwa,” ken “dagiti kongregasion napabilegda iti pammati ket ti bilangda immadu nga inaldaw.” (Aramid 15:22-31; 16:4, 5) Gapuna, ti immuna a kongregasion Kristiano nagbalin nga adigi ken sadiri ti kinapudno.” Ngem ania met ngay maipapan ti moderno a historia? Tuladento aya ni C. T. Russell ken dagiti katulonganna nga estudiante ti Biblia daytoy nagsayaat, umuna-siglo nga ulidan? Kasano ti panagbalinda a kampeon ti kinapudno?​—1 Timoteo 3:15.

Dagiti Magasin nga Adayo ti Madanonna a Panangmatmat

7. (a) Aniat’ panggep ti Zion’s Watch Tower? (b) Siasinot’ minatmatanna a maipaay ti pannakasuportana?

⁷ Ti Hulio 1879 nakitana ti pannakaipasngay ti kangrunaan a nga alikamen ni Russell a panangilawlawag ti Biblia​—ti Zion’s Watch Tower and Herald of Christ’s Presence. Ti umuna a ruarna ti nangiwayat ti nagtakneng a panggep ti magasin: “Kas ipamatmat ti naganna, ranta dayta ti panagbalin a pagsiputan nga isut’ pakaiyanunsiuan dagiti bambanag a paginteresan ken pakagunggonaan nga agpaay iti ‘bassit nga ipastoran,’ ken kas ti ‘Mangiwaragawag ti Kaadda ni Kristo,’ tapno mangted ti taraon iti umiso a panawen iti ‘sangakabbalayan ti pammati.’” Agtalek iti Dios a mannakabalin-amin ti bato a pasuli ti magasin. Kuna ti maikadua a ruarna: “‘Ti Zion’s Watch Tower’ ti addaan, patienmi, ken ni JEHOVA kas ti salindegna, ket kabayatan a kastoy ti kasasaad daytat’ pulos dinto agdawdawat wenno agpalimos kadagiti tattao a maipaay ti panangsuportar. No Daydiay nagkuna: ‘Amin a balitok ken pirak kadagiti bambantay kukuak,’ ket mapaayton a mangted iti kasapulan a panggasto, maawatanmi a tiemponton nga isardeng ti panagipablaak.”

8. Ilawlawag ti panagdakkel Ti Pagwanawanan iti lawag ti Isaias 60:22 ken Zacarias 4:10.

⁸ Ti Zion’s Watch Tower, nga isu itan Ti Pagwanawanan, ti nagtultuloy a maipabpablaak iti nasuroken a 107 a tawtawen. Dimmakkel daytoy manipud iti binulan a magasin a 6,000 a kopia ti maimalmaldit iti maysa a pagsasao a nagbalinen a mamindua iti makabulan a magasin nga addaanen 12,375,000 a kopia a magun-odan iti 103 a pagsasao.​—Idiligyo iti Isaias 60:22; Zacarias 4:10.

9. Kasano a ti paulo a Watch Tower maiyanatup unay?

⁹ Ti paulo a, Watch Tower, ket naiyanatop unay a pili ni Russell. Ti sao ti gagangay a maus-usar iti Hebreo a Kasuratan a maipaay iti “pagwanawanan” a kaipapananna “pagtan-awan” wenno “lugar a pagsiputan,” a sadiay silalaka a makita ti guardia ti maysa a kabusor iti adayo ket mangpaguni iti pakdaar iti iyaadani ti peggad. Ngarud, apagpag-isu, a kadagiti umuna a 59 a tawtawen a pannakaipablaak, inaw-awit ti paulo a panid daytoy makakarit a panagadaw manipud Isaias 21:11, 12, King James Version: “Agwanawan, Adda Aya Aniaman iti Rabii?” “Ti Bigat Sumungad.”

