Us-usarem Kadi ti Broshur a Kalikaguman a Pangirugi iti Panagadal?
1 Ammom kadi a no regular ken sistematiko ti pannakisaritam maipapan iti Biblia, nupay apagbiit, iti interesado a tao ken pagsaritaanyo ti maysa a topiko iti maysa kadagiti nairekomenda a publikasion, mangikonkonduktakan iti panagadal iti Biblia? Wen, maibilang daytoy a panagadal iti Biblia uray no naaramid iti ruangan wenno iti telepono. Apay a dika mangaramid iti naisangsangayan a panagregget bayat ti Mayo ken Hunio tapno makairugika iti kasta a panagadal nga usarem ti broshur a Kalikaguman?
2 Agsaganaka Tapno Agballigi: No itukonmo ti broshur a Kalikaguman, masapul a nalawag iti panunotmo no ania ti kayatmo nga ilawlawag. No agsarungkarka, lagipem ti nagsaritaanyo idi damo a simmarungkarka. Saludsodam ti bagim: ‘Aniada a parapo iti broshur ti mabalinko nga itampok tapno maituloy ti saritaan ken mangiturong iti panagadal iti Biblia?’ No mangasabaka iti binalaybalay, usigem no aniada a tema ti makaallukoy iti agtutubo, nataengan, lalaki, wenno babai. Repasuem dagiti kangrunaan a topiko iti broshur, ken piliem ti suheto a makapainteres. Kalpasan a naikeddengmo no kasanom nga idatag dayta, mamin-adu nga ensayuem. Maysa daytoy kadagiti tulbek ti panagballigi.
3 Ti suplemento iti daytoy a ruar Ti Ministeriotayo iti Pagarian ket mangipaay iti walo a ‘Singasing iti Panangiparang iti Broshur a Kalikaguman.’ Ti kahon a “Ti Direkta a Pamay-an” ipakitana no kasano nga usaren ti broshur a pangirugi iti panagadal. Mabalinmo nga usaren ti umuna a singasing a kas iti sumaganad:
◼ “Ammoyo kadi nga iti sumagmamano laeng a minuto, masarakanyo ti sungbat ti maysa a napateg a saludsod a mainaig iti Biblia? Kas pagarigan, apay a nagadu dagiti relihion nga agkunkuna a Kristianoda? Pinampanunotyo kadin dayta?” Kalpasan a sumungbat ti bumalay, iturongmo ti atension iti adalen 13 ket pagsaritaanyo ti umuna a dua a parapo. No ipalubos ti tiempo, basaen ken pagsaritaanyo ti maysa wenno dua a teksto. Kalpasanna, basaenyo ti maudi a saludsod iti ngato ti panid, sa ibagam ti kastoy: “Ti dadduma pay a paset daytoy nga adalen itampokna dagiti lima a pagilasinan ti pudno a relihion. Maragsakanak nga agsubli tapno pagsaritaantanto dagitoy.”
4 Agporsegika: Aprobetsaren ti amin a gundaway a mangidemostra iti panagadal iti Biblia iti broshur a Kalikaguman. Dawatem ti bendision ni Jehova. (Mat. 21:22) No agporsegika, mapasaram ti rag-o nga itden ti panangtulong kadagiti sabsabali a mangipangag iti naimbag a damag!