Baro nga Alikamen a Tumulong Kadagiti Tattao a Mangammo Kadagiti Kalikaguman ti Dios
“TI SIMPLE, direkta, ken nasayaat nga estilona mangpataud kadagiti resulta nga ad-adda pay ngem iti ninamnama. Naidatag dagiti tema iti simple ken makaay-ayo a wagas a pakatignayan ti siasinoman a napasnek, managsukisok a tao a mangikuna, ‘Ti Dios pudno nga adda iti tengngayo.’” (1 Corinto 14:25) Kasta ti kinuna ti maysa kadagiti Saksi ni Jehova idiay Thailand idi desdeskribirenna ti baro a broshur nga Ania ti Kalikaguman ti Dios Kadatayo? Inruar daytoy ti Watch Tower Society kadagiti Kombension Distrito a “Dagiti Mensahero ti Nadiosan a Talna” kabayatan ti 1996/97.
Daytoy 32-panid, de kolor a broshur nadisenio kas pagadalan iti Biblia. Saklawenna dagiti pamunganayan a pannursuro iti Biblia. Simple ken ababa dagiti sasao, a mangilawlawag a sibabatad kadagiti kalikaguman ti Dios kadatayo. Saan a marigatan dagiti agbasa a mangtarus iti dayta. Kasanoyo nga idaulo ti panagadal iti Biblia iti daytoy baro a broshur?
Usarenyo dagiti saludsod. Adda salsaludsod iti pangrugian ti kada leksion. Kadagiti parenthesis kalpasan ti kada saludsod, masarakanyo ti numero dagiti parapo a pakasarakan kadagiti sungbat. Mabalin a mausar dagitoy a saludsod kas pangripiripan ken repaso a katulongan iti panangisuro. Kas pagarigan, iti pangrugian ti panagadal iti Biblia iti pagtaengan, mabalinyo nga iyimtuod dagiti saludsod iti estudiante tapno ammuenyo dagiti komentona. Imbes a dagus a korehirenyo dagiti aniaman a di umiso a sungbat, mabalinyo a rugian ti panagadal. Iti ngudo ti leksion, mabalinyo a sublian dagiti saludsod tapno ammuenyo no masungbatan idan ti estudiante maitunos iti Biblia.
Kitaenyo dagiti kasuratan. Iti kada leksion, ti ababa a sasao dagiti kinapudno iti Biblia ket napakuyogan kadagiti mangsuporta a kasuratan. Yantangay naisitar ti kaaduan kadagiti kasuratan, saan a naadaw, nasken a maiparegta iti estudiante a kitaenna dagitoy a teksto iti bukodna a Biblia. Masapul a basaen ken utobenna ti Sao ti Dios sakbay a mayaplikarna iti panagbiagna.—Josue 1:8.
Itampokyo dagiti retrato. Ti broshur ket aduan iti retrato ken naipinta a ladawan—nga agdagup iti nasurok a 50. Nairanta dagitoy saan laeng a pangpapintas no di pay ket kas kanayonan a katulongan iti panangisuro. Kas pagarigan, napauluan dagiti dua a maudi a leksion (saggaysa a panid, iti agsinnango a panid) iti “Panangtulong Kadagiti Sabsabali a Mangaramid iti Pagayatan ti Dios” ken “Ti Pangngeddengyo nga Agserbi iti Dios.” Dagiti ladawan iti dua a panid ipakitada ti naespirituan nga irarang-ay ti isu met laeng a tao, a mangipakpakita iti panangaskasabana iti di pormal, makiramraman iti trabaho a panagbalaybalay, agdedikar, ken kamaudiananna agpabautisar. Babaen ti panangiturong iti atension ti estudiante kadagitoy a ladawan, tultulonganyo a mangkita kadagiti addang a makalikaguman tapno makapagserbi iti Dios.
No ngay di unay makabasa wenno di pulos makabasa ti tao nga interesado? Inyurnos ti Sosiedad a magun-odan daytoy baro a broshur iti audiocassette iti adu a pagsasao. Linaon ti cassette dagiti sasao ti broshur agraman iti adu kadagiti naisitar a kasuratan. Kastoy ti pannakairekordna: Mabasa ti umuna a saludsod, a sarunuen ti parapo (wenno dagiti parapo) a mangsungbat iti dayta, agraman dagiti sumagmamano a naisitar a kasuratan. Kalpasanna mabasa ti sumaganad a saludsod, a sarunuen ti teksto ken dagiti kasuratan a mangsungbat iti dayta, ken agtultuloy a kasta. Mabalin a denggen ti estudiante ti recording bayat nga agsagsagana iti panagadal. Mausar met ti cassette no mangidaulo iti panagadal.
Magagaran dagidiay timmabuno iti kombension a mangusar iti daytoy baro a broshur iti ministerioda iti tay-ak. Kas pagarigan, sumagmamano laeng nga aldaw kalpasan a naawatda ti broshur, dua a payunir (amin-tiempo nga ebanghelisador) manipud Estados Unidos ti nangipaima iti dayta iti agassawa a kinasabaanda. Idi kinita dagiti agassawa ti linaonna, naginteresda iti leksion a “Dagiti Aramid a Kagura ti Dios.” “Kanayon a naisuro kaniak a di pulos gumura ti Dios—isu ket bin-ig nga ayat,” kinuna ti babai. “Daytoy ti umuna a basaek.” Idi nagsubli dagiti dua a payunir iti sumaganad a lawas, kinuna ti babai: “Basbasaekon ti baro a broshur. Nakarigrigat nga aramiden amin a banag a rumbeng nga aramidenmi. Saan a maay-ayo ni Jehova kadakami—saankami a nagkasar. Ngem nakaikeddengkamin. Inyurnosmin ti agkasar inton sumaganad a Biernes.” Bayat a rinakepda dagiti agassawa a payunir, kinunada pay: “Dispensarenyo ti dimi pannakipagadal a regular, ngem nabang-arankam unay iti daytoy.”
Dikay agtaktak a mangaramat iti baro a broshur a Kalikaguman. Nasayaat daytoy nga alikamen a pangtulong kadagiti sabsabali a mangadal kadagiti kalikaguman ti Dios.
[Dagiti Ladawan iti panid 17]
Kasanoyo nga usaren ti baro a broshur?