10. Asino ti agserbi nga agwanawan iti Isaias 21:11, ket ania a mensahe ti inyanunsiona?

¹⁰ Ti naipuesto nga agwanawan iti padto ni Isaias ti umabanten iti di mabayag. Iti tengnga ti agsaksaknap a dakes a kasasaad ti daga, siraragsak nga iwaragawagna ni Russell ti naimbag a damag ti isusungad “ti bigat.” Ti Milenio a Panagturay ni Jesu-Kristo iti kinatalna isu ti tema ti maysa a maabrasa a damag. Ngem sakbay ti idadateng “ti bigat,” ti klase nga agserserbi kas agwanawan​—ti natda ti naespirituan a Israel ita​—ti situtured a mangpakdaar ti ilalasat ti rabii a magtenganna ti kasisipngetan a pasetna “iti gubat ti dakkel nga aldaw ti Dios a Mannakabalin-amin” inton Har–Magedon.​—Apocalipsis 16:14-16.

11, 12. (a) Kasano nga ipakita dagiti sasao idiay Isaias 21:8 a ti klase agwanawan ket matalek ken alerto? (b) Manipud ania nga ahente ti pagtaudan ti report itatta, ket kasanot’ kangrunaan a pannakaisaknapna?

¹¹ Iti nasapsapapa pay, idiay Isaias 21:8, naiyam-ammotayo iti daytoy matalek nga agwanawan kadagitoy a sasao: “Ket isu nagpukkaw a kas maysa a leon: ‘O Jehova, agtaderak nga agnanayon iti rabaw ti pagwanawanan iti aldaw, ket naisaadak nga agbantay iti agpatpatnag iti rabii.’”

¹² Iladawanyo iti panunotyo ti maysa nga agwanwanawan a nakapuesto iti maysa a nangato a torre, a sirurukob, a sirsiripenna ti adayo bayat ti aldaw, a pagregreggetanna a lussoken ti kinasipnget bayat iti rabii​—kanayon a sialibtak. Itan addaankayon ti kangrunaan nga idea nga ipapaawat ti sao a Hebreo maipaay iti “pagwanawanan” (mits·pehʹ) kas nausar idiay Isaias 21:8. Yantangay ti agwanawan ti sisisiput unay, asino nga adda iti umiso a panunotna ti agduadua iti umaw-aweng a reportna? Kasta met itatta, ti klase agwanawan ti agregregget unay babaen ti panangsukimatna kadagiti Kasuratan tapno makita no ania ti iduldulin ni Jehova a maipaay iti daytoy a sistema dagiti bambanag. (Santiago 1:25) Kalpasanna ipukkaw ti agwanawan dayta a mensahe a sipipigsa ken awanan buteng, kangrunaanna babaen kadagiti panid Ti Pagwanawanan. (Idiligyo iti Amos 3:4, 8.) Daytoy a magasin nikaanoman dinto agsanud gapu iti buteng manipud panangikampeonna ti kinapudno!​—Isaias 43:9, 10.

13. Ania a katulongan a pagiwarnakan ti nagparang idi 1919, ket ania nga umas-asping a panggep ti adda iti dayta?

¹³ Idi Oktubre 1, 1919, maysa a baro a magasin ti nagparang iti lubong: The Golden Age.a Ti klase agwanawan ti mangusar iti daytoy nga instrumento kas katulongan ti Ti Pagwanawanan. Nupay dagiti artikulona ket saanda a mangisalaysay iti tema ti Biblia a siuuneg kas kadagidiay adda iti Ti Pagwanawanan, dayta ti mangpaalerto iti sangatauan kadagiti ulbod a narelihiusuan a pannursuro, ti iyaay ti pannakadadael ti agdama a dakes a sistema dagiti bambanag, ken ti baro a daga ti kinalinteg a sumaruno. Wen, dayta met ti mangikampeon ti kinapudno!

14. Aniat’ ranta ti Consolation, ken kamaudiananna ti Awake! wenno Agriingkayo!?

¹⁴ Sangapulo ket walo a tawen iti kamaudiananna ti nagan a The Golden Age ti nasukatan iti Consolation. “Ti baro a nagan itaktakderanna ti kinapudno,” kuna ti ruar ti Oktubre 6, 1937. Ti Consolation nagbalin nga Awake! iti ruarna iti Agosto 22, 1946. Iti dayta a ruar inkarina: “Ti kinatarnaw iti kinapudno isunto ti kangangatuan a ranta daytoy a magasin.” Agingga iti daytoy nga aldaw, daytat’ di napaay a nangsalimetmet iti dayta a kari. Naisalsalumina unay, ibakbaklay Ti Pagwanawanan ken Agriingkayo! ti wagayway ti kinapudno a nakangatngato tapno makita dagiti isuamin. Iti panangaramidda iti dayta, sursuroten dagiti magasin ti dalan a binasbasan ti immuna a kongregasion Kristiano.​—3 Juan 3, 4, 8.

