Tulonganyo a Mangtarus Dagiti Awanan Pannakaammo
1 Iti trabahotayo a panangaramid-adalan, isursurotayo kadagiti sabsabali ti kalikaguman ti Dios kadakuada. (Mat. 28:19, 20) Saan a marukod ti balligi iti daytoy a trabaho babaen ti oras a nabusbos, literatura a naipaima, wenno panagadal iti Biblia a nairugi. Maibanagtay ti panggeptayo no matarusan dagiti tattao ti maad-adalda ken agtignayda a mayannurot iti dayta.
2 Ti panangtulong kadagiti sabsabali iti naespirituan ramanenna ti ‘panangted iti pannakaawat kadagiti nakuneng.’ (Sal. 119:130) Matignay laeng dagiti puso ken magutugot dagiti tattao no ‘maalada ti kababagasna.’ (Mat. 15:10) Bayat nga agsaksaknap ti trabahotayo, ad-adda a mabigbigtayo a nasken a simple ti panagsao ken panangisurotayo. Dayta ti gapuna nga impablaak ti Sosiedad ti broshur nga Ania ti Kalikaguman ti Dios Kadatayo? Ababa dagiti leksion, simple dagiti sao a naaramat, ken nalaka a maawatan ti ibagbagana.
3 Mairaman daytoy a broshur kadagiti magasin a maitampok iti bulan ti Abril ken Mayo. Mairekomenda nga iyurnosyo ti panangitukon kadagiti magasin iti Sabado kas iti sigud ngem itampokyo ti broshur iti lawlawasna. Itulodanyo iti broshur dagidiay nangala idin iti literatura. Laglagipenyo a makatulong daytoy a nangnangruna iti panangisuro kadagiti ubbing ken kadagidiay saan unay a makabasa.
4 Pagbalinenyo a Simple ti Pannakisaritayo: No iparangyo ti broshur a Kalikaguman, ukagenyo ti panid 2, a mangilawlawag a “nadisenio daytoy a broshur kas maysa a kurso ti panagadal iti Biblia.” Ipakitayo ti parapo 3 iti panid 3 a mangilawlawag no apay a nasken nga adalenna ti Biblia. Tukayenyo ti interesna babaen kadagiti paulo ti sumagmamano a leksion a mangipalgak kadagiti simple a kinapudno iti Biblia. Idemostrayo no kasano a pagbalinen daytoy a broshur a makaay-ayo ti panagsursuro, ket ibagayo a kayatyo nga ipaayan iti personal a tulong.
5 Mangikonduktakayo iti Progresibo a Panagadal: Saan a basta mangikondukta iti panagadal ti kalattayo—kayattayo ti agaramid kadagiti adalan nga agbalinto a natibker a sadiri ti pudno a panagdayaw. Mabalin nga ileppas ti broshur iti sumagmamano laeng a lawas ket maiturong koma iti panagadal iti libro a Pannakaammo. (Kitaenyo ti footnote iti panid 31.) Iti rugrugina pay laeng, tulonganyo ti estudiante a mangilasin iti organisasion ni Jehova. (Kitaenyo ti libro a Panakirinnason, panid 262-3; panid 283-4 iti Ingles.) Ipaganetgetyo ti pateg dagiti gimong ti kongregasion, ket ilawlawagyo a ti itatabuno kadagitoy mangipaay iti umdas a pannakaawat no kasano nga annuroten ti pudno a panagdayaw.—Heb. 10:24, 25.
6 Mangyeg rag-o kadatayo ti naan-anay a pannakiraman iti daytoy naisangsangayan a trabaho iti Abril ken Mayo bayat a tulongantayo dagiti napasnek a tattao a ‘gumun-od iti pannakaawat’ a mangiturong iti biag.—Prov. 4:5.