Maysa a Broshur nga Addaan Baro a Langa
TI IMPORMASION nga adda iti napalabas nga artikulo ti naiparang iti intero a daga bayat ti 1986 kadagiti “Nadiosan a Talna” a Kumbension Distrito dagiti Saksi ni Jehova. Gupgopenmi manen ditoy dagiti kanayonan a makapainteres a komento nga inaramid ti managpalawag:
“Adtoy! Pagbalinek a Baro dagiti Isuamin a Bambanag.” Dayta ti paulo ti maysa a polieto nga impablaak ti Watch Tower Society idi 1959. Daytoy a kita ti polieto ti inkalikagum dagiti misionero idiay Japan. Maysa a pagkasapulan ti narikna sadiay a maipaay iti publikasion a mangiparang ti mensahe ti Pagarian iti nalawag, simple a pamay-an nga agpaay a pakagunggonaan dagiti tattao a di pay unay makaammo iti Biblia a mismo. Iti sidong ti panangaywan ti Watch Tower Society, nasurok a 30 a misionero ti nakiraman iti panangbukel iti daytoy a polieto. Pinunuan kadi daytoy baro a polieto ti pannakasapul idi daytat’ nagbalin a kangrunaan nga instrumento a panangirugi kadagiti baro a panangyadal idiay Japan?
Dagiti resultana ti agsao a maipaay iti bagbagida. Idi tiempo a pannakairuar ti polieto nga “Adtoy!”, adda idi ti kangatuan a bilang a 1,390 nga agibumbunannag ti Pagarian idiay Japan. Itatta, ti kangatuan a bilang ket 114,480 nga agibumbunannag. Ngangngani amin dagitoy ti naiyam-ammo iti panagadal ti Biblia babaen iti polieto nga “Adtoy!” Bayat ti napalabas a 27 a tawtawen, nasurok nga 8,750,000 a kopia daytoy a polieto ti naiwaras iti laeng pagsasao a Hapones. Ket iti napalabas a 20 a tawtawen, ti Japan ti nakaireport iti baro a kangatuan a bilang dagiti agibumbunannag ti Pagarian iti kada bulan malaksid ti dua. Nupay awan duadua addada met dagiti dadduma pay a makagapu a nakatulong iti daytoy nagsayaat nga irarang-ay, awan duadua a ti panangusar iti polieto nga “Adtoy!” a pangirugi kadagiti panangyadal ti Biblia ti maysa a dakkel a rason.
Daytoy a polieto itan ti napabaro, sigun kadagiti agdama a kasapulan ket nairuar kadagiti “Nadiosan a Talna” kumbension a kas iti kadakkel ti magasin a broshur a 32-panid. Maysa a baro a seksion ti nainayon iti topiko a “Dagiti Dakes a Bambanag—Apay a Palpalubosan ti Dios Ida?” Mainayon pay, dagiti pangserra a parapo nabaliwanda a naisurat tapno maikkan ti estudiante ti nabara a pammaregta a makitimpuyog iti organisasion ni Jehova. Itan ti publikasion nga agparangen nga addaan dadakkel, nalaka a mabasa a tipo ken sumagmamano a makaisuro nga ilustrasion. Ti napintas nga uppat kolor nga abbongna ti nailadawan iti napabassit a retrato iti kasumbangir a panidna.
Daytoy kadi baro a broshur, nga “Adtoy! Pagbalinek a Baro dagiti Isuamin a Banag!,” ti mausar laeng iti Dumaya? Awan duadua agbalin nga epektibo unay dayta sadiay. Nupay kasta, mapapati a ti “Adtoy!” a broshur ti nausarto met iti intero a sangalubongan a tay-ak iti panangirugi kadagiti panangyadal ti Biblia. Ngangngani 30 a tawenen ti naglabas nanipud pannakapataud ti orihinal a polieto. Kabayatan dayta a tiempo, ti pannakaammo ti Biblia ti bimmaba unay manen, uray pay kadagiti dagdaga nga agkuna a Kristianoda. Imbes a mangmangngegan manipud kadagiti dadakkelda dagiti agdindinamag ken pagaammo nga estoria manipud iti Biblia, maysa a baro a kaputotan ti dimmakkel a dagiti matmata ken lapayagda ti nakapagket kadagiti telebision, a sagsagepsependa ti aniaman nga ipapaay ti lubong. Daytoy, agraman kadagiti dadduma a pakariribukan iti daytoy agmauyong iti ragsak a lubong, ti nangsallinen kadagiti napapateg nga oras a mabalin koma nga usaren nga agpaay iti naespirituan nga irarang-ay. Ti moderno a kaputotan, iti Kakristianuan wenno iti dadduma pay a luglugar, ti nagbassitan ammoda maipapan iti Sao ti Dios. Kasapulanda ti ‘gatas ti Sao,’ a naibalabala a sibabatad iti broshur nga “Adtoy!”—Hebreo 5:12.
Iti intero a lubong, addada tattao a ti puspusoda ti agannayas nga agturong iti kinalinteg ket pagrag-oanda ti makaammo no kasano a maikuyogdanto iti “dakkel a bunggoy” a makalasat iti Armagedon. (Apocalipsis 7:9, 14) Iti trabahotayo a panagbalaybalay, mabalin nga adu dagiti masarakantayo a makagusto iti nakaay-ayat ladawanna nga abbong ti broshur ken babaen iti makakayaw a pannakailadawan ti Paraiso kadagiti panglukat a parapona. Iti panagsarungkar, mabalintay nga usaren dagiti agsasaruno a kasuratan a naisitar kas pangsuportar kadagidiay a parapo a mangipakita a daytoy a namnama ket saan laeng a tagtagainep. Ket kalpasanna, babaen ti regular a panagadal ti Biblia, nga us-usaren ti broshur nga “Adtoy!”, mabalintay a matulongan ida a mangrugi iti dalan nga agturong iti biag. Kas kinuna ni Jesus iti kararag ken Amana: “Daytoy kaipapananna ti biag nga agnanayon, ti pananggun-odda ti pannakaammo kenka, ti kakaisuna a pudno a Dios, ken daydiay imbaonmo, ni Jesu-Kristo.”—Juan 17:3.
Sapay koma ta datay amin usarentay a sireregta ti broshur nga “Adtoy!” iti panangisilnag kadagiti kinapudno ti Pagarian, a ti “dakkel a bunggoy” makidanggay a kadua dagiti natda pay a napulotan iti naarian a kinapadi iti ‘panangisilnagda kadagiti lawagda iti imatang dagiti tattao.’ (Mateo 5:16) Sapay koma ta ti natan-ok a nagan ni Soberano nga Apo Jehova ti naan-anayton a masantipikar. Sapay koma ta maidemostra nga agpaay iti isuamin a panawen a dagiti karkari ni Jehova a Dios, a Namarsua iti langit ken daga, ket “matalek ken napudnoda.” Ta isu daydiay nangiwaragawag manipud tronona idiay langit: “Adtoy! pagbalinek a baro dagiti isuamin a banag.”—Apocalipsis 21:5.