Ti Pagwanawanan ken Agriingkayo!:Dagiti Kampeon ti Kinapudno

15. (a) Ania a metodo ti panangisaknap kadagiti naespirituan a taraon itatta ti umas-asping iti immuna a kongregasion Kristiano? (b) Malaksid ti panagadaw kadagiti bersikulo ti Biblia, ania pay ti kasapulan? Mangted pangarigan.

¹⁵ Ti klase “matalek ken naannad nga adipen,” ti “agwanawan,” us-usarenna itatta ti magasin a Pagwanawanan babaen ti panangiwanwan ti Bagi a Manarawidwid dagiti Saksi ni Jehova kas ti kangrunaan a kalasugan ti panangipaay iti naespirituan a “taraon iti umiso a tiempo.” (Mateo 24:45) Sursuroten daytoy ti padron ti kongregasion idi umuna a siglo, nga isut’ mangikabkabil kadagiti makailawlawag nga impormasion maipapan iti doktrina ken moral kadagiti naisurat a langa “tapno mabasa amin dagiti kakabsat.” (1 Tesalonica 5:27) Manipud pangrugianna Ti Pagwanawanan ti maysan a magasin nga agus-usar ti Biblia ken mangisursuro ti Biblia. Kas pangarigan, ti umuna a ruar ti Zion’s Watch Tower inadawna wenno insitarna ti nasurok a 200 a teksto iti di kumurang a 30 a libro ti Biblia. Ngem ad-adu pay ti kasapulan ngem basta panagad-adaw kadagiti bersikulo ti Biblia. Kasapulan dagiti tattao ti tulong a mangtarus kadakuada. Ti Pagwanawanan ti kanayon nga isut’ mangiyad-adelantar iti pannakaawat ti Biblia. Manipud 1892 ingganat’ 1927 tunggal ruar ti naglaon ti linawas a panagbasa ti Biblia ken ti panangsalaysay ti maysa a kangrunaan a teksto manipud tunggal panagbasa. Maipaay kadagiti dadduma a pangarigan, kitaenyo ti tsart a napauluan “Dagiti Nakaaramid-Historia nga Artikulo ti Pagwanawanan, Dekada por Dekada.”

16, 17. Ania ti inaramid ti immuna nga editor Ti Pagwanawanan tapno maipasiguro a daytoy a magasin kanayon a mangikampeon ti kinapudno ti Biblia?

¹⁶ Kasanot’ panangtaginayon Ti Pagwanawanan ti kinadalus dagiti naimaldit a mensahena? Ti umuna nga editor ti magasin, ni C. T. Russell, ti nangipaulog kadagiti panangsaluad tapno maipasiguro a ti adda a naimaldit Ti Pagwanawanan ket isu ti kinapudno kas pannakaawatda idi. Maysa kadagidiay a panangsaluad ti mailasin iti testamentona a naaramid idi Hunio 27, 1907. (Natay ni Russell idi Oktubre 31, 1916.) Kuna ti testamentona:

“Ibilinko a ti intero a pannakaitalek ti editorial ti ZION’S WATCH TOWER ket tamingen ti maysa a komite dagiti lima a kakabsat a lallaki, nga isudat’ binagbagaak a masapul a naannadda unay ken matalekda iti kinapudno. Amin dagiti artikulo nga agparang kadagiti binnatog ti ZION’S WATCH TOWER ti rebbeng a maaddaan iti naan-anay a pananganamong ti di kumurang tallo kadagiti komite ti lima, ket igunamgunam, a no adda aniaman a banag nga inanamongan ti tallo a maammuan wenno maipagarup a maikontra iti panangmatmat ti maysa wenno dua kadagiti dadduma a miembro ti komite, dagita nga artikulo ti masapul a mailasin tapno mapagpanunotan, maikararagan ken mapagsasaritaan iti tallo a bulan sakbay ti pannakaipablaakna​—nga ingganat’ mabalin ti panagkaykaysa ti pammati ken ti singgalut ti talna ti masapul a mataginayon iti pannakaimaton ti editorial ti pagiwarnakan.”

¹⁷ Tunggal miembro ti Editorial Committee, sigun iti testamento ni Russell, ti masapul a “naan-anay a nasungdo kadagiti doktrina ti Kasuratan” ket rebbeng nga iparangarangna, kas prominente a kababalin, “ti kinadalus ti panagbiag, kinalitnaw ti kinapudno, regta a maipaay iti Dios, ayat kadagiti kakabsat ken kinamatalek iti Mannubbot.” Inkeddeng pay met ni Russell nga “iti aniaman a pamay-an saan koma a maipamatmat a dagiti nadumaduma nga artikulo iti pagiwarnak ket agparang no siasino ti nangisurat . . . a ti kinapudno ti mailasin ken maapresiar gapu iti kabukbukodan a pateg, ket ti Apo ti ad-adda a nangnangruna a mabigbig kas ti Ulo ti iglesia ken ti Ubbog ti kinapudno.”

18. Apay a mabalintay a basaen Ti Pagwanawanan ken Agriingkayo! a buyogen ti panagtalek?

¹⁸ Agingga itoy nga aldaw sursuroten ti Bagi a Manarawidwid dagiti umas-asping a pagannurotan. Tunggal artikulo agpadpada iti Ti Pagwanawanan ken Agriingkayo! ken tunggal panid, agraman ti trabaho ti arte, ti suksukimaten dagiti napili a kamkameng ti Bagi a Manarawidwid sakbay a daytat’ maimaldit. Mainayon pay, dagidiay tumultulong iti panagsurat kadagiti artikulo maipaay Ti Pagwanawanan ket isuda dagiti Kristiano a panglakayen a mangapresiar iti kinaserioso ti naituding a trabahoda. (Idiligyo iti 2 Cronicas 19:7.) Mangbusbosda ti adu nga oras iti panagsukimat iti Biblia ken dagiti dadduma a reperensia a materiales tapno masiguro a ti adda a naisurat isu ti kinapudno ken simamatalek a sursurotenda ti Kasuratan. (Eclesiastes 12:9, 10; 2 Timoteo 1:13) Saanen a karkarna para iti maysa nga artikulo ti magasin​—a mabalinyo a basaen iti 15 minutos​—nga abutenna ti manipud dua a lawas inggat’ nasurok a makabulan nga isagana.

19. Aniat’ maaramidanyo tapno maikampeonyo met ti kinapudno ti Biblia?

¹⁹ Gapuna, mabalinyo a basaen a simamatalek Ti Pagwanawanan ken Agriingkayo! Ngem mabalin pay a dakdakkel ti maaramidanyo. Mabalinyo nga itukon a siraragsak dagitoy a magasin kadagiti dadduma tapno uray isuda maammuanda met ti kinapudno ket magunggonaanda manipud pannakangngeg kadagiti mensahe ti ‘agwanwanawan a sitatakder iti pagwanawanan.’ (Isaias 21:8) Wen, kadua ti moderno-aldaw nga agwanawan, uray dakayo met mabalinyo ti agbalin a kampeon ti kinapudno ti Biblia.

[Dagiti Footnote]

Malagipyo Pay Aya?

◻ Apay a rinugian ni C. T. Russell ti nagipablaak kadagiti literatura ti Biblia?

◻ Kasano nga inkampeon dagiti immuna a Kristiano ti kinapudno?

◻ Apay a ti sao a “Pagwanawanan” adda iti titulo daytoy a magasin?

◻ Asino ti moderno-aldaw nga agwanawan, ket ania nga instrumento ti kangrunaan nga us-usarenna tapno mapapigsa ti timekna?

◻ Kasano nga inkampeon Ti Pagwanawanan ken Agriingkayo! ti kinapudno ti Biblia?

[Tsart iti panid 13]

Dagiti Nakaaramid-Historia nga Artikulo ti Pagwanawanan, Dekada por Dekada

1879: “Ti Dios Isu ti Ayat”​—inkampeonna ti daton a subbot ni Jesus kas ti pakaibatayan ti pannakapakawan ti sangatauan

1879: “Apay a Napalubosan ti Kinadakes”​—ilawlawagna no apay a ti kaadda ni Jesu-Kristo ket di makita

1880: “Maysa a Bagi, Maysa nga Espiritu, Maysa a Namnama”​—intudona ti 1914 kas ti panagpatingga ti Panawen Gentil

1882: “Ti Supapak ti Basol Isu ni Patay”​—imbutaktakna ti doktrina ti agnanayon a panagtutuok kas panangilibak ti ayat ti Dios

1885: “Ti Ebolusion ken ti Panawen ti Utek”​—imbutaktakna ti teoria ti ebolusion nga ulbod

1897: “Aniat’ Kuna dagiti Kasuratan Maipapan ti Espiritismo?”​—nangted pammaneknek iti nademoniuan a namunganayan ti espiritismo

1902: “Umuna ti Dios​—Dagiti Panangdutokna”​—ipagpaganetgetna ti panagtulnog iti linteg ti Dios iti pamilia ken iti panagnegosio

1919: “Naragsak dagiti Awan Butengna”​—nangyeg baro a biag iti maririing nga organisasion dagiti awanan buteng a managdaydayaw

1925: “Pannakaipasngay ti Nasion”​—pinagbalinna a nalawag dagiti padto a mangipakpakita a ti Pagarian ti Dios naipasngay idi 1914

1931: “Maysa a Baro a Nagan”​—manipud idin ti nagan a Dagiti Saksi ni Jehova ti mangilasin kadagiti pudno a Kristiano manipud iti apostata a Kakristianuan

1935: “Ti Dakkel nga Umariwekwek”​—impakitana a ti pannakaurnong dagidiay agbiag nga agnanayon ditoy daga ket madaman

1938: “Organisasion”​—inserrekna ti pudpudno a nateokratikuan nga urnos kadagiti Saksi ni Jehova

1939: “Neutralidad”​—pinapigsana dagiti Saksi ni Jehova iti intero a lubong tapno maibturanda dagiti pammarigat ti Gubat Sangalubongan II

1942: “Ti Kakaisuna a Lawag”​—nangted senias ti “panagabante” ti maingel a panagtultuloy ti trabaho a panangasaba

1945: “Di Maisin a Maipaay iti Umiso a Panagdayaw”​—impakitana a masapul a dagiti Kristiano umadayoda iti pannakaiyalison ti dara

1952: “Panangsalimetmet a Nadalus ti Organisasion”​—impakitana a ti panangilaksid babaen kadagiti kongregasion ti Nainkasuratan

1962: “Ti Panagpasakop kadagiti ‘Nangangato a Turturay’​—Apay?”​—nangted kadagiti rason a maipaay iti relatibo a panagpasakop kadagiti natauan a pannakabalin

1973: “Panangsalimetmet a Nadalus ti Kongregasion ti Dios iti ‘Panawen ti Panangukomna’”​—ingunamgunamna ti panangidian ti panangusar ti tabako

1979: “Regta a Maipaay ti Balay ni Jehova”​—impaganetgetna a ti panangasaba a panagbalaybalay ket sursurotenna ti apostoliko nga ulidan

1982: “Ay-ayaten, . . . Salimetmetanyo ti Ayat ti Dios Kadakayo”​—pinagalibtakna dagiti Kristiano kadagiti metodo a panagtignay dagiti apostata

1983: “Pannakipagna a Kadua ti Dios iti Naranggas a Lubong”​—pinatalgedanna a dagiti Kristiano masapul a saanda a paset kadagiti aniaman a kinaranggas

1984: “Ti Agdama a Pagtaraknan iti ‘Sabsabali a Karnero’”​—linawlawaganna no kasano a daytoy naindagaan a klase ti maiyeg a maikaykaysa kadagidiay adda iti “pagtaraknan” ti baro a tulag

1987: “Ti Nakristianuan a Jubileo Dumteng iti Kangitingitanna iti Milenio”​—impakitana no kasano nga amin a nasungdo a Kristiano magun-odandanto ti wayawaya ken biag